11
حٛولَاکِ اَللَّه
1 تٛو، حٛولَارٜ وٛنِ تَبِّتِنْکِ حٜٻُکِ کٛ نغَطّٜنْ کَمُّندٜ حٜٻُکِ، کَيْرٜ تَبِّتِنَنْتَعٜنْ فِي طُمْ اٜنْ نغِعَتَا؞
2 نغَمْ يِمْٻٜ اَرَنْدٜعٜنْ کٛولَکٜ اَللَّه وَطِ اٛ جَٻِٻٜ؞
3 نغَمْ اٜنْ کٛولِي اَللَّه وَطِ ڤَامُطٜنْ اٛ تَغِرِي دُونِيَارُ وٛلْدٜ مَاکٛ، نغَمْ کٛ يِعٜتٜىٰ وُرْتِنَامَ دَغَ ندٜرْ کٛ يِعَتَاکٜ؞
4 نغَمْ حَبِيلَ اٜ حٛولِي اَللَّه وَطِ سَکَّنِمٛ شَکِّرِ ٻُرْندِ ندِ کَيِنُ؞ نغَمْ اٜ مٛ حٛولِي اَللَّه وَطِ اَللَّه جَٻِمٛ اٛ اَادِلِيجٛ ندٜ جَٻِ دٛکّٜ مَاکٛ؞ کَدِمَا حٛولَارٜ ندٜنْ وَطِ کُوغَلْ مَاکٛ حَا حَنْدٜ اٜ مٜتَنَعٜنْ کٛو ندٜ اٛ مَايِ؞
5 نغَمْ اٜنٛکْ اٜ حٛولِي اَللَّه وَطِ اٛ حٛشَّا يَاکِ دٛوْ نغَمْ تٛع اٛ مَايَ؞ وَلَا غِيطٛمٛ کَدِنْ، نغَمْ اَللَّه حٛشِّيمٛ يَاکِ دٛوْ؞ ندٜنْ اَايَارٜ وِعِي، کٛ اٛ حٛشّٜىٰ يَاکِ دٛوْ، اٛ وٜلْنَنِي اَللَّه ٻٜرْندٜ؞
6 تٛ نَاع نٜطّٛ حٛولِي اَللَّه وَاوَتَا وٜلْنَنْکِمٛ ٻٜرْندٜ، نغَمْ کٛو مٛيٜ غَرَيْطٛ تٛ اَللَّه دٛولٜ جَٻَ اَللَّه اٜ طٛنْ، ندٜنْ اٜ مٛ وَاتَنَ طَٻِّتٛوٻٜمٛ؞
7 نغَمْ نُحُ اٜ حٛولِي اَللَّه وَطِ اٛ جَٻِ وَغِّنٛلْ اَللَّه دٛوْ کٛ وَرٛيْتَ يٜىٰسٛ طُمْ يِعَاکَ اٜ شَرٜلْ نغٜلْ؞ اٛ وَطِي کٛ اَللَّه وِعِ اٛ وَطِ کٛمِوَلْ نغَمْ اٛ حِسْنَ وُرٛ مَاکٛ؞ نٛنْ اٛ حٛلِّ يِمْٻٜ دُونِيَارُ نغَطِي کٛ وٛوطَا، اٛ بٛو وَرْتِي اَادِلِيجٛ لَاوٛلْ حٛولَاکِ اَللَّه؞
8 نغَمْ اِبْرَاهِمْ اٜ حٛولِي اَللَّه وَطِ اٛ جَٻِ ندٜ اَللَّه وِعِمٛ اٛ يَحَ لٜيْدِ ندِ وَطِ اَلْکَوَلْ حٛکُّکِمٛ؞ اِبْرَاهِمْ اَلِ لٜيْدِ مُوطُمْ کٛو ندٜ اَنْدَا تٛ يَحَتَ؞
9 نغَمْ اٜ مٛ حٛولِي اَللَّه وَطِ اٛ جٛوطِي بٛ کٛطٛ اٜ لٜيْدِ ندِ اٛ وَطَنَا اَلْکَوَلْ؞ اٛ جٛوطِي ندٜرْ لُکُرُ؞ نٛنْ مَا اِشِيَاکُ اٜ يَاکُبُ نغَطِي دٛنُدُٻٜ اَلْکَوَلْ نغَلْ اٜ مَاکٛ؞
10 اِبْرَاهِمْ وَطِي نٛنْ نغَمْ اٛ حَاٻِي اٛ يِعَ غَرِيرِ تَبِتَيْندِ ندِ اَللَّه سِرْيِي، مَحِ؞
11 نغَمْ اِبْرَاهِمْ اٜ حٛولِي اَللَّه وَطِ اٛ حٜٻِ ٻِطّٛ، کٛو ندٜ اٛ نَوْيِ؞ سَارَتُ دٜبّٛ مَاکٛ بٛو دَݧَتَا؞ اٛ حٜٻِي ٻِطّٛ اٛنْ نغَمْ اٛ حٛولَکٜ اَللَّه حٜبِّنَيْ اَلْکَوَلْ مُوطُمْ؞
12 نغَمْ نٛنْ، دَغَ اٛعٛ نٜطّٛ غٛعٛتٛ نَيٜىٰجٛ ٻَدِيطٛ مَايَ، طُمْ حٜٻِي ٻِٻّٜ ٻِٻّٜىٰجِ طُطْٻٜ بٛ کٛودٜ دٛوْ، بٛ نجَارٜىٰندِ دَاندٜ مَايٛ ندِ لِمَتَاکٛ؞
13 يِمْٻٜ ٻٜعٜ فُو مَايِي اٜ کٛولِي اَللَّه؞ ٻٜ کٜٻَايِ اَلْکَوَلْ نغَلْ، اَمَّا ٻٜ کَيْنَکٜنغَلْ ٻٜ نَنِي بٜلْطُمْ مَاغَلْ؞ ٻٜ مبِعِي اٜ نجَيْرِ ٻٜ حٛٻّٜ ٻٜ غَرْٻٜ ندٜرْ دُونِيَارُ ندُعُ؞
14 فُو بِيٻٜ نٛنْ، ٻٜ کٛلِّي اٜ ٻٜ طَٻِّتَ لٜيْدِ ندِ کٛعٜ مَٻّٜ؞
15 دَا طُمْ وِعَ ٻٜ نغَطِي کَ ݧُمُکِ دٛوْ لٜيْدِ ندِ ٻٜ اَلٛيِ، دَا ٻٜ کٜٻِي لَاوٛلْ سٛعَّاکِ؞
16 اَمَّا ٻٜ نغَطِي ٻٜرْطٜ مَٻّٜ دٛوْ لٜيْدِ ٻُرْندِ وٛوطُکِ، وَاتٛ ندِ تٛنْ دٛوْ؞ نغَمْ نٛنْ، نَاع طُمْ شٜمْتِنِيطُمْ تٛ اَللَّه طُمْ نٛدَّمٛ اَللَّه مَٻّٜ، نغَمْ اٛ سِرْيَنَکٜٻٜ غَرِيرِ؞
17 نغَمْ اِبْرَاهِمْ اٜ حٛولِي اَللَّه وَطِ اٛ سِرْيِي سَکَّنْکِ اَللَّه ٻِطّٛ مَاکٛ اِشِيَاکُ ندٜ اَللَّه فٛوندِمٛ؞ کَنْکٛ غَطَنَاطٛ اَلْکَوَلْ اٜ مٛ حَادٜ سَکُّکِ ٻِطّٛ مَاکٛ بَجّٛ
18 کٛو ندٜ اَللَّه وِعِينٛمٛ، «بَرْکَ اِشِيَاکُ کٜٻَتَا ٻِٻّٜ ٻِٻّٜىٰجِ ٻٜ نغَطَنْمَامِ اَلْکَوَلْ؞»
19 اِبْرَاهِمْ تَبِّتِنِي اَللَّه وَاوَيْ اُمِّنْکِ مَيْطٛ؞ بٛو طُمْ وَاوَيْ طُمْ وِعَ، طُمْ حٛکِّتِي اِبْرَاهِمْ اِشِيَاکُ دَغَ مَيْدٜ؞
20 نغَمْ اِشِيَاکُ اٜ حٛولِي اَللَّه وَطِ اٛ بَرْکِطِنِ يَاکُبُ اٜ اِسَوْ نغَمْ يٜىٰسٛ؞
21 نغَمْ يَاکُبُ اٜ حٛولِي اَللَّه وَطِ ندٜ اٛ ٻَدِي مَيْدٜ، اٛ بَرْکِطِنِ ٻِٻّٜ اِسُفُ غٛعٛتٛ‑غٛعٛتٛ؞ اٛ ٻَغِّ سَوْرُ ندُ اٛ يَحِرْتَ، اٛ مَوْنِنِ اَللَّه؞
22 نغَمْ اِسُفُ اٜ حٛولِي اَللَّه وَطِ ندٜ اٛ ٻَدِي مَيْدٜ، اٛ مٜتِ دٛوْ وُرْتَاکِ يِمْٻٜ اِسْرَاعِيلَ دَغَ لٜيْدِ مَسَرْ، اٛ وِعِٻٜ نٛ ٻٜ نغَادَتَ اٜ پِعٜ مَاکٛ؞
23 نغَمْ دَݧٛوٻٜ مُوسَ اٜ کٛولِي اَللَّه وَطِ ٻٜ شُوطِمٛ لٜبِّ تَتِ غَطَ اٛ دَݧَامَ، نغَمْ ٻٜ نغِعِي اٛ ٻِطّٛ بٛطّٛ، ٻٜ کُلَايِ وَݧُکِ کٛ لَامِيطٛ وِعِ طُمْ وَطَ؞
24 نغَمْ مُوسَ اٜ حٛولِي اَللَّه وَطِ ندٜ اٛ مَوْنِ اٛ وَݧِ اٛ نٛدِّرٜىٰ ٻِطّٛ ٻِي فِرعَوْنَ دٜبّٛ؞
25 اٛ سُٻِي اٛ يَرْدَ تٛرَّ اٜ يِمْٻٜ اَللَّه دٛوْ اٛ نَنَ بٜلْطُمْ حَکّٜ نغَمْ شَرٜلْ سٜطَّ؞
26 اٛ يِعِي سٜمْتِنٜىٰکِ نغَمْ اَلْمَسِيحُ طُمْ رِسْکُ ٻُرْطُمْ جَوْدِ لٜيْدِ مَسَرْ، نغَمْ حَکِّيلٛ مَاکٛ اٜ دٛوْ مبَرْجَارِ ندِ اٛ حٜٻَتَ يٜىٰسٛ؞
27 نغَمْ مُوسَ اٜ حٛولِي اَللَّه وَطِ اٛ اَلِ لٜيْدِ مَسَرْ، اٛ حُلَايِ مٛنّٜرٜ لَامِيطٛ لٜيْدِ ندِنْ؞ اٛ وَݧِ اٛ سٛعّٛ نغَمْ اٛ يِعِي اَللَّه مٛ يِعَتَاکٜ؞
28 نغَمْ اٜ مٛ حٛولِي اَللَّه وَطِ اٛ فُطِّ حُمْتٛ سَکِّنْکِ؞ اٛ وِعِ اِسْرَاعِيلَنْکٛعٜنْ مِسَنَ دَمُّطٜ مَٻّٜ پِيپَمْ، نغَمْ تٛع مَلَاعِکَاجٛ مَيْدٜ وَرَ فُو وٛرْٻٜ اَفٛعٜنْ مَٻّٜ؞
29 نغَمْ اِسْرَاعِيلَنْکٛعٜنْ اٜ کٛولِي اَللَّه وَطِ ٻٜ مبَاوِ حُولُکِ مَايٛ وٛطٜوٛ بٛ دٛوْ لٜيْدِ نجٛرْندِ؞ اَمَّا ندٜ مَسَرَنْکٛعٜنْ کُولَيْ، ندِيَمْ ݧَامِٻٜ؞
30 نغَمْ اِسْرَاعِيلَنْکٛعٜنْ اٜ کٛولِي اَللَّه وَطِ مَادِ ڤِلِيندِ غَرِيرِ جٜرِيکٛ يَنِ غَطَ ٻٜ ڤِلَکٜندِ بَلْطٜ جٛوٜىٰطِطِ؞
31 نغَمْ رَحَبْ کَارُوَاجٛ اٜ حٛولِي اَللَّه وَطِ اٛ وَرْدَاکَ اٜ ٻٜنْ طٛنْ غَݧُٻٜ نغَطَ کٛ اَللَّه وِعِ، نغَمْ اٛ جَٻَّکٜ اِسْرَاعِيلَنْکٛعٜنْ بٛطُّمْ دَارٛوٻٜ سِرُّ لٜيْدِ؞
32 طُمٜ ٻٜيْدَيْمِ وِيکِ؟ وَلَا شَرٜلْ کٜپَيْنغٜلْيَمْ مِ مٜتَ دٛوْ غِدِيٛنْ، اٜ بَرَکْ، اٜ سَمْسِنْ، اٜ جٜڤْتَ، اٜ دَوْدَ، اٜ سَمَاعِلَ، اٜ اَنَّبٛعٜنْ،
33 نغَمْ اٜ ٻٜ کٛولِي اَللَّه وَطِ ٻٜ کٛنِ لٜيْطٜ طُطّٜ ٻٜ ݧَامِطٜ؞ ٻٜ لَامٛرَکٜ اَادِلَاکُ، ٻٜ کٜٻِ کٛ اَللَّه وَطِ اَلْکَوَلْ؞ ٻٜ مَٻِّي کٛنْدُطٜ شٜمْبِطِّ؞
34 ٻٜ ݧِفِي حِيتٜ کَلُّنغٜ، ٻٜ ندَطِي وَرْدٜىٰکِ اٜ کَافَاجٜ؞ ٻٜ تَمْڤُٻٜ، اَمَّا ٻٜ نغَرْتِي شٜمْبِطْٻٜ؞ ٻٜ نغَرْتِي وَوْٻٜ کٛنُ، ٻٜ ندِيوِي سٛوجِعٜنْ غٛطّٜ لٜيْطٜ؞
35 نغَمْ وٛٻّٜ رٜوْٻٜ مَايَنَاٻٜ اٜ کٛولِي اَللَّه وَطِ مَيْٻٜ ٻٜنْ اُمِّنَا دَغَ مَيْدٜ؞
وٛٻّٜ يِمْٻٜ بٛو ٻٜ تٛرَّا حَا ٻٜ مَايِ، ٻٜ نغَݧِي طُمْ يٛوفَٻٜ نغَمْ ٻٜ کٜٻَ ٻٜ اُمِّنٜىٰ دَغَ مَيْدٜ ندٜرْ جٛنْدٜ ٻُرْندٜ وٛوطُکِ؞
36 وٛٻّٜ نجُکِّتَامَ ڤِيَامَ، حَا ٻٜ کَٻِّرَا ٻٛغِّ نجَمْندِ ٻٜ مَٻَّا ندٜرْ سُودُ شُرَلْ؞
37 وٛٻّٜ مبَرِرَا کَاپٜ، وٛٻّٜ تَپَا شٜنْدَا طِطِ، وٛٻّٜ مبَرِرَا کَافَاجٜ؞ وٛٻّٜ اٜ نغِيلٛو اٜ ٻٛرْنِي لَرٜ بَالِ اٜ طٜ بٜعِ، کٛو کٛ ٻٜ نغٛودِ، ٻٜ تٛرَّامَ، ٻٜ نغَطَنَامَ کٛ حَلِّ؞
38 اٜ ٻٜ نغِيلٛو ندٜرْ لَدّٜ اٜ ندٜرْ کٛشّٜىٰجٜ، اٜ ٻٜ نجٛوطٛو ندٜرْ لُورٛوجِ کَاپٜ اٜ ندٜرْ غَيْطٜ؞ دُونِيَارُ حٜوْتَايِ ٻٜ نجٛوطٛو ندٜرْ مَيْرُ؞
39 فُو يِمْٻٜ ٻٜعٜ ٻٜ مَنْتَامَ نغَمْ ٻٜ کٛولَکٜ اَللَّه، اَمَّا فُو اٜ نٛنْ وَلَا غٛطّٛ ندٜرْ مَٻّٜ کٜٻُطٛ کٛ اَللَّه وَطِ اَلْکَوَلْ؞
40 اَللَّه سِرْيَکٜ غٛطُّمْ ٻُرْطُمْ وٛوطُکِ نغَمْ مٜىٰطٜنْ، نغَمْ تٛ نَاع حَوْتِ اٜ مٜىٰطٜنْ، ٻٜ نغَرْتِرْتَاکٜ کٜىٰوُٻٜ؞