2
کِسْندَمْ مَوْطَمْ
1 نغَمْ مَاجُمْ دٛولٜ نغَطٜنْ فُو حَکِّيلٛ مٜىٰطٜنْ دٛوْ کٛ نَنْطٜنْ، نغَمْ تٛع شٜلٜنْ دَغَ تٛکُّکِطُمْ؞
2 حَالَ کَ طُمْ مٜتِ دَغَ کٛنْدُطٜ مَلَاعِکَعٜنْ کَ تَبِّتِنَامَ، ندٜنْ کٛو مٛيٜ غَݧُطٛ تٛکَّکَ حٜٻِي تٛرَّ نٛ حَانَنِمٛ؞
3 تٛ طُمْ نٛنْ، نٛ وَطَتَ ندَطٜنْ تٛ اٜنْ نغَطَايِ حَکِّيلٛ مٜىٰطٜنْ دٛوْ کِسْندَمْ طَعَمْ مَوْطَمْ؟ جٛومِرَاوٛ اَرْتِي مٜتُکِ دٛوْ مَاجَمْ، ندٜنْ ٻٜنْ طٛنْ نَنْٻٜمٛ تَبِّتِنَنِيمِنْ وِيکِ طُمْ غٛونغَ؞
4 نٛنْ مَا اَللَّه تَبِّتِنِيطُمْ اٜ اَلَامَاجِ، اٜ کُوطٜ کَيْطِنِيطٜ فٜىٰرٜ‑فٜىٰرٜ، اٜ حٛکُّکِ رُوحُ مَاکٛ نٛنْ نٛ اٛ يِطِرِ؞
اَرْدِيطٛ کِسْندَمْ
5 دُونِيَارُ غَرَيْندُ ندُ مِنْ مٜتَتَ، نَاع مَلَاعِکَعٜنْ اَللَّه وَطِ لَامٛوندُ؞
6 اَمَّا اٜ وٛودِ اَايَارٜ تٛ طُمْ وِعِ،
«يَا اَللَّه، نٜطّٛ طُمْ طُمٜ حَا ݧُمَتَا دٛوْ مَاکٛ؟
ٻِي نٜطّٛ اٛ مٛيٜ حَا اَ فَامَنَمٛ؟
7 اَ لٜسْتِنِيمٛ لٜيْ مَلَاعِکَعٜنْ نغَمْ شَرٜلْ سٜطَّ،
اَمَّا غَطَ طٛنْ اَ حٛکِّيمٛ تٜدُّنغَلْ اٜ مَنْغُ،
8 اَ وَطِي کٛو طُمٜ لٜيْ لَامُ مَاکٛ؞»
ندٜ اَللَّه وَطِ کٛو طُمٜ لٜيْ لَامُ مَاکٛ، اَلَايِ غٛطُّمْ طُمْ وَلَا لٜيْ لَامُ مَاکٛ؞ فُو اٜ نٛنْ، حَا جٛونِ اٜنْ نغِعَايِ کٛو طُمٜ فُو لٜيْ لَامُ مَاکٛ؞
9 شَرٜلْ سٜطَّ طُمْ حٛکِّ يٜىٰسُ مَنْغُ طُمْ حٜوْتَايِ طُمْ مَلَاعِکَعٜنْ؞ اَمَّا جٛونِ اٜنْ نغِعِي اٛ حٛکَّامَ تٜدُّنغَلْ اٜ مَنْغُ نغَمْ تٛرَّ مَيْدٜ کَ اٛ يَرِ، نغَمْ بَرْکَ يِدّٜ اَللَّه اٛ مَايَ نغَمْ کٛو مٛيٜ؞
10 اَللَّه تَغِ کٛو طُمٜ، کَنْکٛ فَامَنْتَ کٛو طُمٜ؞ اٛ وَطِي کٛ حَانِ ندٜ اٛ وَرْتِرِ يٜىٰسُ کٜوْطٛ لَاوٛلْ تٛرَّ کَ يَرِ، نغَمْ اٛ وَدَّ يِمْٻٜ طُطْٻٜ تٛ تٜدُّنغَلْ مَاکٛ؞ يٜىٰسُ وٛنِ مَٻُّتُطٛ لَاوٛلْ کِسْندَمْ تٛکِّنٛووٛٻٜ لَاوٛلْ نغٛلْ ٻٜ کِسَ؞
11 لٛوتَنٛووٛ يِمْٻٜ حَکّٜ، کَنْکٛ اٜ ٻٜنْ طٛنْ لٛوتَنَاٻٜ ٻٜ فُو ݧَاکٛ مَٻّٜ اٛ غٛعٛتٛ؞ کَنْجُمْ وَطِ يٜىٰسُ نَنَتَا شٜمْتُطُمْ نٛدِّرْکِٻٜ مِݧِرَاٻٜ مُوطُمْ؞
12 اٛ وِعِي اَللَّه،
«مِ وِعَيْ مِݧِرَاٻٜ اَمْ کُوطٜ طٜ نغَطَّا،
مِ مَنْتٜتٜ ندٜرْ کَوْتَلْ مَٻّٜ؞»
13 کَدِنْ اٛ وِعِي، «مِ حٛولٛتٛ اَللَّه؞» ندٜنْ کَدِنْ اٛ وِعِي، «رَمِّ طٛعٛ اٜ ٻِٻّٜ ٻٜ اَللَّه حٛکِّيَمْ؞»
14 ندٜ ٻِٻّٜ ٻٜنْ ٻٜ غٛودُٻٜ ٻَنْدُ اٜ پِيپَمْ، يٜىٰسُ اٜ حٛورٜ مُوطُمْ وَرْتِي نٜطّٛ بٛ مَٻّٜ؞ اٛ وَطُ نٛنْ نغَمْ بَرْکَ مَيْدٜ مَاکٛ اٛ حَلْکَ اٛنْ طٛنْ جٛغِيطٛ بَوْطٜ مَيْدٜ، وَاتٛ شٜيْطَنْ؞
15 نٛنْ اٛ يٛوفِرِ يِمْٻٜ ٻٜ کُلٛلْ مَيْدٜ حَٻِّ کٜىٰرٛلْ بَلْطٜ مَٻّٜ؞
16 اٜنْ تَبِّتِنِي نَاع مَلَاعِکَعٜنْ اٛ وَلِّ، اَمَّا ٻِٻّٜ ٻِٻّٜىٰجِ اِبْرَاهِمْ اٛ وَلِّ؞
17 نغَمْ مَاجُمْ دٛولٜ اٛ وَرْتِرَا نٜطّٛ اٜ کٛو نغٛلٜ لَاوٛلْ، نغَمْ اٛ وَرْتَ مَوْطٛ مَوْٻٜ اَرْدِيطٛ دِينَ مٛ غٛونغَ غٛودُطٛ يُرْمٜىٰندٜ ندٜرْ کُوغَلْ اَللَّه نغَمْ حَکّٜ يِمْٻٜ نجَافٜىٰ؞
18 ندٜ کَنْکٛ اٜ حٛورٜ مَاکٛ اٛ تٛرَّکٜ ندٜ اٛ فٛونْدَا، اٜ مٛ وَاوِ وَلُّکِ فٛوندٜتٜىٰٻٜ؞