4
وَادُکِ حِغَاکُ اٜ دُونِيَارُ
1 کٛ وَدَّتَ حَوْرٜ اٜ يٜدّٛوتِرْکِ حَکُّندٜ مٛوطٛنْ؟ نَاع سُونٛوجِ کٛنِدٛوجِ اٜ ٻٜرْطٜ مٛوطٛنْ وَدَّتَطُمْ؟
2 اٛنْ نغِطِي غٛطُّمْ، اٛنْ کٜٻَتَاطُمْ، نغَمْ نٛنْ اٛنْ نغَطَ وَرْحٛورٜ؞ اٛنْ نغٛودِ سُونٛ فِي طُمْ اٛنْ جٜيَايِ، اَمَّا اٛنْ کٜٻَتَاطُمْ؞ کَنْجُمْ وَطِ اٛنْ کَٻَ اٛنْ نغٜدّٛوتِرَ؞ اٛنْ نغَلَنَا نغَمْ اٛنْ تٛرَاکِ اَللَّه؞
3 اٛنْ تٛرٛو اٛنْ کٜٻَتَا نغَمْ اٛنْ تٛرٛرٛو ݧُمٛوجِ کَلُّطِ، اٛنْ نغِطِ مَجِّنٛنْ کٛ کٜٻْطٛنْ دٛوْ نَنْکِ بٜلْطُمْ ٻَلِّ مٛوطٛنْ؞
4 اٛنْ ݧَامٛوٻٜ اَمَانَ! اٛنْ اَنْدَا وَادُکِ حِغَاکُ اٜ دُونِيَارُ طُمْ وَݧُکِ اَللَّه؟ نغَمْ نٛنْ، فُو شُٻُطٛ وَادَ حِغَاکُ اٜ دُونِيَارُ، اٛ وَرْتِرِي حٛورٜ مَاکٛ غَݧٛ اَللَّه؞
5 کٛو اٛنْ کَمِّي اٜ مٜىٰرٜ اَايَارٜ وِعِ، «اَللَّه اٜ وٛودِ لَوْلِيرُ دٛوْ يٛنْکِ کِ اٛ وَطِ ندٜرْ مٜىٰطٜنْ؟»
6 اَمَّا اَللَّه اٜ ٻٜيْدَ وَلُّکِعٜنْ؞ کَنْجُمْ وَطِ اَايَارٜ وِعِ، «اَللَّه وَݧِي غٛودُٻٜ مَنْغُ حٛورٜ، اَمَّا اٜ مٛ وَلَّ لٜسْنُٻٜ کٛعٜ؞»
7 نغَمْ نٛنْ، لٜسْنٜىٰ کٛعٜ مٛوطٛنْ نغَطٛنْ کٛ اَللَّه وِعِ؞ نغَݧٜىٰ کُوطٜ شٜيْطَنْ، کَنْکٛ بٛو اٛ دٛغَّيْعٛنْ؞
8 ٻَدّٛيٜىٰ حَادٜ اَللَّه، کَنْکٛ مَا اٛ ٻَدّٛتٛ حَادٜ مٛوطٛنْ؞ اٛنٛنْ غَطٛوٻٜ حَکّٜ، مٛعِّنٜىٰ جٛنْدٜ مٛوطٛنْ؞ لَاٻِنٜىٰ ٻٜرْطٜ مٛوطٛنْ، اٛنٛنْ غٛودُٻٜ ٻٜرْطٜ طِطِ؞
9 نغَنّٜىٰ، نغُلّٜىٰ، مبٛيٜىٰ؞ نغَيْلِتٜىٰ جَلٜىٰطٜ مٛوطٛنْ نغَرْتَ بٛجِّ، نَنُکِ بٜلْطُمْ مٛوطٛنْ وَرْتَ شِيَ نَنْکِ بٜلْطُمْ؞
10 لٜسْتِنٜىٰ کٛعٜ مٛوطٛنْ يٜىٰسٛ جٛومِرَاوٛ، کَنْکٛ بٛو اٛ مَوْنِنَيْعٛنْ؞
يٛوَنْکِ غٛطّٛ کٛ وٛوطَا
11 بَنْدِرَاٻٜ، تٛع اٛنْ مٜتِندِرْ حَالَاجِ کَلُّطِ؞ نغَمْ فُو مٜتُطٛ حَالَ کَلُّکَ دٛوْ بَنْدِرَاوٛ مُوطُمْ، کٛو يٛوَنِمٛ کٛ وٛوطَا، مٜتِي حَالَ کَلُّکَ دٛوْ دٛوکَ اَللَّه وٛنْ طٛنْ، يٛوَنِيطُمْ کٛ وٛوطَا؞ اَمَّا تَا يٛوَنِي دٛوکَ اَللَّه کٛ وٛوطَا، اَ وَرْتِي مٛ تٛکَّتَاکَ جٛوَنٛووٛکَ کٛ وٛوطَا؞
12 اَللَّه تَنْ وٛنِ کٛکّٛووٛ دٛوکَ اٜ غَطٛووٛ کِيتَ؞ کَنْکٛ تَنْ وٛنِ بَاوَيْطٛ حِسْنُکِ اٜ حَلْکُکِ؞ اَمَّا اَنْ اَ مٛيٜ ندٜ نجٛوَنْتَا بَنْدِرَاوٛ مَاطَ کٛ وٛوطَا؟
مَنْتٛرَاکِ جَانغٛ
13 نَنٜىٰيَمْ اٛنٛنْ وِعٛوٻٜ، «حَنْدٜ کٛو جَانغٛ مِنْ نجَحَيْ ندِعِ غَرِيرِ کٛو ندِنْ تٛنْ، مِنْ نغَطَ ندُنْغُ غٛعٛ تٛنْ مِنْ نغَطَ لُومٛ مِنْ کٜٻَ شٜىٰدٜ؞»
14 رَا بٛو اٛنْ اَنْدَا کٛ وَنْغَتَ جَانغٛ؞ نٛ يٛنْکِ مٛوطٛنْ وَعِ؟ يٛنْکِ مٛوطٛنْ اٜ نَنْدِ اٜ شُرْکَ وَنْغٛوحَ نغَمْ شَرٜلْ سٜطَّ، غَطَ طٛنْ کَ مَجِّتَ؞
15 سٜيْ نِ مبِعٛنْ، «تٛ جٛومِرَاوٛ جَٻِي يَارِي يٛنْکِ، مِنْ نغَطَيْ طُعُمْ اٜ طُمْ طَاعٜ؞»
16 اَمَّا رَطُّمْ جٛونِ ندٜرْ مَوْنِنْکِ کٛعٜ مٛوطٛنْ اٛنْ مَنْتِتٛو؞ فُو اِرِ کِنْ طٛنْ مَنْتِتَاکِ کِ کَلُّکِ؞
17 نغَمْ نٛنْ فُو اَنْدُطٛ کٛ حَانِ وَطَ، اَمَّا اٛ وَطَايِطُمْ، اٛ وَطِي حَکّٜ؞