2
دَݧْنغٛلْ يٜىٰسُ
1 شَرٜلْ کٛ يَحَيَ غَطٛووٛ بَڤْتِسْمَ دَݧَا، مَوْطٛ لَامِيٻٜ لٜيْطٜ رٛومَ بِعٜتٜىٰطٛ کَيْسَرْ اَغُسْتُسْ وِعِ وٛنْٻٜ ندٜرْ لَامُ رٛومَ فُو طُمْ وِنْدَ اِنْطٜ مَٻّٜ؞
2 کَنْکِ وٛنِ وِنْدُکِ اَرَنْدٜحِ کِ طُمْ وَطِ شَرٜلْ کٛ کِرِينِيُسْ وٛنِ غٛمْنَاجٛ لٜيْدِ سِيرِيَ؞
3 کٛو مٛيٜ يَحِ تٛ لٜݧٛلْ مُوطُمْ پِوٛيِ نغَمْ طُمْ وِنْدَ اِنْدٜ مُوطُمْ؞
4 سٜيْ يُسُفُ مَا اُمِّي دَغَ غَرِيرِ نَجَرَتْ ندٜرْ لٜيْدِ غَلِيلِ؞ اٛ يَحِ غَرِيرِ تٛ دَوْدَ دَݧَا بِعٜتٜىٰندِ بَيْتَلَامِ نغٛنْدِ ندٜرْ لٜيْدِ يَحُودِيَ، نغَمْ کَنْکٛ دَغَ لٜݧٛلْ دَوْدَ؞
5 اٛ يَحُ تٛنْ نغَمْ طُمْ وِنْدَ اِنْدٜ مَاکٛ، کَنْکٛ اٜ مَرْيَامَ، مٛ طُمْ وَطَنِمٛ اَلْکَوَلْ تٜىٰغَلْ؞ مَرْيَامَ اٛنْ اٜ وٛودِ رٜىٰدُ؞
6 اٜ ٻٜ ندٜرْ بَيْتَلَامِ، سٜيْ شَرٜلْ دَݧْنغٛلْ مَاکٛ وَطِ؞
7 سٜيْ اٛ دَݧِ ٻِطّٛ غٛرْکٛ، اَفٛ مَاکٛ، اٛ سَاوِمٛ ندٜرْ وُدٜرٜ وٛوطُندٜ، اٛ فُکِّنِمٛ ندٜرْ تٛ طُمْ وَطَنْتَ مَرْلٜ ݧَمْندُ، نغَمْ وَلَا نجَيْرِ ندٜرْ سُودُ حٛٻّٜ؞
مَلَاعِکَعٜنْ وَنْغَنِي وٛيْنَاٻٜ
8 اٜ وٛودِ وٛيْنَاٻٜ حَادٜ طٛنْ اٜ ٻٜ مبَالَ يَاسِ، اٜ ٻٜ ندٜىٰنَ مَرْلٜ مَٻّٜ جٜمَّ؞
9 سٜيْ مَلَاعِکَاجٛ جٛومِرَاوٛ وَنْغَنِٻٜ ندٜرْ تٜدُّنغَلْ جٛومِرَاوٛ، کُلٛلْ نَنْغِٻٜ؞
10 اَمَّا مَلَاعِکَاجٛ اٛنْ وِعِٻٜ، «تٛع اٛنْ کُلُ! مِ وَدَّنِيعٛنْ حَبَرُ ٻُرْطُمْ وٜلْکِ نغَمْ کٛو مٛيٜ؞
11 حَنْدٜ ندٜرْ غَرِيرِ دَوْدَ طُمْ دَݧَنِيعٛنْ کِسْنٛووٛ، کَنْکٛ وٛنِ اَلْمَسِيحُ، جٛومِرَاوٛ؞
12 رَا نٛ کٜٻْتِرْتٛنْمٛ، اٛنْ تَوَيْ ٻِنْغٜلْ اٜ سَاوَا ندٜرْ وُدٜرٜ، ندٜنْ اٜ نغٜلْ فُکِّنَا ندٜرْ تٛ طُمْ وَطَنْتَ مَرْلٜ ݧَمْندُ؞»
13 طٛنْ اٜ طٛنْ سٜيْ وٛٻّٜ مَلَاعِکَعٜنْ طُطْٻٜ وَنْغِ حَادٜ مَلَاعِکَاجٛ اٛنْ، اٜ ٻٜ مَوْنِنَ مَنْغُ اَللَّه، اٜ ٻٜ مبِعَ،
14 «اٜنْ مَوْنِنْ اَللَّه مٛ دٛوْ،
جَمْ جٛوطٛو ندٜرْ دُونِيَارُ اٜ دٛوْ يِمْٻٜ ٻٜ اٛ نَنَتَ بٜلْطُمْ مَٻّٜ؞»
15 ندٜ مَلَاعِکَعٜنْ ٻٜنْ شٛعِّي دٛوْ، سٜيْ وٛيْنَاٻٜ ٻٜنْ نغَطِ کَ مٜدُّکِ، اٜ ٻٜ مبِعَ، «اٜنْ نجَحُ بَيْتَلَامِ نغِعٜنْ فِي طُعُمْ طُمْ جٛومِرَاوٛ وِعِعٜنْ؞»
16 سٜيْ ٻٜ نجَوْطِي، ٻٜ نجَحِ، ٻٜ تَوِ مَرْيَامَ اٜ يُسُفُ اٜ ٻِنْغٜلْ نغٜلْ اٜ نغٜلْ فُکِّي ندٜرْ تٛ طُمْ وَطَنْتَ مَرْلٜ ݧَمْندُ؞
17 ندٜ ٻٜ نغِعِنغٜلْ، ٻٜ ندِلِّ، ٻٜ مبِعِ يِمْٻٜ کٛ مَلَاعِکَاجٛ وِعِٻٜ دٛوْ مَاغٜلْ؞
18 کٛ وٛيْنَاٻٜ ٻٜنْ مبِعِ کَيْطِنِي کٛو مٛيٜ نَنْطٛ؞
19 اَمَّا مَرْيَامَ بٛو اٜ جٛغِي کٛ نَنِ فُو ندٜرْ ٻٜرْندٜ مُوطُمْ، اٛ وَطِ کَ ݧُمُکِ دٛوْ مَاجُمْ؞
20 سٜيْ وٛيْنَاٻٜ ٻٜنْ شٛعِّي، اٜ ٻٜ مَوْنِنَ اَللَّه، اٜ ٻٜ مَنْتَمٛ نغَمْ کٛو طُمٜ کٛ ٻٜ نَنِ اٜ کٛ ٻٜ نغِعِ، نٛنْ نٛ طُمْ وِعِرِٻٜ؞
يٜىٰسُ وَطَنَامَ اِنْدٜ
21 ندٜ ٻِنْغٜلْ نغٜلْ وَطِ بَلْطٜ جٛوٜىٰتَتِ، طُمْ نَادِمٛ طُمْ حٛکِّمٛ اِنْدٜ يٜىٰسُ، اِنْدٜ ندٜ مَلَاعِکَاجٛ حٛکِّمٛ کٛ طُمْ وَطَ رٜىٰدُ مَاکٛ؞
طُمْ يَارِي يٜىٰسُ وُرٛ شٜنِينغٛ
22 غَطَ بَلْطٜ لٛوتَاکِ مَٻّٜ حٜىٰݧِ نٛ اَنَّبِ مُوسَ وِعِ ندٜرْ اَتَّوْرَ ٻٜ نغَطَ تٛ ٻٜ ندَݧِي، يُسُفُ اٜ مَرْيَامَ نجَارِ يٜىٰسُ اُرُشَلِيمَ يٜىٰسٛ جٛومِرَاوٛ؞
23 نٛنْ طُمْ وِنْدِرَا ندٜرْ اَتَّوْرَ، «کٛو مٛيٜ غٛرْکٛ اَفٛ، جٛومِرَاوٛ جٜيِمٛ؞»
24 ٻٜ شَکَّنِ اَللَّه نٛ طُمْ وِنْدِرَا ندٜرْ اَتَّوْرَ، «ڤٛولِ طِطِ کٛو بٛو تَتَّبَرَحٛيْ طِطٛيْ؞»
25 اٜ شَرٜلْ نغٜلْ اٜ وٛودِ غٛطّٛ نٜطّٛ ندٜرْ اُرُشَلِيمَ بِعٜتٜىٰطٛ سَامِنُ، اَادِلِيجٛ، کُلٛووٛ اَللَّه؞ اٛ حَاٻِي اٛ يِعَ غَرٛلْ اَلْمَسِيحُ نغَمْ حِسْنَ يِمْٻٜ اِسْرَاعِيلَ؞ رُوحُ اَللَّه اٜ وٛنْدِ اٜ مَاکٛ،
26 حٛلِّيمٛ اٛ مَايَتَا نَا اٛ يِعِي اَلْمَسِيحُ جٛومِرَاوٛ؞
27 رُوحُ اَللَّه يَارِمٛ ندٜرْ وُرٛ شٜنِينغٛ؞ سٜيْ مَرْيَامَ اٜ يُسُفُ نغَدّٛيِ يٜىٰسُ ندٜرْ وُرٛ نغٛنْ نغَمْ وَطَنْکِمٛ کٛ اَتَّوْرَ وِعِ؞
28 سَامِنُ جَٻِ ٻِنْغٜلْ نغٜلْ ندٜرْ جُوطٜ مُوطُمْ، ندٜنْ مَنْتِ اَللَّه، وِعِ،
29 «يَا جٛومِرَاوٛ، اَ حٜبِّنِي اَلْکَوَلْ مَاطَ؞
جٛونِ اَلُ مَشُّطٛ مَاطَ دِلَّ جَمْ؞
30 نغَمْ غِتٜ اَمْ نغِعِي کِسْنٛووٛ مٛ لِلٛيْطَا،
31 مٛ شِرْيَنِطَا لٜݧِ فُو؞
32 اٛ وَرْتَيْ بٛ جَيْنغٛلْ، اٛ حٛلَّيْ لٜݧِ دُونِيَارُ لَاوٛلْ مَاطَ،
اٛ وَطَيْ يِمْٻٜ مَاطَ يَحُودَنْکٛعٜنْ کٜٻَ مَنْغُ؞»
33 ݧَاکٛ ٻِنْغٜلْ نغٜلْ اٜ مَدُوجٛ مَاغٜلْ ٻٜ کَيْطِنِ اٜ کٛ طُمْ وِعِ دٛوْ مَاغٜلْ؞
34 سٜيْ سَامِنُ بَرْکِطِنِٻٜ، ندٜنْ اٛ وِعِ مَرْيَامَ، مَدُوجٛ يٜىٰسُ، «ٻِنْغٜلْ نغٜعٜلْ وَرْتَيْ طَتَلْ يَنُکِ طُطْٻٜ اٜ اُمَّاکِ طُطْٻٜ ندٜرْ لٜيْدِ اِسْرَاعِيلَ؞ نغٜلْ وَرْتَيْ اَنْدِتِرْطُمْ دَغَ اَللَّه طُمْ يِمْٻٜ طُطْٻٜ نغَݧَتَ؞
35 ٻِطّٛ اٛعٛ وَنْغِنَيْ ݧُمٛوجِ يِمْٻٜ شُوطِيطِ؞ اَنْ مَا، ٻٜرْندٜ مَاطَ نَاوَيْ بٛنٛ کَافَحِ تُفِندٜ؞»
36 طٛنْمَا اٜ وٛودِ اَنَّبِيجٛ دٜبّٛ بِعٜتٜىٰطٛ حَنَّتُ ٻِي فَانُوٜلْ، پِوٛيْطٛ دَغَ لٜݧٛلْ اَاشِرُ؞ دٜبّٛ اٛنْ اٛ نَيٜىٰجٛ، اٛ جٛوطٛدَکٜ اٜ غٛرْکٛ مَاکٛ دُوٻِ جٛوٜىٰطِطِ، ندٜنْ غٛرْکٛ اٛنْ مَايِي؞
37 غَطَ غٛرِيکٛ مَايِ، اٛ جٛوطِي اٛ تٜعَاکَ حَا دُوٻِ مَاکٛ نغَطِ 48؞ کٛو ندٜيٜ اٜ مٛ يَحَ وُرٛ شٜنِينغٛ اٜ مٛ مَوْنِنَ اَللَّه، اٜ مٛ سُومٛو، اٜ مٛ وَطَ دٛعَارٜ جٜمَّ اٜ ݧَلَوْمَ؞
38 اٜ شَرٜلْ نغٜلْ، اٛ وَرٛيِ تٛ مَٻّٜ، اٛ يٜتِّ اَللَّه، اٛ يَحِ تٛ کَاٻُٻٜ يِعُکِ شَرٜلْ کٛ اَللَّه رِمْطِنْتَ اُرُشَلِيمَ، اٛ حٛکِّٻٜ حَبَرُ دٛوْ ٻِنْغٜلْ نغٜلْ؞
دَݧٛوٻٜ يٜىٰسُ شٛعَّکٜ نَجَرَتْ
39 ندٜ يُسُفُ اٜ مَرْيَامَ نجٛتِّنِ کٛو طُمٜ کٛ اَتَّوْرَ وِعِ طُمْ وَطَ، ٻٜ شٛعِّي غَرِيرِ مَٻّٜ نَجَرَتْ ندٜرْ لٜيْدِ غَلِيلِ؞
40 يٜىٰسُ مَوْنِ، سٜمْبِطِ، فَامُ حٜىٰوِمٛ، ندٜنْ بَرْکَ اَللَّه اٜ دٛوْ مَاکٛ؞
يٜىٰسُ ندٜرْ وُرٛ شٜنِينغٛ
41 کٛو طُمٜ ندُنْغُ دَݧٛوٻٜ يٜىٰسُ اٜ نجَحَ اُرُشَلِيمَ نغَمْ حُمْتٛ سَکِّنْکِ؞
42 ندٜ يٜىٰسُ وَطِ دُوٻِ سَڤّٛ اٜ طِطِ، ٻٜ نجَحِ حُمْتٛ نٛ ٻٜ مبٛووِ؞
43 غَطَ حُمْتٛ نغٛنْ حٜىٰݧِ، دَݧٛوٻٜ مَاکٛ اٜ دٛوْ طَتَلْ حٛوتُکِ وُرٛ، يٜىٰسُ بٛو دَرِي ندٜرْ اُرُشَلِيمَ، اَمَّا دَݧٛوٻٜ ٻٜنْ اَنْدَا اٛ دَرَکٜ؞
44 اٜ ٻٜ کَمِّي اٜ مٛ ندٜرْ ٻٜ ٻٜ نجَادَتَ، ٻٜ نغَطِ يَادُ ݧَلْندٜ غٛعٛ، ندٜنْ ٻٜ ڤُطِّ طَٻُّتُکِمٛ ندٜرْ بَنْدِرَاٻٜ مَٻّٜ اٜ حِغٛوٻٜ مَٻّٜ؞
45 ندٜ ٻٜ طَٻِّتِ ٻٜ کٜٻْتَايِمٛ، ٻٜ شٛعِّي اُرُشَلِيمَ نغَمْ طَٻُّتُکِمٛ؞
46 ندٜرْ ݧَلْندٜ تَتَوْرٜ ٻٜ تَوِمٛ ندٜرْ وُرٛ شٜنِينغٛ، اٜ مٛ جٛوطِي حَکُّندٜ مٛودِٻّٜ، اٜ مٛ نَنَٻٜ، ندٜنْ اٜ مٛ پَمَٻٜ؞
47 نَنْطٛمٛ فُو حَيْطِنِ اٜ فَامُ مَاکٛ اٜ نٛوتَاکِ مَاکٛ؞
48 ندٜ دَݧٛوٻٜ مَاکٛ نغِعِمٛ، ٻٜ کَيْطِنِ؞ مَدُوجٛ مَاکٛ وِعِمٛ، «ٻِطّٛ اَمْ، کٛ وَطِ نغَطَنْطَامِنْ نِينِ؟ مِنْ اٜ ݧَاکٛ مَاطَ ندٜ مِنْ طَٻِّتِ مِنْ نغِعَايِمَ، مِنْ نغَنِّي؞»
49 اٛ وِعِٻٜ، «کٛ وَطِ طَٻِّتٛتٛيْيَمْ؟ اٛنْ اَنْدَا اٜ حَانِ مِ جٛوطٛو ندٜرْ وُرٛ ݧَاکٛ اَمْ؟»
50 اَمَّا ٻٜ فَامَايِ کٛ اٛ وِعِٻٜ؞
51 سٜيْ يٜىٰسُ سٛعّٛدِي اٜ مَٻّٜ نَجَرَتْ، اٜ مٛ وَطَ کٛ ٻٜ مبِعِمٛ فُو؞ مَدُوجٛ مَاکٛ جٛغِي فِي طُعُمْ فُو ندٜرْ ٻٜرْندٜ مُوطُمْ؞
52 يٜىٰسُ مَوْنِ، ٻٜيْدِ فَامُ اٜ حٜٻُکِ يِدّٜ دَغَ تٛ اَللَّه اٜ تٛ يِمْٻٜ؞