12
مِسَالُ دٛوْ غُپِيٻٜ نغٜسَ اِنَبٛوجٜ
1 سٜيْ يٜىٰسُ فُطِّ مٜتِرَنْکِٻٜ اٜ مِسَالُ، وِعِ، «غٛطّٛ نٜطّٛ وَطِ نغٜسَ اِنَبٛوجٜ، اٛ حٛوِکَ، اٛ وَسِ نغَيْکَ مَوْکَ ندٜرْ تَفَارٜ نغَمْ مٛيْلُکِ ندِيَمْ دَغَ ندٜرْ اِنَبٛوجٜ طٜنْ، اٛ مَحِ سُودُ تٛوْندُ نغَمْ رٜىٰنُکِ نغٜسَ کَنْ؞ سٜيْ اٛ حٛکِّکَ وٛٻّٜ رٜمٛوٻٜ مٛعِّنَکَ، اٛ دِلِّ وٛنْدِ لٜيْدِ؞
2 ندٜ شَرٜلْ ٻٜنْدُکِ اِنَبٛوجٜ طٜنْ وَطِ، اٛ لِلِ مَشُّطٛ مَاکٛ تٛ يِمْٻٜ ٻٜ اٛ حٛکِّ نغٜسَ کَنْ نغَمْ اٛ جَٻَنٛيَمٛ کٛ ٻٜ نغَادُنٛو ندٜرْ کٛ ٻٜنْدِ؞
3 اَمَّا ٻٜ نَنْغِ مَشُّطٛ اٛنْ، ٻٜ ڤِيِمٛ، ٻٜ ندِيوِمٛ کٛو کٛ ٻٜ کٛکِّمٛ؞
4 سٜيْ جٛومُ نغٜسَ اٛنْ فُطِّتِ لِلِ غٛطّٛ مَشُّطٛ تٛ مَٻّٜ، کَنْکٛ مَا ٻٜ ڤِيَنِمٛ حٛورٜ، ٻٜ کُطِکُطِنِمٛ؞
5 سٜيْ اٛ فُطِّتِ اٛ لِلِ غٛطّٛ مَشُّطٛ، کَنْکٛ بٛو ٻٜ مبَرِمٛ؞ اٛ لِلِلِلِنِي مَشُّٻٜ طُطْٻٜ؞ ٻٜ ڤِيِ وٛٻّٜ، ٻٜ مبَرِ وٛٻّٜ؞
6 جٛومُ نغٜسَ کَنْ اٜ وٛودِ غٛعٛتٛ مٛ اٛ لِلَايِ، وَاتٛ ٻِطّٛ مَاکٛ مٛ اٛ يِطِ؞ غَطَ مَاجُمْ فُو اٛ لِلِ ٻِطّٛ اٛنْ تٛ مَٻّٜ، اٛ وِعِ، ‹ٻٜ کٛکَّيْ ٻِطّٛ اَمْ مَنْغُ؞›
7 اَمَّا ٻٜ اٛ حٛکِّ نغٜسَ ٻٜنْ مبِعِ حَکُّندٜ مَٻّٜ، ‹تٛو! رَا دٛنٛووٛ نغٜسَ کَنْ؞ نغَرٜىٰ مبَرٜنْمٛ، ندٛنُ نغٜسَ کَنْ وَرْتَ طُمْ مٜىٰطٜنْ؞›
8 سٜيْ ٻٜ نَنْغِمٛ ٻٜ مبَرِمٛ، ٻٜ ڤَطِّمٛ غَطَ نغٜسَ کَنْ؞
9 «تٛو، کٛ جٛومُ نغٜسَ کَنْ وَطَتَ؟ اٛ وَرَيْ اٛ حَلْکَٻٜ، اٛ حٛکَّ وٛٻّٜ نغٜسَ کَنْ؞
10 اٛنْ مٜىٰطَايِ جَنْغُکِ کٛ اَايَارٜ وِعِ؟ ندٜ وِعِي،
‹حَيْرٜ ندٜ مَحٛوٻٜ نغَݧِ
کَيْرٜ وَرْتِ حَيْرٜ ٻُرْندٜ دَرْنُکِ مَادِ؞
11 طُعُمْ طُمْ کُوغَلْ جٛومِرَاوٛ، طُمْ کَيْطِنِيطُمْ تٛ مٜىٰطٜنْ؞› »
12 دَغَ طٛنْ سٜيْ مَوْٻٜ ٻٜنْ طَٻِّتِ لَاوٛلْ نٛ ٻٜ نَنْغِرْتَمٛ، نغَمْ اٜ ٻٜ اَنْدِ دٛوْ مَٻّٜ اٛ حٛکِّ مِسَالُ طُمْ، اَمَّا اٜ ٻٜ کُلَ يِمْٻٜ؞ نغَمْ نٛنْ ٻٜ اَلِمٛ، ٻٜ ندِلِّ؞
يٛٻُکِ کَيْسَرْ شٜىٰدٜ لٜيْدِ
13 غَطَ مَاجُمْ ٻٜ لِلِ وٛٻّٜ فَارِسَنْکٛعٜنْ اٜ وٛٻّٜ يِمْٻٜ حِرُدُسْ تٛ يٜىٰسُ نغَمْ ٻٜ کٜٻَ کٛ ٻٜ نَنْغِرْتَمٛ ندٜرْ مٜتٛ مَاکٛ؞
14 ٻٜ نغَرِ تٛ يٜىٰسُ، ٻٜ مبِعِمٛ، «مٛودِبّٛ، اٜ مِنْ اَنْدِ کٛ مبِعَتَا اٜ کٛ نغَطَتَا طُمْ غٛونغَ؞ اَ حٛلَّتَا فٜىٰرٛوتِرٛلْ حَکُّندٜ يِمْٻٜ، نغَمْ اَ حٛشِّي يِمْٻٜ فُو اٜ ڤٛتِّدِ؞ طٛنْمَا اَ اٜکِّتِنَ لَاوٛلْ اَللَّه اٜ غٛونغَ؞ تٛو، وِعُمِنْ، اٜ طُمْ حَانِ مِنْ نجٛٻَ کَيْسَرْ مَوْطٛ لَامِيٻٜ شٜىٰدٜ لٜيْدِ، کٛو طُمْ حَانَايِ؟
15 مِنْ نجٛٻَ شٜىٰدٜ لٜيْدِ، کٛو تٛع مِنْ نجٛٻَ؟»
اَمَّا يٜىٰسُ اٜ اَنْدِ اٜ ٻٜ نغِطِ پٛيْرُکِمٛ، سٜيْ اٛ وِعِٻٜ، «نغَمْ طُمٜ ڤٛوندٛتٛنْيَمْ؟ نغَدَّنٜىٰيَمْ يَمْندٜ اَجُرْفَارِ مِ رَارَندٜ؞»
16 ٻٜ نغَدَّنِمٛ يَمْندٜ غٛعٛ؞ اٛ وِعِٻٜ، «طٛوْدِ مٛيٜ اٜ اِنْدٜ مٛيٜ وٛنِ دٛوْ مَيْرٜ؟»
ٻٜ نٛوتِي ٻٜ مبِعِ، «طُمْ کَيْسَرْ؞»
17 سٜيْ يٜىٰسُ وِعِٻٜ، «تٛو، کٛکّٜىٰ کَيْسَرْ کٛ وٛنِ طُمْ کَيْسَرْ، ندٜنْ کٛکّٛنْ اَللَّه کٛ وٛنِ طُمْ اَللَّه؞»
سٜيْ اٛ حَيْطِنِٻٜ نَاع سٜطَّ؞
پَمٛلْ دٛوْ اُمَّاکِ مَيْٻٜ
18 سَادُسَنْکٛعٜنْ اٜ مبِعَ وَلَا اُمَّاکِ مَيْٻٜ؞ وٛٻّٜ مَٻّٜ نغَرِ تٛ يٜىٰسُ، ٻٜ پَمِمٛ، ٻٜ مبِعِ،
19 «مٛودِبّٛ، اَنَّبِ مُوسَ وِعِي تٛ نٜطّٛ تٜعِي دٜبّٛ مَايِي دَݧِدَايِ اٜ مَاکٛ، سَکِرَاوٛ مَاکٛ سٜيْ تٜعَمٛ نغَمْ حٜٻَنَ مَيْطٛ اٛنْ ٻِٻّٜ؞
20 تٛو، ندٜنّٛ اٜ وٛودِ وٛٻّٜ سَکِرَاٻٜ وٛرْٻٜ نجٛوٜىٰطِطٛ؞ اَفٛ اٛنْ تٜعِ، مَايِ، اَلِ دٜبّٛ وَلَا ٻِطّٛ؞
21 سٜيْ طِطَٻٛ اٛنْ تٜعِ دٜبّٛ اٛنْ؞ کَنْکٛ مَا اٛ مَايِ، اٛ اَلِ دٜبّٛ اٛنْ وَلَا ٻِطّٛ؞ تَتَٻٛ اٛنْ مَا نٛنْ؞
22 ٻٜ فُو نجٛوٜىٰطِطٛ ٻٜنْ ٻٜ تٜعِي دٜبّٛ اٛنْ، ٻٜ مَايِ، ٻٜ اَلِمٛ وَلَا ٻِطّٛ؞ غَطَ طٛنْ دٜبّٛ اٛنْ مَا مَايِ؞
23 تٛو، ݧَلْندٜ ندٜ مَيْٻٜ اُمّٛتٛو، دٜبّٛ اٛنْ وَرْتَيْ دٜبّٛ مٛيٜ ندٜرْ مَٻّٜ؟ نغَمْ ٻٜ فُو نجٛوٜىٰطِطٛ ٻٜ تٜعِيمٛ؞»
24 سٜيْ يٜىٰسُ نٛوتِي وِعِٻٜ، «اٛنْ مبٛوفِي نغَمْ اٛنْ اَنْدَا کٛ اَايَاجٜ مبِعِ، ندٜنْ اٛنْ اَنْدَا بَوْطٜ اَللَّه؞
25 تٛ مَيْٻٜ اُمَّکٜ دَغَ مَيْدٜ، وَلَا تٜعَيْطٛ وَلَا تٜعٜتٜىٰطٛ، اَمَّا ٻٜ نغَرْتَيْ بٛ مَلَاعِکَعٜنْ اَللَّه؞
26 ندٜنْ دٛوْ اُمَّاکِ مَيْٻٜ دَغَ مَيْدٜ، اٛنْ جَنْغَايِ دٜفْتٜرٜ مُوسَ دٛوْ حَبَرُ لٜغّٜلْ غٛودُنغٜلْ حِيتٜ؟ اَللَّه وِعِيمٛ، ‹مِنْ وٛنِ اَللَّه مٛ اِبْرَاهِمْ، اَللَّه مٛ اِشِيَاکُ، اَللَّه مٛ يَاکُبُ؞›
27 کَنْکٛ نَاع اٛ اَللَّه مَيْٻٜ، اَمَّا اٛ اَللَّه غٛودُٻٜ يٛنْکِ؞ اٛنْ مَجِّ نَاع سٜطَّ!»
دٛوکَ ٻُرْطُمْ مَنْغُ
28 غٛعٛتٛ ندٜرْ مٛودِٻّٜ اَتَّوْرَ وَرِ نَنِ اٜ ٻٜ نغٜدّٛوتِرَ حَکُّندٜ مَٻّٜ؞ ندٜ اٛ نَنِ يٜىٰسُ نٛوتَنَکٜٻٜ بٛطُّمْ، سٜيْ اٛ پَمِ يٜىٰسُ، اٛ وِعِ، «ندٜرْ دٛوکَاجِ طِ اَللَّه وَطِ، طُمٜ ٻُرِ مَنْغُ؟»
29 يٜىٰسُ نٛوتِي وِعِ، «ٻُرْطُمْ مَنْغُ وٛنِ، ‹يِمْٻٜ اِسْرَاعِيلَ نَنٜىٰ، اَللَّه جٛومِرَاوٛ مٜىٰطٜنْ اٛ جٛومِرَاوٛ غٛعٛتٛ؞
30 يِطُ اَللَّه جٛومِرَاوٛ مَاطَ اٜ ٻٜرْندٜ مَاطَ فُو، اٜ يٛنْکِ مَاطَ فُو، اٜ حَکِّيلٛ مَاطَ فُو، اٜ سٜمْبٜ مَاطَ فُو؞›
31 طِطَٻُمْ بٛو وٛنِ، ‹يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞› ندٜرْ دٛوکَاجِ طِ اَللَّه وَطِ وَلَا ٻُرْطُمْ طِعِ طِطِ؞»
32 سٜيْ مٛودِبّٛ اَتَّوْرَ اٛنْ وِعِ، «مٛودِبّٛ، اَ وِعِي غٛونغَ ندٜ مبِيطَا اَللَّه اٛ غٛعٛتٛ، وَلَا غٛطّٛ سٜيْ کَنْکٛ تَنْ؞
33 نٜطّٛ يِطَمٛ اٜ ٻٜرْندٜ مُوطُمْ فُو، اٜ فَامُ مُوطُمْ فُو، اٜ سٜمْبٜ مُوطُمْ فُو، ندٜنْ يِطَ بَنْدِرَاوٛ مُوطُمْ نٛ يِطِرِ حٛورٜ مُوطُمْ، طُمْ ٻُرِي مَرْلٜ غُلَنْتٜىٰطٜ اَللَّه اٜ فُو کٛ طُمْ سَکَّنْتَمٛ؞»
34 ندٜ يٜىٰسُ نَنِ اٛ نٛوتٛرَکٜ فَامُ، سٜيْ وِعِمٛ، «غٛونغَ اَ وٛطِّدَا اٜ لَامُ اَللَّه؞»
غَطَ مَاجُمْ وَلَا غَطُطٛ سٜمْبٜ ٻٜرْندٜ پَمِمٛ وٛنْغٛلْ پَمٛلْ؞
پَمٛلْ دٛوْ اَلْمَسِيحُ
35 يٜىٰسُ اٜ اٜکِّتِنَ ندٜرْ نجَيْرِ وُرٛ شٜنِينغٛ، سٜيْ اٛ پَمِ، اٛ وِعِ، «نغَمْ طُمٜ مٛودِٻّٜ اَتَّوْرَ اٜ مبِعَ اَلْمَسِيحُ اٛ ٻِطّٛ دَوْدَ؟
36 نغَمْ دَوْدَ اٜ حٛورٜ مُوطُمْ، ندٜرْ بَوْطٜ رُوحُ اَللَّه اٛ وِعِي،
‹جٛومِرَاوٛ وِعِي جٛومِرَاوٛ اَمْ،
«جٛوطَ تٛ جُنْغٛ اَمْ ݧَامٛ،
نَا مِ وَطِي اَ يَاٻِي وَݧْوَݧْٻٜ مَاطَ؞» ›
37 دَوْدَ اٜ حٛورٜ مُوطُمْ نٛدِّرِيمٛ جٛومِرَاوٛ؞ تٛو، نٛ وَطَتَ اَلْمَسِيحُ وَرْتَ ٻِطّٛ دَوْدَ؟»
يٜىٰسُ وَغِّنِي يِمْٻٜ دٛوْ مٛودِٻّٜ اَتَّوْرَ
يِمْٻٜ طُطْٻٜ کَوْرُتُٻٜ کٜتِّندَنِيمٛ ندٜرْ وٜلْوٜلٛ؞
38 يٜىٰسُ اٜ اٜکِّتِنَ، وِعِ، «ڤَامَنٜىٰ مٛودِٻّٜ اَتَّوْرَ، غِطُٻٜ يِيلَاکِ اٜ ٻٛرْنِي تٛغّٛحٛ نجُوتُکٛ، غِطُٻٜ حٛوْنِرٜىٰکِ مَنْغُ ندٜرْ لُومٛ؞
39 اٜ ٻٜ نغِطِ جٛوطَاکِ دٛوْ جٛوطٛرْلٜ مَوْٻٜ ندٜرْ شُوطِ دٛعَارٜ اٜ جٛوطٛرْلٜ مَوْٻٜ تٛ حُمْتٛ؞
40 کَمْٻٜ نغٛنِ ݧَامٛوٻٜ جَوْدِ رٜوْٻٜ ٻٜ وٛرْٻٜ مُعّٜنْ مَايِ حَا اٜ غُرٜ مَٻّٜ، اٜ ٻٜ نغَطَ دٛعَارٜ جُوتُندٜ نغَمْ طُمْ يِعَٻٜ؞ اِرِ ٻٜنْ طٛنْ يِمْٻٜ طُمْ وَطَنَيْٻٜ کِيتَ ٻُرْکَ حَلُّکِ؞»
دٛکَّلْ نغَلْ دٜبّٛ مٛ غٛرْکٛ مُوطُمْ مَايِ
41 يٜىٰسُ جٛوطِي ندٜرْ وُرٛ شٜنِينغٛ حَادٜ تٛ طُمْ حٛکَّتَ شٜىٰدٜ نغَمْ اَللَّه؞ اٜ مٛ رَارَ يِمْٻٜ اٜ ٻٜ نغَطَ شٜىٰدٜ مَٻّٜ ندٜرْ تٛ طُمْ حٛکَّتَ شٜىٰدٜ نغَمْ اَللَّه؞ رِسْکُٻٜ طُطْٻٜ نغَطِ شٜىٰدٜ طُطّٜ ندٜرْ؞
42 سٜيْ رَا غٛطّٛ دٜبّٛ مٛ وَلَنَا مٛ غٛرْکٛ مُوطُمْ مَايِ؞ اٛ وَرِ اٛ وَطِ شٜىٰدٜ نجَمْکٛيْ طِطٛيْ کٛيْ نجَمْندِ مبٛطٜىٰرِ ندٜرْ؞ طُمْ شٜىٰدٛيْ سٜطَّنَحٛيْ تَنْ؞
43 سٜيْ يٜىٰسُ نٛدِّ تٛکُّٻٜمٛ، وِعِٻٜ، «اٜ مِ وِعَعٛنْ غٛونغَ، اٛعٛ دٜبّٛ مٛ وَلَنَا، کٛ اٛ حٛکِّ طُمْ ٻُرِي کٛ حٛرِيٻٜ فُو کٛکِّ؞
44 نغَمْ کَمْٻٜ ٻٜ کٛکِّ دَغَ ندٜرْ رِسْکُ مَٻّٜ؞ اَمَّا کَنْکٛ بٛو، دَغَ ندٜرْ شِيَ مَاکٛ، اٛ حٛکِّ فُو کٛ اٛ وٛودِ، وَاتٛ کٛو طُمٜ طُمْ اٛ مَرٛرْتٛو؞»