14
تٛع اٛنْ نجَوَنْ وٛٻّٜ
1 نجَٻٜىٰ فُو تٛکُّطٛ يٜىٰسُ غٛودُطٛ حٛولَارٜ ندٜ سٜمْبِطَا، اَمَّا تٛع اٛنْ نغٜدّٛوتِرْ اٜ مَاکٛ دٛوْ ݧُمٛلْ مَاکٛ؞
2 غٛطّٛ اٜ اَنْدِ اَللَّه اَلِيمٛ اٛ ݧَامَ کٛو اِرِ ندُيٜ ݧَمْندُ، اَمَّا نٜطّٛ غٛودُطٛ حٛولَارٜ ندٜ سٜمْبِطَا ݧَامَتَا کٛو اِرِ ندُيٜ ݧَمْندُ؞
3 نٜطّٛ ݧَامٛووٛ کٛو اِرِ ندُيٜ ݧَمْندُ، تٛع اٛ يَوَنَ مٛ ݧَامَتَا کٛو اِرِ ندُيٜ ݧَمْندُ، ندٜنْ نٜطّٛ مٛ ݧَامَتَا کٛو اِرِ ندُيٜ ݧَمْندُ تٛع اٛ وِعَ ݧَامٛووٛ کٛو اِرِ ندُيٜ ݧَمْندُ اٜ وَطَ کٛ وٛوطَا، نغَمْ اَللَّه جَٻِي اٛنْ طٛنْ ݧَامٛووٛ کٛو اِرِ ندُيٜ ݧَمْندُ؞
4 اَنْ اَ مٛيٜ مبِعَتَا مَشُّطٛ غٛطّٛ وَطِي کٛ وٛوطَا؟ اَيْ، جٛومُ مَاکٛ سُٻَتَ کٛو کٛ اٛ وَطِ اٜ وٛوطِ، کٛو طُمْ وٛوطَا؞ اٛ وَطَيْ کٛ وٛوطِ، نغَمْ جٛومِرَاوٛ وَلَّيْمٛ اٛ وَطَ کٛ وٛوطِ؞
5 غٛطّٛ حٛشِّي وٛنْدٜ ݧَلْندٜ ٻُرِي وٛنْدٜ مَنْغُ، غٛطّٛ بٛو حٛشِّي ݧَلْطٜ فُو اٜ ڤٛتِّدِ؞ کٛو مٛيٜ مٛوطٛنْ تَبِّتِنَ کٛ فَامِ؞
6 فُو کٛشُّطٛ وٛنْدٜ ݧَلْندٜ ٻُرِي وٛنْدٜ، اٜ مٛ وَطَطُمْ نغَمْ مَوْنِنْکِ جٛومِرَاوٛ؞ طٛنْمَا فُو ݧَامٛووٛ کٛو اِرِ ندُيٜ ݧَمْندُ، اٜ مٛ وَطَطُمْ نغَمْ مَوْنِنْکِ جٛومِرَاوٛ، ندٜ اٜ مٛ يٜتَّ اَللَّه نغَمْ ݧَمْندُ ندُنْ؞ کٛو مٛيٜ مٛ ݧَامَتَا کٛو اِرِ ندُيٜ ݧَمْندُ، اٜ مٛ وَطَطُمْ نغَمْ مَوْنِنْکِ جٛومِرَاوٛ ندٜنْ اٜ مٛ يٜتَّ اَللَّه؞
7 ندٜرْ مٜىٰطٜنْ وَلَا غَطٛووٛ جٛنْدٜ نغَمْ ٻٜيْدَارِ مُوطُمْ تَنْ، نٛنْ مَا وَلَا مَايَيْطٛ نغَمْ ٻٜيْدَارِ مُوطُمْ تَنْ؞
8 تٛ نِ اٜنْ نغَطَ جٛنْدٜ، اٜنْ نغَطَندٜ نغَمْ جٛومِرَاوٛ؞ تٛ اٜنْ مَايِ بٛو، اٜنْ مَايُ نغَمْ جٛومِرَاوٛ؞ نغَمْ نٛنْ، کٛو اٜنْ فٛوفَ، کٛو اٜنْ مَايِي، جٛومِرَاوٛ جٜيِعٜنْ؞
9 اَلْمَسِيحُ مَايِ ندٜنْ اُمِّي دَغَ مَيْدٜ، نغَمْ اٛ وَرْتَ جٛومِرَاوٛ مَيْٻٜ اٜ ٻٜ يٛنْکِ؞
10 ندٜنْ اَنْ، نغَمْ طُمٜ مبِعَتَا بَنْدِرَاوٛ مَاطَ وَطِي کٛ وٛوطَا؟ کٛو، نغَمْ طُمٜ نجَوَنْتَا بَنْدِرَاوٛ مَاطَ؟ نغَمْ اٜنْ فُو اٜنْ ندَرٛتٛ يٜىٰسٛ اَللَّه اٛ وَطَنَعٜنْ کِيتَ؞
11 نغَمْ اَايَارٜ وِعِي،
«جٛومِرَاوٛ وِعِي، مِ حُنٛرَکٜ حٛورٜ اَمْ،
کٛو مٛيٜ نٜطّٛ دِشّٛتٛ يٜىٰسٛ اَمْ،
ندٜنْ کٛو مٛيٜ وِعَيْ اٜ نجَيْرِ مِنْ وٛنِ اَللَّه؞»
12 نغَمْ نٛنْ، کٛو مٛيٜ مٜىٰطٜنْ وِعَيْ کٛ وَطِ يٜىٰسٛ اَللَّه؞
تَاع وَطُ کٛ وَطَتَ غٛطّٛ وَطَ حَکّٜ
13 نغَمْ مَاجُمْ، اٜنْ اَلُ يٛوَنْکِ بَنْدِرَاٻٜ مٜىٰطٜنْ کٛ وٛوطَا، اَمَّا اٜنْ شُٻُ ندٜرْ ٻٜرْطٜ مٜىٰطٜنْ اٜنْ نغَطَتَا غٛطُّمْ غَطٛوجُمْ بَنْدِرَاٻٜ مٜىٰطٜنْ نغَطَ حَکّٜ؞
14 اٜ مِ اَنْدِ مِ تَبِّتِنِي نغَمْ سُمْڤٛ اَمْ اٜ يٜىٰسُ جٛومِرَاوٛ، وَلَا ݧَمْندُ ندُ لَاٻَا يٜىٰسٛ اَللَّه؞ اَمَّا فُو کٛشُّطٛ وٛنْدُ ݧَمْندُ بٛ ندُ لَاٻَا، تٛو، تٛ مَاکٛ ندُ لَاٻَا؞
15 تَا وٛنَّنِي بَنْدِرَاوٛ مَاطَ ٻٜرْندٜ نغَمْ کٛ ݧَامَتَا، اَ حٛلَّايِمٛ يِدّٜ وٛنْ طٛنْ؞ تَاع اَلُ کٛ ݧَامَتَا وَرْتَ لَاوٛلْ حَلْکٜرٜ بَنْدِرَاوٛ مَاطَ مٛ اَلْمَسِيحُ مَايِ نغَمْ مُوطُمْ؞
16 نغَمْ نٛنْ، تَاع اَلُ فِي طُمْ نغِعَتَا بٛ طُمْ بٛطُّمْ طُمْ وَرْتَ کٛ وٛٻّٜ کُطَتَ؞
17 نغَمْ لَامُ اَللَّه نَاع طُمْ ݧَامُکِ اٜ يَرْکِ، اَمَّا طُمْ اَادِلَاکُ، اٜ جٛنْدٜ جَمْ، اٜ بٜلْطُمْ ٻٜرْندٜ کٜٻٜتٜىٰطُمْ بَرْکَ رُوحُ اَللَّه؞
18 نغَمْ کٛو مٛيٜ کُوَنٛووٛ اَلْمَسِيحُ اٜ وَطَ اِرِ نغِکُّ طُعُمْ اٛ بٜلْنَنٛووٛ اَللَّه ٻٜرْندٜ؛ يِمْٻٜ بٛو کٛکَّيْمٛ مَنْغُ؞
19 نغَمْ مَاجُمْ، اٜنْ نغَطُ کٛ مبَاوٜتٜنْ وَطُکِ نغَطٜنْ کٛ وَدَّتَ جٛنْدٜ جَمْ اٜ کٛ سٜمْبِطِندِرْتَعٜنْ؞
20 تَاع لَلِّنْ کُوغَلْ اَللَّه نغَمْ ݧَمْندُ؞ کٛو ندُيٜ ݧَمْندُ اٜ لَاٻِ، اَمَّا طُمْ وٛوطَا نٜطّٛ ݧَامَ ݧَمْندُ غَطَيْندُ غٛطّٛ وَطَ حَکّٜ؞
21 طُمْ ٻُرِي تٛع ݧَامَا کُسٜلْ، کٛو نجَرَا ندِيَمْ اِنَبٛجَمْ، کٛو نغَطَا غٛطُّمْ غَطٛوجُمْ بَنْدِرَاوٛ مَاطَ وَطَ حَکّٜ؞
22 اَلُ کٛ ݧُمَتَا دٛوْ فِي طُعُمْ حَکُّندٜ مَاطَ اٜ اَللَّه؞ اٛ بَرْکِطِنَاطٛ نٜطّٛ مٛ ݧُمَايِ وَطِي کٛ حَانَا، تٛ وَطِي غٛطُّمْ طُمْ حٛشِّ طُمْ بٛطُّمْ؞
23 اَمَّا نٜطّٛ غٛودُطٛ سٜکٛ دٛوْ کٛ ݧَامَتَ، تٛ اٛ ݧَامِيطُمْ، اَللَّه حٛشَّيْ کٛ اٛ وَطِ طُمْ وٛوطَا، نغَمْ اٛ تَبِّتِنَايِ کٛ اٛ وَطِ طُمْ بٛطُّمْ؞ کٛو طُمٜ کٛ نٜطّٛ وَطِ، تٛ اٛ تَبِّتِنَايِ طُمْ بٛطُّمْ يٜىٰسٛ اَللَّه، تٛو، اٛ وَطِي حَکّٜ؞