19
Ino Pallanggakanino Anera Sey Langit
1 Wasin nasinduwenoy, aneno diningngagguwa dokalla damit a kunnangke damiꞌna odduwa tolay sey langita makkantera si,
“Madandayonaddi Dios. Dandayawantammad se antu pelangino makasalak sino tolayira, e antu pelangino mannakadama anna kalalawaran.
2 Nalawad anna naggaddangngino angngukumma sino tolayira, se kinastiguneno naddinnama bafaya nayag sino tolayira sito lubagga mesapat sino narakkatta aggangwana. E binalaꞌneno bafay gafu se pinapateneno aripannera.”
3 E nekokwara kappaya nassapit si, “Madandayonaddi Dios. Umatatok anna masikkulan inaya lubbun si makkikiyad se antuweno kastiguwi Dios sikwana.”
4 Ino kaꞌlufuluwera si appata pangafuwan andino appatira a pinaratu, namaliturira a maddayaw sino aꞌlangi Dios a aggatuttud sino trono. Sinapiꞌda si, “Gakkurug, i Dios pelangino madandayaw.”
Ino Pallanggakanda Sino Kasarneno Karnero
5 Wasinoy, ana kappayino diningngagguwa damita naggabwat sino tronowa sinapiꞌna si, “Dandayawantami Dios, ikkayuwa masserbi anna mangiyatal sikwana, massiki baꞌnang onnu pobiri, dayawantammad ammin.”
6 Waso kunnenoy, ana kappayino diningngagguwa odduwa maddamita tolaya kunnangke ungungnga utu onnu natuyagga addug, e sinapiꞌda si,
“Dandayawantami Dios a mannakadama a Afutam se antu pelangino matturay si amammin.
7 Maanggammetam anna mallanggaketam anna maddandayawetam sikwana gafu so kinaturena. Se sitoya, nadatangnginnino kasarneno Karnero, e naddadanino atawana
8 se nabbarawasiyen sino neaꞌdana a nalawaringke a barawasina a mangngilikilitino furona.”
(Ino nafurawa barawasi, antuweno ampariyino nalawara aꞌakwanino tolayira i Dios.)
9 Wasi kunnenoy, sinapitino anghel sikwak si, “Ituraꞌngu yaw. Maanggammirangke a naayana umang makikasar sino kasarneno Karnero.” E sinapiꞌna kappay si, “Gakkuruwa sapiti Dios yaw.”
10 Namaliturak sino aꞌlangino anghel ta dayawangku nad, udde sinapiꞌna sikwak si, “Ammem. Ammem akwan sikwak yan. I Dios pelangino paddayawannu. Se tatappaya masserbi ki Dios a kakunnayu andino bulundawira a mangurug sino kakuruwana tulduwa nepakaammuwi Jesus.”
Se ino nepakaammuwi Jesus, antuweno fungal ammina tulduweno gumalabbunira i Dios.
Ino Nangaffutanino Nattakay Si Nafurawa Kabayu
11 Waso kunnenoy, initak kappayino langita nabukkatan, e aneno nallawana nafurawa kabayu. Ino nattakay, mingngan si Katalakkan anna Kakuruwan, se naggaddangngino akwanna a mangukum si tolay anna kepangngattanneno makiyubat sino makikontarera sikwana.
12 Ino matana, kunnangke gumigillayafa afuy, e odduweno korona sino uluna. Neturak sino baggineno angana awaningke makaammu sino anggamma sapitan nu bakkampelang.
13 Passiya adeno barawasina. Ino pingnganda sikwana, Sapiti Dios.
14 Amminino tolenera sey langit, kundangke sindalunera a dinandan sikwana. Nafuraw amminino barawasira a awana mansana, anna nattakayira ammin si nafurawa kabayu.
15 E ino pingnganda si Sapiti Dios, aneno nataramma saseta mallawan sino wangiꞌna a antuweno pangaffuꞌna sino tolayira si palulubbuna ammera mangurug sikwana. E antuneno matturay sikwara a ammena dama si ammera kuruwannino sapitanna. Paitaneno bungubunguti Dios a mannakadama sino malliwatira, se ino angngastiguna sikwara, kakunnaneno ammappat sino diyuna ubas.
16 E ana kappayino neturakka angan sino barawasina anna uffuna a “Ariyeno ammina ari anna Afafu ammina afu.”
17 Waso kunnenoy, initakino tata a anghela aggataꞌdag sino sinag, e nekokwana a nayag sino ammina mammanukira a makakkayab sey kalekay e sinapiꞌna si, “Umangkayu taw ta mangngangkayu sino odduwa pinartiyi Dios.
18 Akkayun taw ta akkanandawino baggiyeno tatturayira, sindaluwera, andino kapitandera. Akkanandokappayino baggiyeno kabayuwera andino nattakayira sikwara. Akkanandokappayino bagabaggiyeno ammina makikontara ki Dios, baꞌnang anna pobiri, aripan anna bakkanna aripan.”
19 Waso kunnenoy, initaka neyamungino kattalatalawa animal sino tatturayira sito lubag andino sindaluwera. Naamamungira ammina umang makiyubat sino nattakay sino nafurawa kabayu andino sindalunera.
20 Udde nadoꞌmanino kattalatalawa animal andino sinan gumalabbuna pannakabaggina a nangwa si kakkaꞌbaw. Ino kakkaꞌbawa inangwana, antuweno nabalabaliyanino tolayira a namarkan sino markaneno kattalatalawa animal anna naddayaw sino sinan animal. Wasin nadoꞌmanira a adwa, netakkufira a aggabiyag sino kunnangke bebaya agyananino gumigillayafa asufre.
21 Ammingkappayino sindalurera, napapatayira sino saseta nallawan sino wangitino nattakay sino nafurawa kabayu. E nabattuwino mammanukira sino bagabaggiyeno natayira.