☰ 1 Zon 5
5
Guigira Zisas khothɨgap ana zɨn vui gumgi gu mbigi, mbe kha nuianan ŋkasŋka, mbe ana daaŋgia mbur khɨngi.
1 +Fhe Bakɨme taagip wo gumgi gu mbigi ndir zav suaŋgiap sarigi guma Zisas, guigira ana khothɨgi gumgi, mbe Fhe Bakɨmen tari ma. Mba guigira wari won ndavir ndia bavira nɨɨŋgi gumgi, mbe vhɨra guigira wari won ndavir anan tari ga ndɨɨi. a 2 Nza maaŋ muuŋgip guigira wari won ndavir Fhe Bakɨme ga nɨɨŋgiap, ana nzuai tɨvi zɨn vui. Nza nta zɨn vov, nza kaŋgi, nza vhɨra guigira wari won ndavir anan tari ga ndɨɨi. 3 +Nza guigira warir won ndavir Fhe Bakɨme ga ndɨɨi tɨv khaŋ muuŋgi, nza ana suaŋgi tɨvi zɨn vuim, ana suaŋgi tɨvi simgi fhuvara. 4 +Fhe Bakɨmen tari ga gega ki gumgi, mbe za kha nuiana tɨvi mbatɨgi ŋkasŋka, mbe nta daasui. Nza guigira Fhe Bakɨme khothɨvi tɨv, mba tɨv nza kha nuiana tɨvi mbatɨgi ŋkasŋka phorga shogav, nza nta daasui.
Fhe Bakɨme thugara phɨrgiap won Kama bun suaŋgi.
5 +The kha nuiana tɨvi mbatɨgi ŋkasŋka daaŋgia mbur khɨngi? Guma khueŋ khothɨgi, Zisas Krais, ana Fhe Bakɨme Kam ma, mba guma, ana kha nuiana tɨvi mbatɨgi ŋkasŋka daaŋgia mbur khɨngi. b 6 +Kha guma Zisas Krais, ana mbɨ ruav, ana vhɨra rimgip, wo vɨzɨna siv khanarareŋ ga sur zav zergi. Ana mbɨra ruar zav zergi fhuvara. Ana mbɨ ruav, ana vhɨra rimgip, wo vɨzɨna sisur zav zergi. Fhe Bakɨme Ŋina Ŋaar ana buni guari nɨɨŋge ma, ana Zisas muuŋgi bigi bun nza nzuai. c 7 +Kha bigɨna phuni khegene ana bun nzuai. 8 +Mba bigɨna phuni khegene khare, Fhe Bakɨmen Ŋina Ŋaar, mbɨ gum vɨzɨn. Mba bigɨna phuni khegene mbe wari tɨgɨra mba bigɨna bavira bun nzuai.
9 +Nza gumgi nzuai buni, nza nta khothɨgi, nta maaŋ muuŋgi. Fhe Bakɨme nzuai buneŋ, ne guigira gumgi nzuai buni kambarigi. Khe Fhe Bakɨme nduara won Kama bun suaŋgi. 10 +Guma guigira Fhe Bakɨme Kama khothɨgi, ana Fhe Bakɨme suaŋgi buneŋ, ana ne ndigi, ne ana ndava vhen ki. Guma Fhe Bakɨme nzuai buneŋ khothɨgi fhu, mba guma ana khaŋ Fhe Bakɨme nzuai, ana bigi guiguigi guma ma. Ana maaŋ nzuav, ana Fhe Bakɨme won Kama bun nzuaim, ana ana khothɨgi fhu. 11 +Fhe Bakɨme won Kama bun nzuai, ne khaŋ muuŋgi, Fhe Bakɨme zazera mbara muuŋgip kɨrga bɨɨŋbɨɨn nza nɨɨŋgi. Anan Kam, ana mba bɨɨŋbɨɨŋ nɨɨŋge ma. 12 +Guma Fhe Bakɨmen Kama phorga ki, mba guma ana mba bɨɨŋbɨɨŋ ndigi. Guma Fhe Bakɨmen Kama phorga ki fhu, mba guma mba bɨɨŋbɨɨŋ ki fhu.
Nza khueŋ kaŋgi, nza zazera mbara muuŋgiap ki bɨɨŋbɨɨŋ ndigi.
13 +Gu kha buni kherav, nde guigira Fhe Bakɨme Kama khothɨgi gumgi gu mbigi, gu nde ndi mbai. Nde khueŋ kaŋgirga, nde zazera mbara muuŋgiap ki bɨɨŋbɨɨŋ ndigi. 14 +Nza maaŋ muuŋgip Fhe Bakɨme vuzvuk zɨn ŋgɨp, nza maaŋ muuŋgip, bigɨn the suaŋv ana phorgɨ suaŋ anan nzanga, ana nza nzai nzambareŋ mbarararga. Nza maaŋ muunga, nza Fhe Bakɨmen rivgirga fhu, nza ana han vui. 15 Maaŋ muuŋgiap, nza kaŋgi, nza nzai nzambari, ana za nta mbararagi. Nza guigira kaŋgi, nza anan nzai bigi, ana guigira ntan nza ndɨɨi.
16 +Nza maaŋ muuŋgip guigira Zisas khothɨgi guma the ganɨrim, ana tɨva mbatɨga thueŋ muuŋgirga. Mba tɨva mbatɨgeŋ za ana tuma farfagirga fhuvara. Nza maaŋ muuŋgip ana gangip, nza ana suaŋv Fhe Bakɨme phorgɨ suaŋrim, Fhe Bakɨme taagip ana ndigip zazera mbara muuŋgiap ki bɨɨŋbɨɨn anan nɨɨnga. Gu khaŋ muuŋgi tɨva mbatɨgeŋ ga nzuai. Mba tɨva mbatɨgeŋ za mba guman tuma farfagirga fhu, gu mba khesharigi tɨva mbatɨga nzuai. Za guman tuman farfagi tɨva mbatɨgeŋ ki. Gu mba tɨva mbatɨgeŋ ga mbui gumgi ga suaŋv, Fhe Bakɨme phorgɨ suan zav nde nzuai fhuvara. d 17 Nza kha mbui tɨvi mbatɨgi, nta za tɨvi mbatɨgi ma. Guma tuma shogim, ana za vhɨzi fhuv tɨvi mbatɨgi vhɨra ki.
18 +Nza khueŋ kaŋgi, Fhe Bakɨmen tari, mbe tɨvi mbatɨgi ga mbui tɨvi zɨn vui fhu. Fhuvara. Zisas ana gari, Satan won farver ana khɨngirga tuktɨgi fhuvara. 19 +Nza khueŋ kaŋgi, nza Fhe Bakɨmen tari ma. Nza Fhe Bakɨmen tari kim, kha nuian, ana za Satan ana gari, ana Satanan ŋkasŋka piin ki.
20 +Nza kaŋgi, Fhe Bakɨmen Kam, ana kha nuianan zergi. Ana zergap, ndɨkndɨgar nza ndɨɨi, nza guigira Fhe Bakɨme kaŋgi, ana guigira Fhe Bakɨme ma. Nza Fhe Bakɨme guara phorgɨp, vhɨra ana Kam Zisas Krais, nza vhɨra ana phorgɨrga. Zisas Krais, ana vhɨra Fhe Bakɨme ma. Ana zazera mbara muuŋgiap ki bɨɨŋbɨɨŋ nɨɨŋge ma.
21 +Nde nan tari, nde tori gu mbarɨvi ana rotu mbui, nde mba khesharigi bigi, nde nta han maaŋ thari. Nde nta thav, samra kɨri. e
+ 5:1 Zo 1.12-13; 15.23; 1 Zo 2.22-23; 4.15 a 5:1 Ndu 1 Zon 2.22 gu 4.2 ki kameŋ ganɨri. + 5:3 Mai 6.8; Mt 11.30; Zo 14.15; 14.21-24; 2 Zo 1.6 + 5:4 Zo 16.33; 1 Zo 3.9; 4.4 + 5:5 Ro 8.37; 1 Ko 15.57; 1 Zo 4.4; 4.15 b 5:5 Ndu 1 Zon 4.2 ganɨri. + 5:6 Zo 1.29; 1.34; 14.17; 16.13; 19.34; 1 T 3.16; 1 Zo 1.7 c 5:6 Kha Grikar kaman suaŋgi kameŋ, ne tuituigiap hɨgi fhuvara. Ana mbɨ gu vɨzɨnara suaŋgi. Mbe gumgi vhɨrve kha ndɨkndɨga mbui. Mbɨ, ana Zisas Fhe Bakɨme zɨn panan ruagi ne nzuai. Vɨzɨn, ana Zisas rɨmɨnga ne nzuai. + 5:7 Zo 1.1; 10.30; VB 19.13 + 5:8 Zo 15.26 + 5:9 Mt 3.16-17; 17.5; Zo 5.32-37; 8.17-18 + 5:10 Zo 3.33; 5.38; Ro 8.16; Ga 4.6 + 5:11 Zo 3.36 + 5:12 Zo 3.36; 5.24 + 5:13 Zo 20.31; 1 Zo 1.1-2 + 5:14 Zo 14.13; 16.23; 1 Zo 3.21-22 + 5:16 Mt 12.31-32; Ru 12.10; Hi 6.4-6; Ze 5.14-15 d 5:16 Kha buna nɨɨeŋ tuituigiap hɨgi fhuvara. Gumgi mbari kha ndɨkndɨga mbui, ana gumgi guigira vhɨzɨr zav nzuai. Gumgi mbari kha ndɨkndɨga mbui, ana wom phenatɨtɨgav vhɨzɨrga ne nzuai. Ndu Vhagi Buni Ki buni Gap 2.11 gu 20.14 ganɨri. Mba kameŋ, mbe ne dorga khaŋ nzuai, “Rimgirga”, ne khaŋ nzuai “Vhɨzgip Herar ŋgirgɨp, za fhɨrgirɨgɨrga.” + 5:18 Zo 17.15; Ze 1.27; 1 Pi 1.23; 1 Zo 3.9 + 5:19 Ro 8.10; 8.23; Ga 1.4; 1 Zo 4.6 + 5:20 Ais 9.6; Mt 25.46; Zo 17.3; 1 T 3.16; Hi 1.8 + 5:21 1 Ko 10.14 e 5:21 Nza Fhe Bakɨme buni vhuuiŋ ki gavar kha kameŋ ganɨnga. Mba kameŋ, khare. Mbarɨvi gu tori rotu mbui. Mba kameŋ, ne za kha nuianan ki tɨvi mbatɨgi vharigi kameŋ ma. Mba kameŋ ne guigira bigɨna mbatɨgeŋ ma. Maaŋ muuŋgiap, Zon khaŋ ne nzuai. Ne khaŋ muuŋgi, mba tɨv, ana guigira tɨva mbatɨgeŋ ma. Guma the maaŋ muuŋgip, tɨva mbatɨga thueŋ suirav, nen muuŋv, guigira won ndavara ne nɨɨŋgirga, mba tɨv ana gari. Ne khaŋ muuŋgi, mba tɨv anan mbarɨvi gu tori fara muuŋgi. Ana mba tɨva rotu mbui.
☰