14
Nza wari phorgap guigira Zisas khothɨgi gumgi gu mbigi mbui tɨvi ganɨv nta suaŋv mbe suanga fhu.
++Guma, ana maaŋ muuŋgip guigira Zisas khothɨgɨp, ana ana khothɨgi ndɨkndɨk havhargi fhu, nde ana suaŋv, ana ndigip, mba guigira Zisas khothɨgi gumgi gu mbigir vhen ŋgirgɨri. Nde mbarkɨrga bigi, nde ntan sagi fhu, nde ntan ana suaŋv, ana daaŋ thari. +Guma mbe, ana Zisas khothɨgi ndɨkndɨk, ana guigira havhargi. Ana maaŋ muuŋgiap, ana za mba mba gu sɨgi pi. Guma mbe, ana Zisas khothɨgi ndɨkndɨk, ana pim havhargi fhuvara. Ana maaŋ muuŋgiap, ana sɨgi pi fhu. a +Mba mba gu sɨgi za nta pi guma, ana mba sɨgi thagi guma, ana ana suaŋv ana mbevɨ thari. Mba sɨgi thagi guma, ana mba mba gu sɨgi za pi guma ga suaŋv ana mbevɨ thari, ana kha ndɨkndɨgar ana muuŋ thari, ana pham bigi ga mbui. Fhuvara. Fhe Bakɨme vhɨra mba guma ndigi. +Ndu the, ndu harigi guman ŋaara guma, ndu ana tɨvi garav, nta nzuav ana nzuai? Ana maaŋ muuŋgip thɨgɨ havhargip, won ŋaarar muunga o, ana rɨgɨrga, ana gari Guma Bakɨme bigɨn ma. Ana thɨga havhargirga, ne khaŋ muuŋgi. Guma Bakɨme nduara ana muuŋgim, ana thɨga havhargi.
+Guma mbe kha ndɨkndɨga mbui. Raa mbe, ana guigira tuga bakɨme ma. Rari mbari, nta fhura ki rari ma. Guma mbe, ana kha ndɨkndɨga mbui. Kha rari, nta za mbara muuŋgi. Nde mba ndɨkndɨgi ga mbui, nde gumgi bevbevira zam tuituigip khueŋ kaŋgiri, nde ndɨkndɨgir, maaŋgi ndɨkndɨk, ana nden nzerara. +Guma mbe, ana raa mbe farasarav, ana mba raar, ana Fhe Bakɨme zɨ ndi vun kuamkuagi. Ana Guma Bakɨme ndɨkndɨgap, ana maaŋ mbui. Mba mba gu sɨgi za nta pi guma, ana Guma Bakɨme ndɨkndɨgap, ana pi. Ana vhɨra mba mba nzuav Fhe Bakɨmen ndikndigap ana phorga suaŋgiap, ana nta pi. Mba mba mbari mbɨ thagi guma, ana vhɨra, ana Guma Bakɨme ndɨkndɨgap, ana mba mbari thagi. Ana vhɨra mba bigi ga nzuav, Fhe Bakɨmen ndikndigap ana phorga nzuai.
+Nza khueŋ kaŋgi, nzan rɨgar, nza the khueŋ ndɨkndɨgi fhu, “Gu ntige khar ki bɨɨŋbɨɨŋ, ana nanera. Gu vhɨra rimgirga, ana na bigɨnara.” Fhuvara! +Nza ŋam kav rui, ne Guma Bakɨme bigɨn ma. Nza vhɨra rimgirga, ne vhɨra Guma Bakɨme bigɨn ma. Maaŋ muuŋgip, nza ŋam kɨrga o, nza rimgirga, nza Guma Bakɨme ntɨɨrira. +Krais ne nzuav ana rimgiap, ana taagia khavgi. Ana maaŋ muuŋgiap, ana mba vhɨzgi gumgi Guma Bakɨme kɨv, ana vhɨra mba ŋamki gumgir Guma Bakɨme kɨrga. 10  +Maaŋ muuŋgiap, ndu thaŋ nzuav wo phorgap guigira Zisas khothɨgi guma mbui tɨvi garav, buni mbatɨgir ana nzuai? Ndu thaŋ nzuav wo phorgap guigira Zisas khothɨgi guma mbevav ana nzuai? Ndu khueŋ kaŋgi, nza zam Fhe Bakɨme nɨma thivgirim, ana nza muuŋgi tɨvi ga suaŋv nza suanga. 11  +Fhe Bakɨmen buni vhuuiŋ ki gap ne suaŋgi. Ana khaŋ nzuai, “Gu Guma Bakɨme ma. Gu zazera mbara muuŋgia ki. Gu guigira nzuai, kha nuianan ki gumgi gu mbigi, mbe za zɨv, na nɨman thɨpani phɨrɨv fɨrga. Mbe na nɨman thɨpani phɨrɨv fɨv, mbe za khaŋ suanga, gu Fhe Bakɨ guar ma.” 12  +Maaŋ muuŋgiap, nza kaŋgi, nza za bevbevira, nza zɨv, Fhe Bakɨme nɨman nza wo muuŋgi tɨvi ntɨɨriveŋ bun ana suanga.
Nza guigira Zisas khothɨgi gumgi gu mbigir muuŋrim, mbe rɨv, tɨvi mbatɨgir muuŋ thari.
13  +Maaŋ muuŋgia, nza guigira Zisas khothɨgi gumgi gu mbigi mbui tɨvi ganɨv, nta suaŋv ndɨkndɨgi mbatɨgir mben muunga fhu. Nza harigi khesharigi ndɨkndɨga zɨn ŋgɨrga. Nza guigira Zisas khothɨgi gumgi gu mbigir muuŋgirim, mbe rɨgɨp, tɨva mbatɨga thueŋ muunga bigɨna thuen muunga fhu. 14  +Gu Guma Bakɨme Zisas phorgim, ana na ndɨkndɨgi ga muuŋgim, gu tuituigiap khueŋ kaŋgi, kha bigɨn the, ana nduara Fhe Bakɨme nɨman nzaŋnzaŋgi fhuvara. Maaŋ muuŋgip, guma the kha ndɨkndɨgar bigɨn then muunga, “Kha bigɨn, ana nzaŋnzaŋgi.” Ana mba ndɨkndɨgar mba bigɨna mbui, mba bigɨn ana nɨman guigira nzaŋnzaŋgi. 15  +Maaŋ muuŋgiap, guigira Zisas khothɨgi guma the khaŋ ndɨkndɨgar bigɨn then muunga, kha bigɨn, ana guigira Fhe Bakɨme nɨman nzaŋnzaŋgi. Ndu ana nɨman mba bigɨna pi. Ndu guigira Zisas khothɨgi guma ndɨkndɨgar farfagi. Ndu maaŋ muuŋv ndu kaŋgiri, ndu ndavar guigira Zisas khothɨgi guma ga ndɨɨi fhu. Ndu kaŋgiri, Krais, ana taagip mba guma ndir zav, ana nzuav rimgi. Ndu mba ana farfagi bigɨna mbɨ thari. 16  +Nde vhɨra kha ndɨkndɨgar bigɨn then muunga, kha bigɨn ana Fhe Bakɨme nɨman nzerara. Nde tuituigip ganɨri, nde harigi gumgi thari nden tɨva gangip, khaŋ suaŋ thari, “Mba tɨv, ana mbatɨgi.” 17  +Fhe Bakɨme wo gumgi gu mbigi garim, mbe anan piin ki tɨv, ana mba gu mbɨ thɨrav ki fhuvara. Zakɨra fhuvara! Fhe Bakɨme gari gumgi gu mbigir tɨva guar khare, tɨvar vhuuŋ, ndavar mɨɨtɨk, ndikndigi tɨv. Mba tɨvi, Fhe Bakɨmen Ŋina Ŋaar nduara mba tɨvi ndi ndɨɨi. 18  +Guma mba tɨvi zɨn vov Kraisan ŋaara mbui, Fhe Bakɨme mba guman tɨvi vuzvugirga. Mba gumgi gu mbigi, mbe mba guma vuzvugiap, ana ndikndigi bunin ana suanga.
19  +Maaŋ muuŋgiap, nza za wari tɨgap ndava bavira ki tɨvi zɨn ŋgɨp, nza vhɨra harigi gumgi gu mbigi Zisas khothɨgi ndɨkndɨk havhari tɨvi, nza ntan muunga. 20  +Ndu mbara ndɨkndɨgɨp Fhe Bakɨmen ŋaarar farfarga ne suaŋ thari. Guigira, kha pi mba, nta nzerara, nta za pi mba ma. Ndu maaŋ muuŋgip bigɨn then mbegɨrim, mba tɨv, ana harigi guma gu mbiga then muuŋgirim, ana rɨgɨrga, mba tɨv, ana tɨva mbatɨgeŋ ma. 21 Ndu maaŋ muuŋgip sɨga the mbegɨrga o, ndu wainan mbegɨrga o, ndu harigi bigɨn thueŋ muuŋgirim, mba bigeŋ guigira Zisas khothɨgi guma o mbiga then muuŋgirim, ana rɨgɨrga, khueŋ nzerigi, ndu mba tɨvi thari. 22 Ndu mba khesharigi tɨvi, ndu nta khothɨgi ndɨkndɨk, ana ram mbui khesharigi, ana ndu bigɨn ma. Fhe Bakɨme, ana ndun ndɨkndɨga kaŋgi, ana ŋko bigɨn ma. Guma, ana Fhe Bakɨme nɨman bigɨn thueŋ muuŋv, ana wo ndava vhen kaŋgi, Fhe Bakɨme mba bigeŋ ga suaŋv ana suaŋgirga tuktɨgi fhu, ana ndikndigɨri. 23  +Guma, ana siga then mbɨv, ana ndɨkndɨga phunin muuŋv, ana mba sɨgar mbɨrga, ana ne nzuav, Fhe Bakɨme nɨman simtɨk ki. Ne khaŋ muuŋgi, ana ndɨkndɨga phuni ki. Ana kha ndɨkndɨga mbui, “Gu kha siga pi ne nzerara, o fhu?” Fhe Bakɨme ne suaŋv na suanga thi? Nza vhɨra, nza maaŋ muuŋgip bigɨn thueŋ muuŋv, nza Zisas khothɨgi ndɨkndɨk khaŋ nza suanga, “Nza kha mbui tɨv, ne nzerigi fhuvara,” Nza maam, nza tɨva mbatɨgeŋ mbui.
+ 14:1 Ro 15.1; 15.7; 1 Ko 8.9-11; 9.22 + 14:1 Kor 2.16 + 14:2 Stt 1.29; 9.3; Ro 14.14; 1 Ko 10.25; 1 T 4.4 a 14:2 Ndu 1 Ko 8.1 ganɨri. + 14:3 Kor 2.16 + 14:4 Mt 7.1; Ze 4.11-12 + 14:5 Ga 4.10 + 14:6 1 Ko 10.31; Ga 4.10; 1 T 4.3 + 14:7 1 Ko 6.19-20; Ga 2.20; 1 Te 5.10; 1 Pi 4.2 + 14:8 Ru 20.38; Ga 2.20; 1 Te 5.10 + 14:9 FG 10.36; 2 Ko 5.15 + 14:10 Mt 25.31-32; FG 10.42; 17.31; 2 Ko 5.10 + 14:11 Ais 45.23; Fi 2.10-11 + 14:12 Mt 12.36; Ga 6.5; 1 Pi 4.5 + 14:13 1 Ko 8.9; 8.13; 10.32 + 14:14 FG 10.15; Ro 14.2; 14.20; 1 Ko 8.7-8; 1 T 4.4; Ta 1.15 + 14:15 1 Ko 8.11-13 + 14:16 Ta 2.5 + 14:17 1 Ko 8.8 + 14:18 2 Ko 8.21 + 14:19 Ro 12.18; 15.2; 1 Ko 14.12; 1 Te 5.11 + 14:20 Mt 15.11; Ro 14.14-15; 1 Ko 8.9; 8.13; Ta 1.15 + 14:23 Ta 1.15