8
Mba Sipsiva Ŋguk mba harathɨgi kendora vhera daaŋgi.
1 Gu mba buni mbararagiap mbaram garim, mba Sipsiva Ŋguk mba harathɨgi kendora vher, ana mba gava mpɨrigi, ana ana daaŋgi. Ana ana daaŋgim, bigɨn the khɨkhɨm hegi fhu. Guma the Hevenan kav, kama hegap, buna thueŋ suaŋgi fhu. Mba bigi fhura vhuav tuga mpeeŋnera kegi.
2 Gu zumgum garim, Fhe Bakɨme zɨ ki harathɨgi enseri, mbe Fhe Bakɨme nɨma thivgim, mbe harathɨgi mbarɨvir mbe ndɨɨi.
3 Gu gari, harigi enser mbe zav mba ndɨga vhuuŋ hi ruina mpooi artar han thɨgi. Ana gorar muuŋgi thuuŋ suirigi. Mba thuuŋ ana ndɨga vhuuŋ hi thuura ndi mbai rui ana ki. Mbe mba khesharigi ruin vhɨrver ana nɨɨŋgi. Ana ntan Fhe Bakɨmen gumgi gu mbigi ana phorga nzuai buni phorgap nta tɨkhɨngirga. Ana ntan Fhe Bakɨme nɨman, mba gorar muuŋgi artaran ofar muunga.
4 Mba ndɨga vhuuŋ hi vhava thuur gum mba Fhe Bakɨmen gumgi gu mbigi ana phorga nzuai buni, nta mba Fhe Bakɨme nɨma thɨgi enser farve thav vun ndai.
5 Mba Fhe Bakɨme enser mbara mba artaran vhava ndigap, mba rui ki thuuaŋ suegim, ana za givigi. Ana za givigim, ana ana fegap, kha nuiana khɨngi. Ana ana fekhɨngim, buip phɨrerim, khɨkhɨɨ bakɨvi him, buip vhekvhegap fhura shɨkshɨga ndogap, kha nuianan vuim, khɨmkhɨk kha nuiana suirav ana nɨɨŋkui.
Harathɨgi enseri mbarɨvi ga bi.
6 Mba harathɨgi enseri, mbe harathɨgi mbarɨvi suigi, mbe nta bir za mbui.
7 Mba fharigi enser ana won mbarɨva berigim, mbok fara muuŋgi ais, vhav vɨzɨna digap, ni wani tɨgap, rav, nuiana ri. Kha nuian, mbe rɨgɨra ana sharav fɨga mpuani khegene ga muuŋgi fara muuŋgi. Mba nuiana fɨga mpuani khegene vhav za tamtam nta shigi. Mba vhav shigi bigi, nta za wari tɨgap khaŋ muuŋgi. Mba nuiana fɨga mpuani khegenen fɨga mueŋ za vhav ne shigi fara muuŋgi. Nta maaŋ muuŋgim, vhav mba nuianan fɨga mueŋ, ana za ne shiav, mba khira, ana vhɨra mba tɨvara nta muuŋgi. Mba ŋamki vhazɨgi ŋkarɨɨiŋ vhav vhɨra za nta shigi.
8 Mba fharigi enser thɨgi enser, ana wo mbarɨva berigi. Mbe bigɨna bakɨ mbe mbɨkshɨma fara muuŋgi vhav anan kav shi, mbe ana fega khɨngim, ana vov mbasɨga rɨgi. Mbe maaŋ muuŋgim, mbasɨk wo shɨga suegap, fɨga mpuani khegene ki. Anan fɨga mueŋ vɨzɨn, ne ga perigi.
9 Mbe vhɨra mba mbasɨgar ŋamki bigi, mbe vhɨra nta shɨgav, nta ndiv phɨna phuni khegenen mbarigi. Mbe nta ndim, phɨna phuni khegenen mbarigim, phɨna mbe za vhɨzgi. Mbe vhɨra mba mbasɨgar ki ŋkee bakɨvi, mbe vhɨra nta ndiv phɨna phuni khegenen mbarigi. Mbe nta ndiv, phɨna phuni khegenen mbarigim, phɨna mben ki ŋkee bakɨvi, nta za mbatɨgi.
10 Mba fharigi enserani thɨgi enser, ana wo mbarɨva berigi. Mba kama mbe, anan vhav guigira nteniver vhavara fara muuŋgi, ana Hevenan kegap, verav, nɨɨeŋ rɨgi. Mbe mba phara, mbe za nta shɨgap, nta ndiv phɨna phuni khegenen mbarigi fara muuŋgi. Mba kam, rav phara mbari ga rav, vhɨra mbogi phara mbari ga regi.
11 Mba kama zɨ khaŋ muuŋgi, Gɨrgɨr Mbatɨga Muuŋgi Ŋkirɨɨŋ ma. Ana rav mba phɨna mben ki phara regim, ana guigira gɨrgɨr mbatɨga muuŋgi ŋgirɨɨŋ fara muuŋgi. Gumgi gu mbigi vhɨrve mba phara pim, mba phara mbe ndavi vheri tuim, mbe vhɨrve vhɨzi.
12 Mba fethɨgi enser, ana wo mbarɨva berigi. Mbe ra, gu kɨni, ŋkaa, mbe nta shɨgap, nta ndiv, phɨna phuni khegenen mbai fara muuŋgi. Mbe bigɨn mben nta shogim, ran fɨga mueŋ mbe nen farfagiap, mbe kɨnin fɨga muen farfagiap, mbe vhɨra ŋkaar fɨga mueŋ, mbe vhɨra nen farfagi. Mbe maaŋ muuŋgim, mba bigir fɨgi mbariveŋ, nta vhavar ŋaar ki fhu, nta za gɨngɨngi. Maaŋ muuŋgiap, mba ran fɨga mueŋ gu maan fɨga mueŋ, mani vhava ŋaar ki fhu.
13 Gu mba bigi him, gu nta gara vov, gu baŋga bakɨ mbe garim, ana gegap, rɨgɨra kha buiva shaara khɨngiap, vui. Gu ana garav, ana mbararagim, ana khɨrɨv, kaav, khaŋ nzuai, “Eke! Eke! Eke! Nde nuianan ki gumgi gu mbigi! Kha enser phuni khegene wari won mbarɨvi ga bir za mbui. Mbe wari won mbarɨvi ga birga, simtɨga bakɨ guarara kha nuianan ki gumgi gu mbigir hɨrga.”