4
1 U̱ da-o̱ no̱m-u̱ u̱m o̱o̱ge̱ u̱t-zu̱ ya: Abite̱ zu̱ wa re̱-du̱ o̱g-du̱ u̱r-mat o̱mo̱n wa'-u̱ re̱k-wa, wa o̱ u̱s-gan u̱ka to̱k, ko̱ u̱zu̱ wa o̱tte̱ ko̱-uyan u̱ u̱so wa o̱tte̱.
2 Tu̱msu̱ ne̱t-tu̱ o̱ro tu̱ gwat-du̱ wa, se̱ wa teeg da-u̱ u̱so wa cine̱.
3 Iya o̱ in o̱tte̱ kanda Kiristi haan. In o̱o̱g sha-mu̱ ya'ag-u̱ re̱k-e̱ in o̱ u̱-me̱ m-to̱k u̱ ta-u̱ yar-u̱t yo̱-to̱ tu̱ o̱o̱ge̱ u̱r-faru̱k du̱ uno̱ dak-o̱.
4 Se̱di da da-u̱ na cine̱ teene̱, Ru̱-u̱ to̱mo̱n Wa'-u̱ wa. Wu̱ ne̱ta mate̱ tu̱msu̱ wa dor bo̱r-tu̱ Ru̱-u̱ yase̱ Mosa.
5 Ru̱-u̱ to̱mo̱n wu̱n remu̱ wa guut ne̱t-u̱t to̱ tu̱ o̱o̱ge̱ do̱rru̱ bo̱r-u̱t Yahuda-ne̱ remu̱ in o̱nkte̱ o̱g-u̱r in du̱ shu̱yi-shu̱yi, u̱ka ya'ag-u̱ u-Ru̱.
6 Tu̱msu̱ rem u̱zu̱ no̱ ya'ag-u̱ wu̱n ne̱, Ru̱-u̱ to̱mo̱n Yar-u̱ Wa'-u̱ wa u̱-me̱ jab-u̱s in, Yar-u wa wu̱' in fog u-Ru̱, <<U̱so ri! U̱so ri!>>
7 Remu̱ iya, bo̱ zamu̱n to̱k da, se̱di wa'-u̱ u-Ru̱ bo̱ o̱o̱ge̱. Tu̱msu̱ remu̱ u̱zu̱ bo̱ o̱ wa'-u̱ wu̱n, wa wa'ag bo̱ re̱ o̱g-du̱ u̱r-mat-u̱ wa.
Burus e̱ku̱ste̱
remu̱ Garatiya-ne̱
8 U̱r-taku̱n, da-u̱ no̱ nape̱ u-Ru̱ da, no̱ o̱o̱g to̱k-ne̱ u̱du̱ ru̱-tu̱ za u̱r-fat.
9 Se̱di u̱ da-o̱ ba no̱ haane̱ u̱-me̱ same̱-du̱ u̱t-hi u̱ u-Ru̱ ne̱ ko̱ u̱m zu̱, Ru̱-u̱ haagu̱n u̱-me̱ same̱-du̱ u̱t-hi u̱ no̱ ne̱, ¿re̱-o̱ no̱ o̱tte̱ u̱t-sa no̱ sur m-mu̱ u-dim tu̱msu̱ no̱ shu̱'u̱t to̱k-ne̱ u̱du̱ yar-tu̱ za u̱r-be̱b tu̱msu̱ tu̱ m-zan tu̱msu̱ u̱du̱ yar-u̱t to̱ ne̱ tu̱ o̱o̱ge̱ u̱r-faru̱k u̱-me̱ uno̱ dak-o̱?
10 No̱ dor to̱ku̱n ho̱-to̱ sok u̱s-pyat ne̱ u̱ u-da ne̱ u̱ u̱s-hak ne̱ u̱ no̱ kum-u̱t hyu̱-m pus-mo̱ u̱du̱ u-Ru.
11 U̱m ho̱k u-gye̱r remu̱ no̱. Jiya pama-u̱s ri u̱ no̱ne̱ o̱o̱g m-zan.
12 U̱m ko̱n-u̱g no̱ o̱r-u̱t ri ne̱, shu̱'u̱tu̱n sha-m ri u̱ka u̱m kumte̱ u̱t-pos du̱gu̱ to̱ no̱m-to̱, remu̱ u̱zu̱ u̱m shu̱'u̱te̱ sha-m no̱ a-za Yahuda-ne̱ i poste̱ du̱gu̱ bo̱r-u̱t to̱. No̱ no̱ngu̱ me̱ no̱m-tu̱ za ho̱n-ho̱n da.
13 No̱ baku̱s u̱zu̱ u̱r-taku̱n remu̱ ko̱b-du̱ m-yar de̱ u̱m no̱mtu̱ no̱ do̱nse̱-du̱ Rem-su̱ m-Re̱me̱r.
14 Tu̱msu̱ ko̱ ba shu̱'u̱te̱ ko̱b-du̱ m-yar ri shu̱'u̱te̱ m-reg u̱du̱ no̱, no̱ ju̱ru̱m me̱ ko̱ no̱ gu̱gu̱m me̱ da. No̱ o̱nkte̱ me̱ tu̱msu̱ no̱ ku̱b me̱ u̱ka u̱zu̱ u̱m o̱ wa-to̱m u-Ru̱, no̱ ku̱b me̱ u̱ka Kiristi Ye̱so̱ hi-u̱r wa.
15 ¿Yan-o̱ kume̱ so̱-u̱r no̱ u̱r-be̱e̱t? U̱m nak u̱zu̱ abite̱ o̱o̱g u̱t-no̱me̱, no̱ za hoste̱ is-u̱t no̱ tu̱msu̱ no̱ yase̱ to̱ u̱du̱ ri.
16 ¿U̱m shu̱'u̱te̱ hu̱u̱b-u̱ yo̱-o̱ no̱ u̱ da-o̱ remu̱ zu̱ u̱m o̱ waru̱ no̱ u̱t-nip?
17 To̱-to̱ ne̱t-to̱ e̱ku̱ste̱ to̱ ku̱bu̱s jab-u̱s no̱, se̱di no̱m-u̱ u̱n o̱o̱ge̱ zo̱ng-su̱ u̱t-no̱m o̱ zaar so̱-o̱ da. E̱ u̱t-sa e̱ hast no̱ du̱gu̱-du̱ ri remu̱ no̱ muute̱ jab-u̱s no̱ u̱du̱ u̱n.
18 Ko̱ re̱-o̱ nomte̱, o̱tte̱ u̱r-zwar waku̱n ya' jab-u̱ remu̱ no̱mu so̱-o̱, uda u-be̱e̱t, za da-u̱ u̱m o̱o̱ge̱ no̱ne̱ war-o̱ da.
19 Yaag-u̱ ri! U̱ka ne̱ta yu̱ o̱ u̱-me̱ re̱mu̱ me̱n-tu̱ u̱r-mat, iya-o̱ u̱m otte̱ u̱t-swu̱r m-ho̱g gandi go̱-du̱ re̱-mo̱ se̱ Kiristi shu̱u̱g u̱t-rogom u̱-me̱ jab-u̱s no̱.
20 U̱m cwang u̱m haan tu̱msu̱ u̱m shu̱'u̱t u̱r-kot u̱ no̱ ne̱ u̱ da-o̱ tu̱msu̱ u̱m swase̱ cwar-yu̱ u̱s-rem ri, rem u̱zu̱ u̱m e̱ku̱ste̱ mo̱t-u̱t no̱ ne̱.
Hajaratu u̱ Saratu
21 Waru̱n me̱, no̱ i o̱o̱ge̱ u̱t-sa no̱ shu̱'u̱t u̱ ta-u̱ bo̱r-tu̱ Yahuda-ne̱, ¿no̱ nak no̱m-u̱ bo̱r-tu̱ zu̱ye̱?
22 Ran-u̱ u-Ru̱ o̱ u̱t-zu̱ Ibrahi o̱tte̱ ya'ag yu̱r. Wagan o̱o̱g du̱gu̱ to̱k-u̱ ne̱ta, tu̱msu̱ wagan o̱o̱g du̱gu̱-du̱ ne̱ta wu̱ zaare̱ me̱ m-to̱k da.
23 Se̱di wa'-u̱ o̱o̱ge̱ du̱gu̱-du̱ to̱k-u̱ ne̱ta na mak-u̱t wa u̱ka na vette̱; se̱di wu̱ na mate̱ du̱gu̱-du̱ ne̱ta wu̱ zaare̱ me̱ m-to̱k da wa o̱o̱g u̱ka shu̱-du̱ este̱du̱ u̱s-rem su̱ u-Ru̱ u̱du̱ Ibrahi.
24 Ne̱ta-u̱t tun-to̱ u̱t-yu̱r to̱ o̱ sha-mu̱ este̱du̱ u̱s-rem su̱ u-Ru̱ u̱s-yu̱r. Hajaratu, wa o̱ u̱ka Ro̱r-du̱ Sinai be-du̱ ne̱t-tu̱ o̱nkte̱ bo̱r-tu̱ Yahuda-ne̱, tu̱ mute̱ e̱ to̱k-ne̱.
25 U̱ da-o̱ Hajaratu o̱ ees-mu̱ Ro̱r-du̱ Sinai u̱-me̱ dak-u̱ Arabiya, tu̱msu̱ ees-mu̱ Urusharima u̱ ya-o̱. Remu̱ wa o̱ u̱-me̱ m-to̱k u̱du̱ u-bo̱r u̱r-kot u̱ yaag-u̱ wa ne̱.
26 Se̱di unwa jit ne̱ta wa, Saratu, wa o̱ ees-mu̱ Urusharima u̱ o̱o̱ge̱ u̱-do̱m u-ru̱. Wa zaar me̱ m-to̱k da tu̱msu̱ wa o̱ sha-mu̱ ino̱-u in.
27 Remu̱ zu̱ o̱ m-pan:
<<No̱m u̱r-so̱, ne̱ta za u̱r-mat,
wu̱ mate̱ ya'ag da.
No̱m u̱t-jar m-yat,
wu̱ tame̱ nap-du̱ re̱mu̱ u̱r-mat da.
Remu̱ u̱zu̱ ne̱ta wu̱ campa wa gu̱gme̱,
u̱ da-o̱ wa o̱tte̱ ya'ag,
m-ze̱g wu̱ o̱o̱ge̱ u̱r-yu̱ e̱ campa wa.>>
28 Tu̱msu̱ da-o̱ no̱ o̱r-u̱t ri ne̱, no̱ o̱ ya'ag i na mate̱ sha-mu̱ shu̱-du̱ este̱du̱ u̱s-rem su̱ u-Ru̱, u̱ka Ishaku.
29 Se̱di u̱ da-u o̱ wa' wu̱ na mate̱ u̱ka na vette̱ wa yu̱' wa'-u̱ na mate̱ u̱du̱ be̱b-du̱ u-yar u̱r-ko̱b. Gandi no̱m-u̱t to̱ o̱o̱ge̱ m-da u̱ da-o̱.
30 Se̱di ¿yan-o̱ Ran-u̱ u-Ru̱ zu̱ye̱ u̱ mo̱t-tu̱ iya ne̱? <<Buz to̱k-u̱ ne̱ta-u ya u̱ wa'-u̱ wa ne̱. Rem u̱zu̱ wa'-u̱ to̱k-u̱ ne̱ta wa zaar u̱ re̱-du̱ o̱g-du̱ u̱r-mat-u̱ wa'-u̱ ne̱ta wu̱ zaare̱ m-to̱k da.>>
31 Remu̱ iya o̱r-u̱t ri ne̱, in zaar ya'ag-u̱ to̱k-u̱ ne̱ta da, se̱di ya'ag-u̱ ne̱ta yu̱ zaare̱ me̱ m-to̱k da.