11
Ru̱-u̱ ho̱k o̱n-du̱
ne̱t-tu̱ Isra-ne̱
1 A waku̱n u̱ shite̱ me̱ u̱zu̱: ¿Shu̱'u̱te̱ u̱zu̱ Ru̱-u̱ yakke̱ ne̱t-u̱t wa? Za, iya o̱ da! Ko̱ me̱ ne̱t-u̱ Isra wa, du̱gu̱ rem-u̱r Ibrahi, tu̱msu̱ du̱gu̱ ko̱-u̱r Banyami ne̱.
2 Ru̱-u̱ yakte̱ ne̱t-u̱t wa da, i wa dage̱ du̱gu̱ u̱r-taku̱n. Baksu̱n no̱m-u̱ Rem-su̱ u-Ru̱ ware̱, u̱ka Iriya hu̱u̱te̱ rem-su̱ ne̱t-tu̱ Isra u̱du̱ u-Ru̱ wa zu̱,
3 <<Yawe, e̱ ho̱ru̱ssu̱ a-warru̱ rem-u̱s ró ne̱. Tu̱msu̱ e̱ yo̱'o̱kte̱ sak-u̱r ró. Me̱ wa u-gan u̱ kuse̱ u̱r-fat, tu̱msu̱ e̱ o̱ baku̱ ri remu̱ e̱ hoot.>>
4 ¿Yan go̱-du̱ u-shas o̱ Ru̱-u̱ no̱mu̱ wu̱n? Wa shaku̱s wa u̱t-zu̱, <<U̱m cu̱ngu̱ hi-du̱ war ri u̱t-ne̱t u̱t-zo̱ngu u̱t-ta'er i so̱kte̱ e̱ no̱mu̱ ru̱-u o̱ u̱ na foge̱ Ba'ar u̱t-huuk da.>>
5 Ko̱ u̱ da-o̱ iya o̱tte̱. Ne̱t-tu̱ o̱ro cashi i kuse̱ i Ru̱-u̱ dage̱ remu̱ nya-u wa.
6 Du̱g-u̱t to̱ tu̱ Ru̱-u̱ no̱me̱ remu̱ nya-u wa o̱, za remu̱ u̱s-pama su̱ u̱n no̱me̱ da. U̱zu̱ iya da, nya-u u-Ru̱ za shu̱'u̱te̱ nya-u so̱-o̱ da.
7 No̱m-u̱ o̱ te̱k-u̱ ya: Ne̱t-tu̱ Isra saag fu̱n-yu̱ e̱ do̱te̱ u̱t-shu̱'u̱t ne̱t-u̱t so̱-to̱ u̱du̱ u-Ru̱. Se̱di e̱ kwu̱ng no̱m-u̱ e̱ u̱t-sa da. E̱ke̱n u̱ te̱k-u̱ me̱ u̱n i Ru̱-u̱ dage̱, e̱ kabu̱g jab-u̱ so̱-o̱ u-Ru̱, se̱di u-tát i kuse̱, e̱ shu̱'u̱te̱ a-ko̱b-du̱ ho̱g-du̱ u̱s-rem ne̱ tu̱msu̱ e̱ kwu̱mu̱g da.
8 U̱ka o̱tte̱ m-pan u̱-me̱ Rem-su̱ u-Ru̱ u̱zu̱,
<<Ru̱-u̱ muute̱ u̱n u̱ka rag-ne̱
tu̱msu̱ za m-nap.
Wa yaag u̱n is se̱di e̱ za u̱t-hyan da,
tu̱msu̱ wa yaag u̱n u̱t-to̱,
e̱ za u̱t-ho̱g da u̱ haan u̱ ya-o̱.>>
9 Se̱ Dawuda zu̱,
<<Yage̱ mo̱ro̱g-du̱ u-re̱
u̱n to̱ shu̱'u̱t u̱ka u̱r-re̱n.
Tu̱msu̱ yage̱ u̱ shu̱'u̱t u̱n u̱r-pu̱kse̱,
u̱ de̱ hatu̱n u̱n swadu̱ u̱r-ko̱b.
10 Yage̱ is-u̱ u̱n u̱ no̱m u-cwu̱m,
E̱ de̱ swadu̱ u̱r-ko̱b u-tát
u̱ka to̱k-ne̱ za u̱r-ma.>>
I za-yahuda-ne̱ da e̱
kwu̱mu̱g u-u̱ku̱r
11 U̱m o̱mo̱n u̱r-shu̱t ne̱ u̱ da-o̱: ¿A Isra-ne̱ pu̱kse̱ e̱ he̱'e̱ e̱ za keru̱ u̱r-yu̱ne̱ da? Iya o̱ da! Remu̱ ba'as-tu̱ Isra-ne̱ no̱me̱, de̱ wu̱te̱ u̱ku̱r-u̱ teet ne̱t-tu̱ za-Yahuda-ne̱ da, remu̱ Isra-ne̱ nom-u̱t shu̱b-u̱r u̱n.
12 Ba'as-u̱t Isra-ne̱ haatu̱n kom u-Ru̱ u̱-me̱ u-dak u-be̱e̱t. Tu̱msu̱ ko̱b-du̱ do̱rru̱ u̱s-remu̱ u̱n haatu̱n kom u-Ru̱ u̱du̱ i za-Yahuda-ne̱ da. M-vaste̱, a Isra-ne̱ ya jab u̱du̱ u-Ru̱, in be̱e̱t in do̱'e̱ no̱m-du̱ u̱r-so̱ sok remu̱ kom u-Ru̱.
13 U̱m o̱ u̱s-rem u̱ no̱ ne̱ i-za-Yahuda-ne̱ da. Me̱ Wa-to̱m-u̱ Ye̱so̱ wa u̱du̱ i za-Yahuda-ne̱ da, u̱m o̱ u̱t-u̱k u̱ remu̱ pama-u̱s ri.
14 U̱ remu̱ iya, u̱m o̱ haan jiya me̱ keru̱ wadu̱ Isra-ne̱ e̱ no̱m u̱r-shu̱b, o̱ u̱t-wa u̱ e̱ke̱n u̱ kum u-u̱ku̱r.
15 Se̱di ba na gu̱gmu̱ u̱n, wa'ag is-yu̱ u-pus yu̱ ho̱ngu̱sse̱ ne̱t-tu̱ u-dak u̱t-be̱e̱t u-Ru̱ ne̱. Da-u̱ Yahuda-ne̱ ya jab u̱du̱ Ye̱so̱, shu̱'u̱te̱ u̱ka mu̱u̱tu̱n ne̱t-u̱ mare̱ u̱r-fat!
16 Ba Ibrahi u̱ e̱ke̱n u̱so-tu̱ u̱so-u̱t in ne̱ o̱o̱ge̱ u-he̱n ne̱, iya o̱ ko̱-u̱r e̱ do̱te̱ u̱t-shu̱'u̱t u-he̱n ne̱ u̱ka ne̱t haste̱ ro̱p-du̱ hyu̱ u-gan wa hatu̱n de̱ u̱du̱ u-Ru̱, de̱ u̱t-shu̱'u̱t u-he̱n ne̱. Shu̱'u̱te̱ u̱zu̱ gu̱g-du̱ hyu̱ de̱ u̱r-be̱e̱t de̱ u̱t-shu̱'u̱t u-he̱n ne̱. Tu̱msu̱ ana yase̱ gu̱r-yu̱ u-te na hu̱u̱t u̱du̱ u-Ru̱, ya u̱t-shu̱'u̱t u-he̱n ne̱, ko̱ske̱ u̱zu̱ ko̱ fe̱-su̱ te-u ya se̱ o̱tte̱ u-he̱n.
17 No̱mo̱n u̱s-dorog u̱zu̱: ana kwu̱pre̱ fe̱-su̱ te-su̱ ze̱tun su̱ na se̱re̱, se̱ na ku̱b fe̱-yu̱ te-yu̱ ze̱tun yu̱ u̱r-do̱g na dame̱ u̱r-kot. No̱ i za ne̱t-tu̱ Yahuda-ne̱ da, no̱ o̱ u̱ka te-yu̱ ze̱tun yu̱ u̱r-do̱g, ana dame̱ no̱ u̱s-gu̱r ne̱, no̱ de̱ kwu̱m-du̱ nya-u̱ u-Ru̱ remu̱ Yahuda-ne̱.
18 Remu̱ iya, a no̱ no̱m u̱t-u̱k u̱zu̱ no̱ ze̱k fe̱-u̱s se̱ su̱ na kupse̱ da. A no̱ o̱ u̱t-u̱k baksu̱n u̱zu̱, a no̱ shipe̱ u̱s-gu̱r da, se̱di gu̱r-se̱ shipe̱ no̱.
19 Se̱di i-za-Yahuda-ne̱ da e̱ u̱t-kere̱ u̱t-zu̱, <<Ru̱-u̱ kwu̱pu̱rte̱ fe̱-su̱ Yahuda-ne̱ remu̱ wa samte̱ in u̱s-gu̱r ne̱.>>
20 Nip-to̱, remu̱ ko̱b-du̱ yadu̱ jab-u̱ Yahuda-ne̱, de̱ wu̱te̱ na kwu̱pu̱rte̱ u̱s-fe̱ du̱gu̱ u̱s-gu̱r. Tu̱msu̱ no̱ remu̱ yadu̱ jab-u̱ no̱ o̱ no̱ kumte̱ fu̱n-yu̱ u̱t-to̱st u̱s-gu̱r. Se̱di a no̱ no̱m u̱t-u̱k da se̱di na ho̱g u-gye̱r.
21 A Ru̱-u̱ yage̱ Yahuda-ne̱ da, u̱na o̱ u̱ka fe̱-su̱ u-te su̱ u̱r-taku̱n, wa za hen u̱ yagu̱ no̱ da.
22 Iya-o̱ Ru̱-u̱ do̱te̱ keru̱ ko̱su̱ no̱m-u̱t so̱-to̱ wa u̱ ryab-u̱s wa ne̱. Wa ko̱su̱ a-u̱t-ba'as ryab-u̱s wa, se̱di wa no̱mu̱ no̱m-u̱t so̱-to̱ wa. Se̱di a no̱ kabe̱ o̱ jab gan da, na de̱ kwu̱p-ru̱ no̱ du̱gu̱ u̱s-gu̱r.
23 A Isra-ne̱ byu̱r-ne̱ du̱gu̱ ko̱b-du̱ yadu̱ jab, na same̱ e̱ u̱s-gu̱r ne̱, remu̱ zu̱ Ru̱-u̱ de̱ keru̱ muutu̱ u̱n u̱du̱ gu̱r-u ya.
24 No̱ i-za-Yahuda-ne̱ da, no̱ o̱ u̱ka te-yu̱ ze̱tun yu̱ u̱r-do̱g yu̱ na kupse̱, se̱ Ru̱-u̱ same̱ ya u̱ matu̱ te-yu̱ ze̱tun ne̱ yu̱ na se̱re̱. Yahuda-ne̱ e̱ o̱ u̱ka te-yu̱ na se̱re̱ yu̱ so̱-ya, za shu̱'u̱tu̱ no̱m-u̱ m-no u̱ Ru̱-u̱ same̱ u̱-fe̱ yu̱ Yahuda-ne̱ u̱ do̱m-u̱ u-gu̱r yu̱ e̱ rwu̱tu̱n da.
Ru̱-u̱ o̱ ho̱g-du̱ o̱n-du̱
u̱t-ne̱t u̱t-be̱e̱t
25 No̱ hu̱u̱b-u̱t ri, u̱m za u̱ssa no̱ shu̱'u̱t a-ko̱b-du̱ m-nap ne̱ u̱ remu̱ no̱m-u̱ o̱ yase̱ da, taas u̱ no̱ shu̱'u̱t a u̱t-u̱k ne̱ da. Isra-ne̱ u-tát e̱ de̱ shu̱'u̱tu̱ a-ko̱b-du̱ ho̱g-du̱ u̱s-rem ne̱, se̱ i za-Yahuda-ne̱ u-tát i Ru̱-u̱ dage̱ e̱ o̱ yadu̱ jab u̱du̱ Kiristi.
26 Iya-o̱ Isra-ne̱ be̱e̱t e̱ do̱te̱ kwu̱m-du̱ u-u̱ku̱r, u̱ka Rem-su̱ u-Ru̱ zu̱tte̱:
<<Wa-u-u̱ku̱r de̱ rwu̱u̱n u̱ Urusharima,
wa de̱ hastu̱ jab-u̱ ko̱b-du̱ kab-du̱
u̱s-rem du̱gu̱ ko̱-u̱r Yakubu.
27 Sin-se̱ o̱ este̱du̱ u̱s-rem
u̱ ri u̱ u̱n ne̱,
u̱m de̱ no̱mu̱ u̱n ho̱-du̱ ba'as-u̱t u̱n.>>
28 Yahuda-ne̱ shu̱'u̱te̱ hu̱u̱b-tu̱ Rem-su̱ M-re̱me̱r, tu̱msu̱ o̱ shu̱'u̱te̱ swu̱r-m no̱ a-za-Yahuda-ne̱ remu̱ zu̱ e̱ gu̱gu̱mte̱ Rem-su̱ m-Re̱me̱r, se̱di Ru̱-u̱ dak Yahuda-ne̱. Ru̱-u̱ o̱ cwan-u̱t u̱n remu̱ i mate̱ u̱so-tu̱ u̱so-u̱t u̱n.
29 In nu̱pu̱ste̱ u̱zu̱ Ru̱-u̱ re̱e̱g shu̱ u̱ cwan-u̱t u̱n ne̱ remu̱ zu̱ wa za kab-du̱ nya-u̱ wa no̱mu̱ u̱n da ko̱ ne̱t-tu̱ wa dage̱ to̱ ka wa u̱t-to̱.
30 U̱r-taku̱n no̱ i za-Yahuda-ne̱ da, no̱ no̱ng ko̱b-du̱ do̱rru̱ u̱s-rem, se̱di u̱ da-o̱ no̱ kwu̱mu̱g o̱n-du̱ u-Ru̱ remu̱ ko̱b-du̱ do̱rru̱ u̱s-rem u̱ Yahuda-ne̱.
31 U̱ da-o̱ Yahuda-ne̱ u̱ hi-u̱r e̱, e̱ shu̱'u̱te̱ a-ko̱b-du̱ do̱rru̱ Rem-su̱ u-Ru̱ u̱ka e̱ do̱te̱ kwu̱m-du̱ o̱n-du̱ u-Ru̱, o̱n-du̱ Ru̱-u̱ ko̱su̱ i-za-Yahuda-ne̱ da.
32 Ru̱-u̱ mu̱tte̱ u̱t-ne̱t u̱t-be̱e̱t Yahuda-ne̱ u̱ i za-yahuda-ne̱ da a-ko̱b-du̱ do̱rru̱ u̱s-rem. Ru̱-u̱ no̱mo̱g iya remu̱ wa ko̱ste̱ u̱t-ne̱t u̱t-be̱e̱t o̱n-u̱r wa.
U̱t-vam u̱du̱ u-Ru̱
33 Nip-tu̱ ra-du̱ ve̱r-su̱ u-Ru̱ tu̱msu̱
nap-m rò zatte̱ u̱r-ma da,
kwu̱p-du̱ u̱s-rem u̱ rò ze̱k u̱r-shu̱t.
No̱m-tu̱ wa o̱ u̱t-no̱m
ze̱k nap-mu̱ ne̱t.
34 U̱ka Rem-su̱ u-Ru̱ zu̱tte̱:
<<¿Wana nape̱ jab-u̱ Yawe?
¿Wana o̱ hu̱u̱b-u̱ rò,
wana he̱e̱se̱ yadu̱ wu̱n u̱s-rem?>>
35 <<Waku̱n zaar wu̱ de̱ yadu̱ u-Ru̱ o̱ko̱n no̱m-o̱
u̱ wa yage̱ za kum du̱gu̱-du̱ u-Ru̱ da.
Remu̱ iya waku̱n zaar wu̱ de̱ u̱t-zu̱
u̱ Ru̱-u̱ to̱p wa da.>>
36 Remu̱ du̱gu̱-du̱ wu̱n,
tu̱msu̱ u̱du̱ wu̱n,
tu̱msu̱ u̱du̱ du̱ wu̱n de̱
na no̱m-te̱ ko-uyan.
Yage̱ fu̱bu̱sse̱ tu̱ shu̱'u̱t u̱du̱ wu̱n
m-mo̱mmo̱! U̱ shu̱'u̱t iya!