3
Ru̱-u̱ o̱ no̱m-du̱ no̱m-u̱
wa zu̱ wa u̱t-no̱m
1 ¿De̱ku̱n se̱ge̱-de̱ o̱ro du̱ Yahuda-ne̱ kume̱ du̱ i-za-Yahuda-ne̱ kumte̱ da? ¿Yan-o̱ ne̱t de̱ u̱t-kwu̱m ana no̱mu̱ wa u̱r-pe̱s?
2 Se̱ge̱-du̱ o̱ro du̱ ne̱t do̱'e̱ u̱t-kwu̱m u̱s-fu̱n u-tát! Ru̱-u̱ ya'aste̱ rem-u̱s wa u̱du̱ Yahuda-ne̱ remu̱ e̱ got se̱ u̱r-zwar ne̱.
3 Yahuda-ne̱ u-tát e̱ zatte̱ yadu̱ jab u̱du̱ u-Ru̱ u̱ka e̱ nomte̱ este̱du̱ u̱s-rem u̱zu̱ u̱t-ya jab da. Waku̱n u̱t-kere̱ u̱t-shu̱t u̱zu̱, <<¿No̱ o̱ m-hyan u̱zu̱ a Yahuda-ne̱ shu̱'u̱te̱ a-ko̱b-du̱ yadu̱ jab, u̱t-wa u̱ Ru̱-u̱ yage̱ no̱m-du̱ no̱m-u̱ wa nom-tu̱ Yahuda-ne̱ es-du̱ u̱s-rem?>>
4 Za u̱t-no̱me̱ da iya! Ko̱ ne̱t-ne̱ be̱e̱t shu̱'u̱te̱ a-u̱s-bi, u-Ru̱ wa-u̱t-nip wa, u̱ka Rem-su̱ u-Ru̱ zu̱tte̱:
<<Remu̱ ne̱t-ne̱ hyen-u̱t u̱zu̱ no̱m-u̱
bo̱ ware̱ u̱ mo̱ttu̱ ba'as-u̱t u̱n nip-to̱,
tu̱msu̱ bo̱ re̱ u̱r-ko̱rro̱ ana
o̱ kwu̱p-du̱ rem-u̱s ró.>>
5 Abite̱ no̱m-u̱t yo̱-to̱ in o̱ u̱t-no̱m ko̱ske̱ no̱m-u̱t so̱-to̱ tu̱ Ru̱-u̱ no̱me̱, ¿In de̱e̱n u̱t-zu̱ Ru̱-u̱ no̱ng ho̱n-ho̱n da a wa ya' in u̱r-ko̱b? (Sin-se̱ dorog-su̱ u̱r-ma ne̱t se̱.)
6 Za u̱t-no̱me̱ iya da! A shu̱'u̱te̱ Ru̱-u̱ no̱me̱ ho̱n-ho̱n da ko̱-uyan da, ¿re̱ne̱ o̱ wa do̱te̱ no̱mu̱ ne̱t-tu̱ u-dak kwu̱p-du̱ u̱s-rem ho̱n-ho̱n ne̱?
7 Waku̱n wa u̱t-kere̱ u̱t-zu̱, <<A mu̱ne̱ u̱zu̱ bis-u̱s ri hatu̱n m-swu̱r mu̱ nip-tu̱ Ru̱-u̱ u̱ swu̱r-mu̱ ze̱g-m wa ne̱, ¿Remu̱ u-yan o̱ Ru̱-u̱ do̱te̱ kwu̱pu̱ me̱ u̱s-rem u̱zu̱ me̱ wa-u̱t-ba'as wa?>>
8 To̱ko̱n ne̱t-to̱ ke̱k-tu̱ it u̱s-rem u̱zu̱ it zu̱u̱g, <<Yage̱ it no̱m u̱t-ba'as, remu̱ no̱m-u̱t so̱-to̱ nom-u̱t.>> Se̱di Ru̱-u̱ de̱ kwu̱pu̱ u̱n u̱s-rem ho̱n-ho̱n.
Waku̱n za ne̱t-u̱ so̱-o̱ da
9 ¿Yan-o̱ in do̱'e̱ u̱t-zu̱? ¿In Yahuda-ne̱ ze̱g m-ze̱g i-za-Yahuda-ne̱ da? Ko̱ o̱ko̱n, na ko̱sku̱ u̱zu̱ u̱t-ne̱t u̱t-be̱e̱t! U̱ Yahuda-ne̱ u̱ i-za-Yahuda-ne̱ da ganse̱ na o̱ye̱ remu̱ be̱b-du̱ u̱t-ba'as de̱ o̱ dor-tu̱ na.
10 U̱-me̱ Rem-su̱ u-Ru̱, na panu̱g no̱m-u̱t tun-to̱ u̱t-be̱e̱t:
<<Ne̱t-u̱ jab-u̱ so̱-o̱ zarra,
ko̱ wa-gan;
11 waku̱n zaar wu̱ o̱ m-nap ne̱ da,
waku̱n zaar wu̱ o̱ sa-u̱ u-Ru̱ da.
12 Ne̱t-ne̱ be̱e̱t e̱ yakke̱ fu̱n-yu̱ u-Ru̱,
Ne̱t-ne̱ be̱e̱t e̱ zatte̱ fu̱n da;
Waku̱n zaar wu̱ nome̱ no̱m-u̱t so̱-to̱ da,
ko̱ wa-gan.>>
13 <<Nu-u̱t e̱ o̱ u̱ka u̱t-sag tu̱ o̱ u̱r-hu̱k,
Rem-u̱t e̱ shu̱u̱g u̱s-bi.>>
<<Rem-u̱s e̱ u̱ka m-rab mu̱ fa-u yo̱-ya.>>
14 <<Nu-u̱t e̱ shu̱u̱g u̱ rem-u̱s yo̱-se̱,
u̱s-pyap ne̱.>>
15 <<E̱ waaste̱ ho̱-du̱ ne̱t da.
16 Ko̱ he̱ e̱ hu̱u̱te̱ e̱ hatu̱n u-naas u̱ namu̱ jab ne̱
u̱du̱ u̱t-ne̱t tu̱msu̱ hi-du̱ war'e̱ ne̱.
17 E̱ nak fu̱n-yu̱ res-du̱ jab da.>>
18 <<Gye̱r-u u-Ru̱ zaar u̱ jab-u̱s u̱n da.>>
19 U̱ da-o̱ in nak u̱zu̱ Yahuda-ne̱ e̱ na u̱t-sa e̱ do̱r bo̱r-tu̱ u-Ru̱ tu̱ Mosa pane̱. Na no̱mo̱g iya hen remu̱ ne̱t-tu̱ taagte̱ no̱m-u̱t war, tu̱msu̱ Ru̱-u̱ de̱ kwu̱pu̱ ne̱t-tu̱ dak-u uno̱ u-be̱e̱t u̱s-rem.
20 Remu̱ iya, waku̱n zaar wu̱ de̱ u̱t-shu̱'u̱t wa za u̱t-ba'as remu̱ do̱rru̱ no̱m-u̱ bo̱r-tu̱ zu̱ na no̱m da. No̱m-u̱ bo̱r-tu̱ nome̱ o̱ ko̱su̱ ne̱t u̱ka ba'as-u̱t wa o̱tte̱.
Yadu̱ jab u̱du̱ Ye̱so̱ wa'ag
in a-jab-u̱s so̱-se̱ ne̱
21 Se̱di u̱ da-o̱ Mosa u̱ a-warru̱ Rem-su̱ u-Ru̱ ne̱ ko̱ske̱ in fu̱n-yu̱ yadu̱ jab-u̱ so̱-o̱, za remu̱ do̱rru̱ no̱m-tu̱ bo̱r-tu̱ u̱t-sa da.
22 Uno̱ jab-u̱ so̱-o̱ du̱gu̱-du̱ u-Ru̱ hagu̱n du̱gu̱-du̱ yadu̱ jab u̱du̱ Kiristi u̱du̱ i ya'e̱ u̱t-nip be̱e̱t. Mo̱ko̱n ku̱u̱k-mo̱ zaar da.
23 Ne̱t-ne̱ kowan no̱ng u̱t-ba'as, tu̱msu̱ e̱ no̱mo̱g m-ra u̱ sek-mu̱ u-Ru̱ ne̱.
24 Tu̱msu̱ Ru̱-u̱ no̱ng se̱ge̱-u̱r wa remu̱ nya-u̱ wa no̱mu̱ in jab gan. Wa no̱mo̱g iya remu̱ Kiristi Ye̱so̱ wu̱ rure̱ in du̱gu̱ swadu̱ u̱r-ko̱b du̱ u̱t-ba'as.
25 Ru̱-u̱ ya'aste̱ Ye̱so̱ u̱ka u̱r-to̱o̱g du̱ hastu̱ u̱t-ba'as. Wa no̱mo̱g iya remu̱ wa mu̱tte̱ ne̱t-ne̱ za u̱t-ba'as u̱du̱ u-Ru̱ da-u̱ e̱ ya jab u̱du̱ Ye̱so̱ wu̱ mare̱ u̱ remu̱ in tu̱msu̱ wa azu̱g hyu̱-m wa. To̱o̱g-u̱ o̱ ko̱ske̱ u̱zu̱ Ru̱-u̱ zatte̱ m-ku̱u̱k da, tu̱msu̱ remu̱ gag-du̱ jab-u̱ wa, wa ruuste̱ u̱ fu̱n-u̱ ba'as-tu̱ e̱ no̱me̱ u-dim wa yaag u̱n u̱r-ko̱b da.
26 Ru̱-u̱ no̱ng gag-du̱ jab-u̱ uno̱ da-o̱ remu̱ wa ko̱ste̱ u̱zu̱ wa o̱tte̱ jab-u̱ so̱-o̱. Tu̱msu̱ ne̱t be̱e̱t wu̱ ya' jab u̱du̱ Ye̱so̱ wa de̱ u̱t-shu̱'u̱t wa jab-u̱ so̱-o̱.
27 U̱ da-o̱ hen, ¿yan-o̱ na do̱te̱ u̱t-u̱k? O̱ko̱n zarra! Ru̱-u̱ za kab-du̱ ne̱t remu̱ zu̱ a o̱ do̱rru̱ bo̱r-u̱t Mosa da, se̱di wa kab i o̱ yadu̱ jab u̱du̱ Ye̱so̱ u̱ to̱o̱g-u̱ wa ne̱.
28 In nak u̱zu̱ Ru̱-u̱ o̱ kab-du̱ u̱t-ne̱t remu̱ yadu̱ jab-u̱ e̱ za remu̱ do̱rru̱ u-bo̱r da.
29 ¿Ru̱-u Yahuda-ne̱ o̱ war-o̱? ¿Ru̱-u a-za Yahuda-ne̱ wa ko̱ e̱ da? Iya o̱, Ru̱-u̱ ne̱t-ne̱ be̱e̱t o̱.
30 Ru̱-o̱ u-gan, wa de̱ muutu̱ Yahuda-ne̱ e̱ shu̱'u̱t a-jab-u̱s so̱-se̱ u̱du̱ wa, remu̱ yadu̱ jab-u̱ u̱n. Tu̱msu̱ muut i za-Yahuda-ne̱ da a-jab-u̱s so̱-se̱ u̱du̱ wa, remu̱ yadu̱ jab-u̱ u̱n.
31 ¿No̱ o̱ m-hyan in mu̱u̱tu̱n bo̱r-tu̱ Ru̱-u̱ yase̱ Mosa m-zan u̱ remu̱ mo̱ttu̱ ya-du̱ jab? Ko̱ cashi iya o̱ da! Se̱di a inya jab u̱du̱ Ye̱so̱, u̱t-ko̱se̱ u̱zu̱ bo̱r-u̱t Mosa o̱tte̱ m-shin.