6
Kiristi getu̱mte̱ be̱b-du̱ u̱t-ba'as
1 ¿Yan-o̱ in do̱'e̱ u̱t-zu̱? ¿In de̱e̱n u̱ re-du̱ shu̱ u̱ no̱m-du̱ u̱t-ba'as remu̱ wa jaaste̱ ba'as-u̱t in tu̱msu̱ wa swu̱ru̱ in u-nya?
2 Za u̱t-no̱me̱ iya da! A in kabe̱ Ye̱so̱, no̱m-tu̱ wadu̱ in u̱ yu̱-du̱ u̱t-ba'as to̱ maru̱g, ¿re̱ do̱te̱ u̱t-no̱m in ha u̱r-yu̱ u-me̱ u̱t-ba'as?
3-4 U̱ka na no̱m-tu̱ in u̱t-yu̱bu̱sse̱ m-bu̱, in maru̱g tu̱msu̱ na dok in u̱ Kiristi ne̱ u̱ka wa mu̱rte̱ tu̱msu̱ na dok wa. Na no̱ngu̱ in u̱t-yu̱bu̱sse̱ m-bu̱ remu̱ in nom-u̱t yu̱-u̱r po-de̱ u̱ka u̱s-gan, u̱ka Ye̱so̱ yu̱nte̱ du̱gu̱ m-mar, u̱-me̱ fu̱'u̱bse̱-tu̱ u-Ru̱ Uso-u in. Iya o̱ in kumte̱ fat-u̱r po-de̱.
5 Ba in shu̱'u̱te̱ u̱s-gan u̱ Kiristi ne̱ remu̱ mar-m Kiristi, iya o̱ hen in do̱te̱ u̱t-shu̱'u̱t u̱s-gan u̱ yu̱ne̱-u̱r wa u̱r-fat u̱ka wa yu̱nte̱.
6 U̱ka in nu̱pte̱ u̱zu̱ na taru̱g yu̱-du̱ u̱t-ba'as u̱ in u̱-do̱m u-kan da-u̱ na tare̱ Ye̱so̱ u̱-do̱m u-kan, taas u̱ ba'as-tu̱ kum-u̱t u̱r-be̱b u̱ jab-u̱s in da. Na no̱mo̱g sin-se̱ u̱s-be̱e̱t taas in shu̱'u̱t to̱k-ne̱ i u̱t-ba'as da.
7 In nak u̱zu̱ ba'as-tu̱ zatte̱ u̱r-faru̱k u̱ do̱m-u̱ ne̱t-tu̱ mare̱ da.
8 Ba shu̱'u̱te̱ u̱zu̱ in maru̱g u̱ Kiristi ne̱, in o̱ yadu̱ jab u̱zu̱ in do̱'e̱ u̱r-fat u̱ wa ne̱.
9 In nakku̱n u̱zu̱ Ru̱-u̱ yu̱nste̱ Kiristi du̱gu̱ m-mar, tu̱msu̱ wa zamu̱n u̱t-swu̱r m-mar da. Mar-mu̱ zatte̱ u̱r-be̱b u̱du̱ Ye̱so̱ da.
10 Remu̱ mar-mu̱ wa mare̱, ba'as-tu̱ zatte̱ u̱r-be̱b u̱-me̱ wu̱n da, tu̱msu̱ u̱ da-o̱ wa o̱ yu̱-du̱ no̱mu̱ u-Ru̱ u̱t-fu̱'u̱bse̱.
11 Remu̱ iya hen, kab hi-u̱r ró u̱ka wu̱ mare̱ taas u̱ ba'as-tu̱ dor-u̱t wa da, se̱di bo̱ kab hi-u̱r ró wa u̱r-fat u̱du̱ u-Ru̱ u̱-me̱ Kiristi Ye̱so̱.
12 Remu̱ iya, a no̱ yage̱ u̱ ba'as-tu̱ no̱m u̱r-faru̱k u̱-me̱ war-u̱t no̱ tu̱ de̱ m-mar da, taas no̱ do̱r zwarru̱ no̱m-u̱ war-u̱t no̱ o̱ u̱t-sa da.
13 A no̱ yase̱ o̱g-tu̱ war-u no̱ to̱ to̱ shu̱'u̱t cwu̱-tu̱ no̱m-du̱ u̱t-ba'as da. Se̱di no̱ yase̱ hi-u̱r no̱ u̱du̱ u-Ru̱, remu̱ zu̱ no̱ o̱gu̱ maru̱g se̱di u̱ da-o̱ no̱ o̱tte̱ fat-u̱r po-de̱. Remu̱ iya yaase̱ war-u no̱ u̱ shu̱'u̱t u̱ka cwu̱-tu̱ m-ank u̱ no̱m-du̱ no̱m-u̱t so̱-to̱ remu̱ fu̱'u̱bse̱-tu̱ u-Ru̱.
14 A no̱ yage̱ u̱ ba'as-tu̱ no̱m u̱r-faru̱k u̱-me̱ no̱ da, remu̱ zu̱ bo̱r-tu̱ zatte̱ u̱r-be̱b u̱-me̱ no̱ da. Se̱di, no̱mo̱n u̱r-yu̱ u̱-me̱ shin-mu̱ nya-u̱ u-Ru̱.
No̱mo̱n u̱r-yu̱ u̱ka to̱k u-Ru̱ u̱
no̱m-du̱ pama-u̱ jab-u̱ so̱-o̱
15 Ba shu̱'u̱te̱ u̱zu̱ nya-u u-Ru̱ u̱ku̱rte̱ in du̱gu̱ u̱t-bo̱r, ¿u̱t-shu̱'u̱t u̱zu̱ na re̱ shu̱ u̱ no̱m-du̱ u̱t-ba'as ne̱? O'o! Ko̱ ca!
16 ¿No̱ nak u̱zu̱ a no̱ yaase̱ hi-u̱r no̱ u̱du̱ waku̱n u̱ka to̱k-ne̱ nomte̱ m-to̱k, no̱ shu̱'u̱te̱ to̱k-u̱ wa, remu̱ zu̱ no̱ o̱ do̱rru̱ wa da? No̱ keru̱ shu̱'u̱tu̱ to̱k-ne̱ u̱t-ba'as tu̱ hu̱u̱tu̱ ne̱t-ne̱ u̱du̱ m-mar, ko̱ no̱ keru̱ do̱rru̱ Rem-su̱ u-Ru̱ su̱ de̱ wadu̱ ne̱t u̱ yu̱-du̱ jab-u̱ so̱-o̱.
17 Se̱di u̱t-vam u̱du̱ u-Ru̱, remu̱ u̱r-taku̱n no̱ o̱o̱g m-to̱k u̱-me̱ u̱t-ba'as, se̱di u̱ da-o̱ no̱ kabu̱g ko̱se̱-tu̱ it no̱mu̱ no̱ jab gan.
18 Ru̱-u̱ ruute̱ no̱ du̱gu̱ to̱k-mu̱ u̱t-ba'as, no̱ shu̱'u̱te̱ to̱k-ne̱ u̱ no̱m-du̱ yu̱-du̱ jab-u̱s so̱-se̱.
19 U̱m ko̱sku̱ no̱ sha-mu̱ u̱s-rem mu̱ to̱k remu̱ no̱ gotu̱ u̱r-nu, remu̱ jab-u̱ u̱r-ma ne̱t. U̱r-taku̱n no̱ o̱o̱gu̱ yasu̱ o̱g-tu̱ war-u̱t no̱ u̱ no̱m-du̱ no̱m-tu̱ za u-he̱n tu̱msu̱ u̱ swu̱rru̱ no̱m-u̱t yo̱-to̱. Remu̱ iya u̱ da-o̱, yasu̱n o̱g-tu̱ war-u̱t no̱ remu̱ no̱ no̱m-u̱t yu̱-du̱ jab-u̱s so̱-se̱ u̱ no̱ shu̱'u̱te̱ u-he̱n ne̱.
20 U̱ da-u̱ dim, no̱ o̱o̱g to̱k-ne̱ u̱t-ba'as, waku̱n wa'ag no̱ u̱ no̱m-du̱ no̱m-u̱t so̱-to̱ u̱r-be̱b da.
21 U̱ da-u̱ dim no̱ no̱mo̱g no̱m-tu̱ no̱ ho̱g-du̱ e̱'-mu̱ no̱m-du̱ to̱ u̱ da-o̱. ¿Yan to̱p-o̱ no̱ kume̱ remu̱ no̱m-du̱ no̱m-u̱t to̱? To̱p-u̱ no̱m-u̱t to̱ mar-mo̱.
22 Se̱di u̱ da-o̱, Ru̱-u̱ rwu̱ru̱g no̱ du̱gu̱ u̱t-ba'as, no̱ shu̱'u̱te̱ to̱k-ne̱ u-Ru̱. Nya-u u-Ru̱ u̱ no̱ de̱ u̱t-kwu̱m o̱ jab u-he̱n, tu̱msu̱ no̱ de̱ kwu̱m-du̱ fat-du̱ za u̱r-ma.
23 To̱p-u̱ u̱t-ba'as mar-mo̱, se̱di nya-u u-Ru̱ fat-du̱ za u̱r-ma du̱ u̱-me̱ Ye̱so̱ Kiristi Wa-ko-uyan in.