7
Ne̱t-ne̱ u̱r-zo̱ngu u-gan u̱ u̱t-shik u̱t-yu̱r
u̱t-nas (144,000) i na wa'e̱ u̱s-nap
1 Da-u̱ taase̱ u̱m hyu̱n a-to̱mu̱ u-Ru̱ ne̱ nas u̱ ees u̱ jwu̱n-tu̱ u-dak u̱t-nas. U̱n o̱ m-shu̱p u̱ mya-mu̱ u-dak ne̱ u̱t-nas remu̱ e̱ hooste̱ m-mya u̱t-fu̱ru̱n u-do̱m u-dak ko̱ u̱-me̱ m-sa ne̱, ko̱ u̱-do̱mu̱ yaku̱n te-ya.
2 Se̱ u̱m hyu̱n waku̱n wa-to̱m u-Ru̱ wa o̱o̱n du̱gu̱ gas-u̱ ho̱-du̱ rwu̱u̱tu̱n, wa o̱ m-shu̱p u̱ nap-su̱ Ru̱-u̱ u̱r-fat ne̱. Wa no̱mu̱ a-to̱mu̱ u-Ru̱ ne̱ nas i na ya'e̱ u̱r-ke̱r e̱ ho̱nse̱ u-dak u̱ m-sa ne̱ wa o̱ u̱t-jar u̱ cwar-u yat-ya.
3 Wa zu̱, <<A no̱ ho̱nse̱ u-dak ko̱ m-sa ko̱ u̱s-te se̱ it wa'ag u̱s-nap u̱ po̱ng-tu̱ to̱k-ne̱ u-Ru̱>>
4 Waku̱n waru̱ me̱ tat-u̱ u̱t-ne̱t i na wa'e̱ u̱s-nap du̱gu̱ me̱ ko̱-tu̱ Isra-ne̱ u̱t-be̱e̱t, u̱r-zo̱ngu u-gan u̱ u̱t-shik u̱t-yu̱r u̱t-nas (144,000).
5 Du̱gu̱ me̱ ko̱-u̱r Yahuda 12,000,
du̱gu̱ me̱ ko̱-u̱r Rube̱n 12,000,
du̱gu̱ ko̱-u̱r Gad 12,000,
6 du̱gu̱ ko̱-u̱r Ashu̱r 12,000,
du̱gu̱ ko̱-u̱r Naptari 12,000,
du̱gu̱ ko̱-u̱r Manase 12,000,
7 du̱gu̱ ko̱-u̱r Simiyo̱n, 12,000,
du̱gu̱ ko̱-u̱r Re̱wi 12,000,
du̱gu̱ ko̱-u̱r Issakar 12,000,
8 du̱gu̱ ko̱-u̱r Ze̱be̱run 12,000,
du̱gu̱ ko̱-u̱r Yusuhu 12,000,
du̱gu̱ ko̱-u̱r Banyamin 12,000.
Mo̱ro̱g-u̱r yat-de̱ u̱ to̱ggo̱-su̱
m-wu̱r ne̱ su̱ pus-se̱
9 Da-u̱ taase̱ u̱m hyu̱n mo̱ro̱g-du̱ u̱t-ne̱t u-tát tu̱ waku̱n zare̱ kerru̱ u̱t-ogor da, du̱gu̱ ko̱-u̱-he̱ dak-o̱, u̱t-ko̱ ne̱, u̱t-ne̱t ne̱ u̱ u̱r-rem ne̱. U̱n o̱ u̱ ees u-shu̱ pora-du̱ u̱r-faru̱k tu̱msu̱ u̱-shu̱ Kag-u̱r U̱r-ca ne̱. U̱n o̱ m-wa u̱ to̱ggo̱-su̱ m-wu̱r su̱ pus-se̱ ne̱ tu̱msu̱ m-shu̱p u̱ ran-u̱ u-dabino̱ ne̱ u̱ kom-u̱t u̱n.
10 Tu̱msu̱ u̱n o̱ u̱t-jar u̱ cwar-su̱ m-yat:
<<U̱ku̱r-u̱ o̱o̱n du̱gu̱-du̱ Ru̱-u it
wu̱ o̱ shu̱'u̱t u̱-do̱mu̱ pora-du̱ u̱r-faru̱k,
tu̱msu̱ du̱gu̱-du̱ Kag-u̱r U̱r-ca!>>
11 Tu̱msu̱ a-to̱mu̱ u-Ru̱ ne̱ be̱e̱t e̱ o̱ ees m-gan u̱ pora-du̱ u̱r-faru̱k ne̱ tu̱msu̱ m-gan u̱t-ne̱nge̱n ne̱ tu̱msu̱ m-gan u̱ no̱m-tu̱ u̱r-fat u̱ to̱ ne̱ u̱t-nas. Tu̱msu̱ u̱n he u-dak u̱ u̱t-jwu̱n, shu̱u̱t u̱n u̱ u-dak u̱-shu̱ pora-du̱ u̱r-faru̱k, tu̱msu̱ u̱n no̱me̱ u-Ru̱ u̱t-huuk.
12 U̱n fu u̱t-se̱p,
<<U̱ shu̱'u̱t iya!
Nu-u so̱-o̱ u̱ m-sek ne̱
tu̱msu̱ u̱s-ve̱r ne̱ tu̱msu̱ u̱t-vam ne̱ tu̱msu̱ m-ze̱g ne̱
tu̱msu̱ m-shin ne̱ tu̱msu̱ u̱r-be̱b ne̱
u̱du̱ Ru̱-u it m-mo̱mmo̱.
U̱ shu̱'u̱t iya!>>
13 Se̱ wagan u̱ te̱k-u̱ ne̱nge̱n-u̱t to̱ ne̱ u̱r-shik u̱t-nas (24) shit me̱, <<Wanne̱ e̱ ine̱ m-wa u̱ to̱ggo̱-su̱ m-wu̱r ne̱ su̱ pus-se̱? Tu̱msu̱ du̱gu̱ he̱ne̱ o̱ u̱n rwu̱u̱ne̱?>>
14 Tu̱msu̱ u̱m zu̱ wu̱n, <<U̱so-u̱ u-bu ri, bo̱ wa o̱ wu̱ nape̱.>>
Se̱ wa zu̱ me̱, <<Ine̱ o̱o̱ge̱ ne̱t-tu̱ rwu̱u̱ne̱ du̱gu̱ da-u̱ swa-u̱ ko̱b-u̱r yat-de̱. E̱ jaaste̱ to̱ggo̱-su̱ m-wu̱r u̱n tu̱msu̱ mo̱ muut u̱n u̱ puse̱ u̱ hyu̱-mu̱ Kag-u̱r U̱r-ca.>>
15 O̱ wa'e̱
u̱n o̱tte̱ u̱ ees u̱-shu̱ pora-du̱ u̱r-faru̱k du̱ u-Ru̱
tu̱msu̱ u̱n o̱ no̱mu̱ wa u̱t-huuk u-ho̱ u̱ m-gye̱p ne̱
u̱-me̱ be-du̱ u̱r-shu̱'u̱t du̱ u-Ru̱.
Tu̱msu̱ wu̱ o̱ shu̱'u̱t u̱-do̱mu̱ pora-du̱ u̱r-faru̱k
wa do̱'e̱ yadu̱ u̱n be-du̱ u̱r-hure̱.
16 U̱n zamu̱n u̱t-swu̱r m-ho̱g u̱s-me̱r
ko̱ u-swaat m-bu̱ da.
Ho̱-du̱ zamu̱n u̱t-swu̱r m-gap u̱n
ko̱ mo̱ko̱n du̱ng-mo̱ gap u̱n da.
17 Remu̱ Kag-u̱r U̱r-ca ya yu̱ o̱ shu̱'u̱t u̱-do̱mu̱ pora-du̱ u̱r-faru̱k
wa do̱'e̱ u̱t-shu̱'u̱t wu̱ o̱ gwat-du̱ u̱n.
Wa do̱'e̱ hu̱u̱tu̱ u̱n u̱ be-du̱ pe̱r-mu̱ m-bu̱
mu̱ yu̱'e̱ fat-du̱ m-mo̱mmo̱.
Tu̱msu̱ Ru̱-u̱ do̱'e̱ ko̱ku̱ u̱n m-is m-be̱e̱t du̱gu̱ is-u̱ u̱n.