Ran-u u̱r-Taku̱n u̱ Burus pane̱
Timoti
1
U̱s-vu̱k u̱du̱ Timoti
1 Uno̱ ran-o̱ o̱o̱n du̱gu̱-du̱ ri, Burus. U-Ru̱ wu̱ u̱kre̱ in tu̱msu̱ Kiristi Ye̱so̱ ne̱ wu̱ in o̱o̱ge̱ wa-du̱ jab u̱du̱ wa, wa wa'ag me̱ u̱m shu̱'u̱t wa-to̱m-u̱ Kiristi Ye̱so̱.
2 U̱m o̱ pan-du̱ uno̱ ran-o̱ m-ha u̱du̱ ró Timoti wu̱ o̱ u̱ka wa-u̱ u̱t-nip u̱ ri remu̱ u̱zu̱ tu̱msu̱ bo̱ yaag jab u̱-me̱ Kiristi. U̱m no̱ng u̱s-ko̱n u̱du̱ u-Ru̱ u-U̱so u̱ Kiristi Ye̱so̱ Wa-ko-uyan u̱ in, u̱zu̱ wa ya' bo̱ u-nya u̱ u̱r-o̱n u̱ ru̱s-du̱ jab ne̱.
U̱t-him u̱ mo̱t-tu̱ a-ko̱se̱-tu̱ u̱s-bi
3 Da-u̱ u̱m o̱o̱ge̱ m-ha u̱ Makidoniya u̱m zu̱u̱g u̱zu̱ bo̱ shu̱'u̱t u̱-me̱ bo̱-u̱ Afisa remu̱ bo̱ no̱m-tu̱ to̱ko̱n ne̱t-to̱ u-har u̱ku̱n u̱zu̱ u̱n yage̱ ko̱se̱-tu̱ u̱s-bi.
4 Tu̱msu̱ waru̱ u̱n u̱zu̱ u̱n yage̱ muut-u̱ jab-u̱s u̱n u̱du̱ u̱t-kwu̱r u̱ ogor-tu̱ u̱so-tu̱ u̱so-u̱t u̱n tu̱ za u̱r-ma. Go̱-du̱ rem-u̱s se̱ haatu̱n inan ko̱ o̱o̱g ba haatu̱n re̱-u̱ u-shu̱ ank-mu̱ u-Ru̱, u̱ na shu̱u̱se̱ remu̱ yadu̱ jab.
5 Se̱di no̱m-u̱ u̱m u̱t-sa u̱ nak-du̱ u̱t-to̱ ri shu̱u̱s cwan-u̱t to̱, cwan-tu̱ rwu̱u̱ne̱ du̱gu̱ jab-u̱ u-he̱n tu̱msu̱ u̱ jab ne̱ u̱ nape̱ no̱m-u so̱-o̱ u̱ yo̱-o̱ ne̱ u̱ yadu̱ jab-u̱ u̱t-nip ne̱ u̱du̱ u-Ru̱.
6 Se̱di e̱ke̱n ne̱t-ne̱ e̱nkte̱ du̱gu̱ no̱m-u̱t tun-to̱, tu̱msu̱ e̱ byu̱ru̱g u̱-kit u̱du̱ rem-su̱ m-zan.
7 E̱ u̱t-sa e̱ shu̱'u̱t a-u̱t-ko̱se̱ tu̱ bo̱r-u̱t Mosa, se̱di e̱ nak no̱mu̱ e̱ o̱ u̱t-zu̱ ko̱ e̱ nak no̱m-u̱ e̱ o̱ u̱t-war za-u gye̱r-u̱ u̱r-be̱b ne̱ da.
8 In nak u̱zu̱ bo̱r-yu̱ u-Ru̱ o̱ so̱-ya, se̱di se̱ ne̱t-tu̱ no̱ng ko̱se̱-tu̱ to̱ ho̱n-ho̱n.
9 Tu̱msu̱ in nak u̱zu̱ na no̱mu̱g bo̱r-yu̱ u-Ru̱ remu̱ ne̱t-tu̱ o̱o̱ge̱ a-jabu̱ so̱-o̱ ne̱ da. Se̱di na no̱mo̱g to̱ remu̱ i pase̱ bo̱r-yu̱ u-Ru̱ tu̱msu̱ a-yu̱nsu̱ u̱s-jab ne̱, re̱mu̱ i gu̱gme̱ no̱m-du̱ no̱m-u̱ Ru̱-u̱ u̱t-sa tu̱msu̱ a-u̱t-ba'as-ne̱, remu̱ a-za u-he̱n ne̱ u̱ i yu̱te̱ u-Ru̱ m-ze̱g ne̱ da, remu̱ i ho̱ye̱ u̱so-u̱t e̱ u̱ ino-u̱t e̱ ne̱ u̱ i ho̱ye̱ u̱t-ne̱t ne̱,
10 u̱ ne̱t-tu̱ i no̱me̱ m-o̱ ne̱, u̱ campa-ne̱ i rooge̱ u̱ campa-ne̱, u̱ ne̱ta-ne̱ i rooge̱ u̱ ne̱ta-ne̱, u̱ a-hyu̱-u du̱ u̱t-ne̱t ne̱, u̱ a-u̱s-bi ne̱, u̱ a pas-du̱ este̱du̱ u̱s-rem ne̱, u̱ i no̱me̱ o̱ko̱n no̱m-o̱ u̱ ko̱se̱-tu̱ u̱t-nip hose̱ u̱t-no̱m.
11 Ko̱se̱-tu̱ u̱t-nip tun-to̱ eeste̱ u̱ rem-su̱ m-re̱me̱r ne̱ su̱ m-sek su̱ ware̱ mo̱t-tu̱ Ru̱-u̱ nu-u so̱-o̱. Sin-se̱ o̱o̱ge̱ remsu̱ m-re̱me̱r su̱ Ru̱-u̱ ya'u̱ me̱ no-mu̱ no̱m-du̱ bu̱t-tu̱ se̱.
Nya-u̱ Wa-ko-uyan ko̱se̱ Burus
12 U̱m vam-u̱g Kiristi Ye̱so̱, Wa-ko-uyan in, wu̱ ya'u̱ me̱ u̱r-be̱b remu̱ wa kabu̱g me̱ u̱ka ne̱t wu̱ wa do̱'e̱ to̱stu̱ jab-u̱ wa u̱du̱ ri, da-u̱ wa dage̱ me̱ u̱m no̱m pama-u̱s wa.
13 Ho̱to̱, u̱m o̱o̱g waru̱g no̱m-u̱t yo̱to̱ u̱ mo̱t-u̱t wu̱n ne̱. U̱m yaag ne̱t-u̱t wu̱n u̱r-ko̱b, tu̱msu̱ u̱m o̱o̱g yu̱nu̱s-du̱ u̱s-jab u̱du̱ ne̱t-u̱t wu̱n. Se̱di u̱m kwu̱mu̱g u̱r-o̱n rem u̱zu̱ u̱m no̱mo̱g u̱ ko̱b-du̱ m-nap tu̱msu̱ ko̱b-du̱ yadu̱ jab ne̱ u̱-me̱ Kiristi.
14 Tu̱msu̱ Wa-ko-uyan da'u̱ste̱ nya-u wa u-tát u̱ do̱m-u̱ ri u̱ jab-u̱ so̱-o̱ ne̱ u̱ u̱t-cwan ne̱ remu̱ same̱-du̱ u̱t-hi ri u̱ Kiristi Ye̱so̱ ne̱.
15 Sin-se̱ rem-se̱ nip-to̱ tu̱msu̱ yage̱ kowan kab se̱: Kiristi Ye̱so̱ haagu̱n u̱-me̱ u-dak remu̱ wa u̱ku̱rte̱ u̱t-ne̱t du̱gu̱ ba'as-u̱t e̱, tu̱msu̱ u̱-me̱ u̱n me̱ zege̱ u̱t-ba'as.
16 M-ha iya ne̱, Kiristi Ye̱so̱ hog o̱n-u̱r ri, me̱ yu̱ ze̱ge̱ kowan u̱t-ba'as, u̱ remu̱ wa ko̱ste̱ u̱t-ne̱t gag-du̱ jab-u̱ wa u̱ za u̱t-ta. Wa cwan-u̱g u̱zu̱ no̱m-u̱ wa no̱me̱ remu̱ ri o̱ shu̱'u̱t m-sha u̱du̱ u̱t-ne̱t i do̱'e̱ ya-du̱ jab u̱du̱ wa, tu̱msu̱ e̱ kum fat-du̱ m-mo̱mmo̱.
17 U̱ da-o̱ u̱du̱ faru̱k-u̱ za u̱r-ma, wu̱ zaare̱ m-mar da, wu̱ na hyu̱n-te̱ da, wu̱ o̱ u-Ru̱ u-gan kyak, m-ze̱g u̱ m-sek ne̱ shu̱'u̱t u̱du̱ wa m-mo̱mmo̱. U̱ shu̱'u̱t iya.
No̱m-u̱ Timoti de̱ u̱t-no̱m
18 U̱m o̱ no̱mu̱ bo̱ tun-to̱ him-to̱, Timoti, wa-u̱ ri, u̱ka warru̱ no̱mu̱ do̱'e̱ u̱t-no̱m u-shu̱ su̱ na no̱me̱ u̱ mo̱t-u̱t ró ne̱ u̱r-taku̱n, u̱ remu̱ u̱zu̱ a-bo̱ do̱re̱ to̱ bo̱ u̱t-no̱m gag-m u̱ka wa m-gag so̱-wa remu̱ nip-tu̱ Rem-su̱ m-Re̱me̱r,
19 bo̱ o̱ m-shu̱p u̱ yadu̱ jab-u̱ rò u̱r-zwar-ne̱, tu̱msu̱ u̱ jab ne̱ u̱ nape̱ no̱m-u so̱-o̱ u̱ yo̱-o̱ ne̱. E̱ke̱n ne̱t-ne̱ e̱ yakke̱ tun-to̱ tu̱msu̱ remu̱ iya e̱ shaktu̱sse̱ yadu̱ jab-u̱ e̱.
20 Go̱-du̱ ne̱t-u̱t to̱ e̱ o̱ Himeniyus u̱ Are̱zanda. U̱m ya'aste̱ u̱n u̱ kom-tu̱ faru̱k-u̱ no̱m u̱s-te, remu̱ u̱zu̱ o̱ do̱'e̱ iis-u̱ u̱n yage̱-du̱ pyap-su̱ u-Ru̱ ne̱.