3
Yu̱-du̱ u̱t-ne̱t u̱ da-u̱ m-vaste̱
1 U̱m u̱t-sa bo̱ nap u̱zu̱ ho̱-tu̱ m-vaste̱ da-u̱ swadu̱ u̱r-ko̱b do̱'e̱ haan.
2 Remu̱ ne̱t-ne̱ do̱'e̱ u̱t-shu̱'u̱t a cwan-tu̱ u̱r-hi ne̱, a cwan-tu̱ shik ne̱, a u̱t-u̱k ne̱, a hu̱k-mu̱ u̱r-hi ne̱, a u̱s-pyap ne̱, a-ko̱b-du̱ doru̱ i mate̱ e̱ ne̱, a-ko̱b-du̱ u̱t-vam ne̱ tu̱msu̱ a-za u-he̱n ne̱.
3 U̱n do̱'e̱ u̱t-shu̱'u̱t a-ko̱b-du̱ u̱t-cwan ne̱, a shu̱p-du̱ o̱r-u̱t e̱ ne̱ u̱ jab, a naasu̱ dim-tu̱ o̱r-u̱t e̱ ne̱, a-ko̱b-du̱ shu̱p-du̱ u̱r-hi ne̱, a-u̱t-gam ne̱, tu̱msu̱ i gu̱g-mu̱ no̱m-tu̱ o̱o̱ge̱ tu̱ so̱to̱ ne̱.
4 U̱n do̱'e̱ u̱t-shu̱u̱t a re̱-du̱ u-ra u̱ hu̱u̱b-u̱t u̱n, a-ko̱b-du̱ gwat-du̱ o̱ru̱t e̱ ne̱, a hu̱k-mu̱ u̱r-hi ne̱, tu̱msu̱ a cwan-tu̱ m-re̱me̱r ne̱ m-ze̱g cwan-tu̱ u-Ru̱.
5 U̱n do̱'e̱ u̱t-ko̱se̱ u̱ka a-dor u-Ru̱ ne̱, se̱di u̱n do̱'e̱ gu̱gu̱m du̱ shin-m mu̱ do̱'e̱ u̱t-wa u̱n shu̱'u̱t ne̱t-tu̱ u-Ru̱. So̱m m-ra du̱gu̱ ne̱t-tu̱ o̱o̱ge̱ iya.
6 U̱na o̱o̱ge̱ go̱-du̱ ne̱t-u̱t to̱ tu̱ cwu̱ye̱ u̱-me̱ u̱t-bu tu̱ u̱t-ne̱t tu̱msu̱ u̱n e̱ngu̱sse̱ jab-su̱ ne̱ta-ne̱. Ne̱ta-u̱t tun-to̱ zatte̱ u̱s-ve̱r da, i no-mu̱ ba'as-u̱t e̱ ru̱ye̱ u̱n u-dak, tu̱msu̱ go̱-du̱ u̱t-ba'as u̱t-go̱ u̱t-go̱ to̱ o̱ dor-tu̱ u̱n.
7 Go̱-du̱ ne̱ta-u̱t to̱ u-da u-be̱e̱t e̱ o̱ u-iis, se̱di m-ha iya ne̱ e̱ kerge̱ nap-du̱ rem-su̱ u̱t-nip da.
8 A-u̱t-ko̱se̱ ne̱ ine̱ e̱ gu̱gu̱m u̱t-nip u̱ka Yanne̱s u̱ Yamris e̱ gu̱gu̱mte̱ Mosa. Jab-u̱s u̱n za so̱-se̱ da tu̱msu̱ u̱n zatte̱ yadu̱ jab u̱ u̱t-nip da.
9 Se̱di u̱n zaar ha-mu̱ m-ra da. De̱ku̱n ho̱-de̱ za m-tumb ko̱wan do̱'e̱ u̱t-nap u̱zu̱ u̱n o̱ rag-ne̱, u̱ka Yanne̱s e̱ Yamris.
Burus nak Timoti u̱t-to̱
10 Se̱di bo̱, Timoti, bo̱ nak u̱ mo̱t-tu̱ ko̱se̱-u̱t ri, tu̱msu̱ u̱ka yu̱-u̱r ri ne̱, no̱m-u̱ u̱m u̱t-sa u̱t-no̱m u̱ fat-u̱r ri, u̱ yadu̱ jab-u̱ ri ne̱, u̱ shiriktin-mu̱ jab-u̱ ri ne̱ u̱ cwan-u̱t ri ne̱, u̱ gag-du̱ jab-u̱ ri ne̱.
11 Bo̱ nak u̱ka u̱n yu̱te̱ me̱ u̱r-ko̱b tu̱msu̱ swadu̱ u̱r-ko̱b ne̱ du̱ kume̱ me̱ u̱-me̱ Antakiya, u̱ Ikoniya u̱ Risitira ne̱. U̱m gak jab u̱ swadu̱ u̱r-ko̱b dinde̱ tu̱msu̱ Wa-ko̱-uyan ruut me̱ du̱gu̱ to̱ u̱t-be̱e̱t.
12 U̱t-nip, ko̱wana o̱o̱ge̱ u̱ssa wa do̱r fu̱n-yu̱ u-Ru̱ u̱ka wa-doru̱ Kiristi Ye̱so̱ wa do̱'e̱ swadu̱ u̱r-ko̱b.
13 Se̱di ne̱t-u̱t yo̱-to̱ u̱ i o̱ e̱ngu̱sse̱ u̱t-ne̱t ne̱ e̱ do̱'e u̱t-re̱ u-shu̱ m-swu̱r ne̱. U̱n do̱'e̱ e̱ngu̱sse̱ e̱ke̱n tu̱msu̱ na do̱'e̱ e̱ngu̱sse̱ u̱n.
14 Se̱di se̱ bo̱ eese̱ u̱ yadu̱ jab ne̱ u̱du̱ no̱m-tu̱ na iise̱ bo̱ ne̱. Bo̱ nak u̱zu̱ no̱m-u̱t to̱ nip-to̱, remu̱ u̱zu̱ bo̱ nak u̱zu̱ bo̱ ke̱ru̱ yadu̱ jab u̱du̱ i iise̱ bo̱.
15 Na iise̱ bo̱ Ran-u̱ u-He̱n du̱gu̱ fa-u̱r ró. Tu̱msu̱ o̱ yaag bo̱ u̱s-ve̱r u̱ bo̱ o̱nk u̱ku̱r-u̱ u̱ o̱o̱ne̱ u̱du̱ yadu̱ jab u̱-me̱ Kiristi Ye̱so̱.
16 Remsu̱ Ran u-Ru̱ u̱s-be̱e̱t gom-to̱ tu̱ Ru̱-u̱ wa'e̱ u̱-me̱ jab-su̱ i pane̱ se̱ u̱du̱ Yar-u wa. Tu̱msu̱ se̱ kere̱ iis-u̱ in u̱t-nip, tu̱msu̱ se̱ wa' in nap no̱m-u̱ o̱o̱ge̱ u̱ za so̱-o̱ u̱-me̱ fat-u̱t in. Se̱ mang in da-u̱ in no̱me̱ no̱m-u̱ o̱o̱ge̱ za so̱-o̱, tu̱msu̱ se̱ iis-u̱ in no̱m-du̱ no̱m-u̱ o̱o̱ge̱ u̱ ho̱n-ho̱n.
17 No̱m-u̱ wu̱te̱ inya u-be̱e̱t o̱ u̱zu̱ ne̱t wu̱ no̱mu̱ u-Ru̱ u̱t-huuk do̱'e̱ u̱t-shu̱'u̱t u-zo̱ngi zo̱ngi shu̱yi-shu̱yi u̱ remu̱ wa nom-u̱t ko̱-uyan u̱ o̱o̱ge̱ u̱ ank-m so̱-mo̱.