2
1 Wara bih kaik ira kantri diet gi tut na kamahar?
Hohe bia ira matanaiabar diet te harpingit? Diet pai haruat ma tiga linge.
2 Ira king tano ula hanuo diet te tur taguro ma ira lualua ta ira pise na hala.
Diet te hanuat hurlungen wara hinarubu ma no Watong ma nong mah no Watong gate gilamis ie.
3 Diet tange, “Dahat gi rapat se ira udir winwisaan,
ma dahat na lapus ise ira udir kuun, dahat naga langalanga.”
4 Nong i la harkurai taar meram ra mawe i kurus.
No Watong i hunane diet.
5 Kaik gi boor diet ma no uno ngalngaluan,
ma i haramramin diet ma no uno nginangar, ma i tangtange,
6 “Iau te hatur no nugu king aram Saion, no nugu halhaliana uladih.”
7 No King i hinawas tano dadas na nianga tano Watong.
Ga tange tagu, “Augu no Natigu.
Katin iau te hanuat no raam Sus.
8 Saring iau ma iau ni tar ira kantri wara pinlawem
ma no ula hanuo bakut wara num.
9 Nu kure diet ma tiga dadas na kinkinis na harkurai,
nu parok gisiane diet hoing ra gingop di gil ma ra dadas na pikaia.”
10 Io huo, muat ira ut na harkurai, muat na mintot.
Muat na taram ira nianga na harakatom, muat ira lualua tano ula hanuo.
11 Muat na taram no Watong ma ra urur,
ma muat na guama, ma sen bia muat na dedar mah.
12 Hanapu augu tano Natine, kabi ngalngaluan
ma na gil haliare ugu tano num hinahaan,
kanong warah no uno bala mamahien i tale bia na tut hut kaik at mon.
A haraidaan na kis ta diet ing diet barahit taar menapu ta God.