24
Devit ga pit iakan ra ninge.
1 Tano Watong no pise ma ira linge bakut tana.
No ula hanuo mah ma diet ing diet la lon aram naliu tana auno.
2 Kanong warah, no Watong at ga hakisi no ula hanuo narako ta ira tes,
ma ga hatur mah ie naliu ta ira taah.
3 Sige na kawas no uladih tano Watong?
Ma si mah na tur narako tano uno halhaliana subaan?
4 Aie nong ira iruo lumana pai bilinge ma no kaatine i gamgamatien,
pa na lotu tupas ira palimpuo,
ma pa na sasalim ma ira linge pai tutun.
5 Na kap no haraidaan meram tano Watong,
ma God, no uno Ut na Harhalon, na haminas bia a takodasiana ie.
6 Ira mangana matanaiabar hokaiken, kaike ra tunotuno ing diet silsilihe mur ie.
Diet la silsilihe no num matmataan, God ta Iakop.
7 Muat ira matanangaas, tapapos!
Muat ira matanangaas menalua saakit, tamapapos,
waing no King nong a tamat no minarine na me haan laka.
8 Sige iakan ra King nong i tamat no minarine?
No Watong nong a dadasinei ma ana tamat na baso,
no Watong nong ana mon tamat na dadas wara hinarubu.
9 Muat ira matanangaas, tapapos!
Muat ira matanangaas menalua saakit, tamapapos,
waing no King nong i tamat no minarine na me haan laka.
10 Ma sige ie, iakano King nong i tamat no minarine?
No Watong Nong i Dadas Harsakit.
Aie no King nong i tamat no minarine.