33
1 Muat ira ut na takodas, muat na inge ma ra gungunuama tupas no Watong.
Sige ing i gamgamatien i haruat tunat bia na pirlat ie.
2 Da pirlat no Watong ma no gita.
Da ting no haap ma da inge tupas ie.
3 Inge tiga sigar ninge uram ho ie.
Ting timaan no gita, ma nu kup ma ra gungunuama.
4 Kanong warah, no nianga tano Watong i takodas ma i tutun.
Ira linge bakut i gil, i tale bia da nurnur ine.
5 No Watong i sip no takodasiana ma no bilai na magingin.
No ula hanuo i hung ma no uno harmarsai nong pai la patpataam.
6 No Watong ga gil no mawe ma no uno nianga mon,
ma ga gil ira haleng na linge saakit ing diet la pilpilakas aram naliu ma no inga na hana.
7 I gugune hulungan ira tes tiga subaan.
I banus bat no tes tamat aram narako tano uno bunbulaan.
8 No ula hanuo bakut na burte no Watong,
ma ira matanaiabar ta ira subaan bakut diet na urur tana,
9 kanong ga ianga, ma no ula hanuo ga hanuat puasa,
ma ing ga hartula, kaike ra linge ga tur dikdikit.
10 No Watong i la turtur bat ira lilik ta ira hunhuntunaan ta ira mes na hanuo,
ma i la habosbos ira linge i tur laah ta ira bala diet ira matanaiabar.
11 Iesen ira lilik tano Watong i tur dikdikit hathatika,
ma ira linge i tur laah meram tano balana pana le pataam.
12 A haraidaan na kis tano huntunaan nong no uno God no Watong,
diet ira matanaiabar ing gate gilamis leh diet bia auno tus.
13 No Watong i nanaas suur meram ra mawe
ma i nes ira tunotuno bakut.
14 Mekaia hono katon i la kiskis tana,
i la ngokngok ta diet bakut ing diet lon tano ula hanuo.
15 Nong ga gil ira kaati diet bakut,
i la liklik mur ira kaba linge diet la gilgil.
16 Taie tiga king i halon habaling ie ma no tamtamat tano uno matana ubane.
Taie tiga umri i tale be na hilau pas ra rom ma no uno dadas at.
17 Waak bia u nurnur tano num hos bia na halangalanga ugu tano hinarubu.
A tutun bia ana mon but na baso, iesen pai tale bia na halon tikai.
18 Iesen ira matana no Watong i la nesnes mur sige diet ing diet burtei,
diet at ing diet kis nanaho tano uno harmarsai nong pai la patpataam,
19 bia aie na halon diet sukun no minaat
ma na balaure diet ta ira pakana bung na tamat na taburungan.
20 Dahat kis nanaho ma ra nurnuruan utano Watong.
Aie no udahat harharahut ma no udahat bahbahit.
21 Ira nudahat nilon i guama tana,
kanong dahat nurnur tano halhaliana hinsana.
22 Watong, bale no num harmarsai nong pai la patpataam na kis ta mehet,
haruat ma ing het kis nanaho taam.