48
A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge na lotu.
1 No Watong i manga tamat, ma i manga tale bia da pirlat ie,
ram tano pise na hala tano nudahat God, aram tano uno halhaliana uladih.
2 No uladih Saion i manga tamat ma i nanaas timaan,
ma no ula hanuo bakut i guama tana.
Hoing no uluno no tamat na uladih Zapon, huo mah no uladih Saion,
no pise na hala tano Tamat na King.
3 God kenam narako ta ira subaan na barbarahit tane Saion.
I te hamines ie bia aie at no hala na munmun ta ira matanaiabar ta Saion.
4 Ing ira king diet ga tur tika,
ma ing diet ga hanhan tika wara hinarubu,
5 diet ga nes Saion ma diet ga manga karup saakit.
Ma diet ga hilau ma ra tamat na bunurut.
6 Kaik at mon diet ga dedar kaia
ma ra ngunngutaan hoing tiga hahin a bulu i la papaas ie.
7 U ga haliare diet hoing ira tamat na mon me Tasis.
Tiga dadaip meres hono kasakes i la tutut hut mekaia ga puuh sale diet.
8 Het te hadade ma het te nes mah asa ing God ga pakile
narako tano pise na hala tano Watong Nong i Dadas Harsakit, no nudahat God,
ma i hoken: God na balaure hadadas hatikanei.
9 God, narakoman tano num hala na lotu,
mehet liklik murmur no num harmarsai nong pai la patpataam.
10 God, haruat ma no tamat na hinsaam,
ira tunotuno ta ira katon bakut tano ula hanuo diet pirlat ugu.
No dadas na kata na limaam i hung ma ra takodasiana magingin.
11 Ira matanaiabar ta Saion diet guama,
ma ira tamtaman ta Iudeia diet laro,
kanong ta ira num harkurai.
12-13 Kaia, muat na haan luhutane Saion.
Muat na lik murmur timaan ira uno taltalona balo.
Muat na nes ma muat na was ira katon na barbarahit aram naliu ine,
naga tale bia muat na hinawase diet ing diet na lon tano pakana bung namur.
14 Kanong iakan ra God aie no nudahat God hathatika.
Aie na lue dahat kaiken ma ukaia mah hono haphapataam.