56
A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Tiga Bun i Kis taar Kaia ra Daha i Tapaka.” Devit ga pit iakan ra ninge. I hinhinawas utano pakana bung ing ira Pilistia diet gate palim kawasei kaia ra taman Gat.
1 God, nu marse iau, kanong ira tunotuno diet paspasak hurbitane hani iau.
Ta ira kaba bungbung diet sunang tartar wara hinarubu ma iau.
2 Ira ut na harabota diet pai sangeh wara iangianga huli iau tano kudulena bung bakut.
Halengin diet harubu ma iau ma diet pai hirhir tunat ing diet gil huo.
3 Ing iau burut,
iau ni nurnur taam.
4 God nong no uno nianga iau pirlat ie,
ta iakano God iau nurnur. Iau pa ni burburut.
Asa kaik ira tunotuno mon diet tale bia diet na gil tagu?
5 Tano kudulena bung diet ruru halilie ira nugu nianga.
Diet la pingpingit wara hagahe iau.
6 Diet wawor kumaan tika, ma diet munmunuane iau.
Huo diet nesnes mur timaan ira nugu hinahaan.
I tut ira bala diet wara hapataam se no nugu lon.
7 Waak tunat u bale se diet bia diet na hilau sukun no harpidanau.
God, narako tano num ngalngaluan, bul hasur ira kaba hunhuntunaan ta ira mes na hanuo.
8 Pakat kawase ira nugu tapunuk.
Pintare leh ira luur na matagu tano num gingop.
Tutun saakit, u te was bakut leh.
9 Ira nugu ebar diet na tahurus tapukus, ing ni tataau wara harharahut.
Ta iakan iau ni nunure bia God i tur ma iau.
10 God, nong no uno nianga iau pirlat ie,
no Watong, nong no uno nianga iau pirlat ie,
11 io, ta iakano God iau nurnur. Iau pa ni burburut.
Asa kaik ira tunotuno mon diet tale bia diet na gil tagu?
12 God, iau tur taar tano nugu kunubus ukatiga ho ugu.
Iau ni tar ira nugu hartabar na tanga tahut taar taam.
13 Kanong warah, u ga kap pukus leh iau ing iau ga wara minaat,
ma ing iau ga harsomane iakano tinirih,
waing nigi lon ra matmataan taam
kai tano madaraas nong i bulo sare ira nilon.