81
A nianga tupas no tunotuno nong i kure ira ut na ninge: da ting ira mangana gita me Get ing da inge iakan ra ninge. Asap ga pit ie.
1 Inge na gungunuama uram ho God no nudahat dadas.
Dahat na kup naliu uram tano God ta Iakop.
2 Da hatahun ira ninge, da ting ra tamborin,
da ting mur ira kaungana ninge ma ra haap ma ra gita.
3 Da hus no tahur wara hakilang no sigar teka,
ma ing no teka i kidilona mah, tano bung na lukara.
4 A dadas na nianga ta Israel bia dahat na gil huo.
Aie tiga mangana harkurai tano God ta Iakop.
5 God ga bul hawaat ie hoing tiga harkurai uta ira Israel
ing ga harubu ma ira Isip.
Iau hadade a ingana tikai ma iau pai nunure bia sige i iangianga, ma i tange,
6 “Iau ga kap se no tinirih ta ira kalkale diet.
Iau ga lapus ise ira lima diet ta ira udiet tirihuana kinakap mah.
7 Meram narako tano numuat purpuruan muat ga tataau, ma iau ga halon muat.
Iau ga taram pase muat meram narakoman tano parparara.
Iau ga walar muat tano taah kaia Meriba.
8 Muat ira nugu matanaiabar, muat na hadade, ma iau nigi hakatom muat.
Muat ira Israel, maris, iau manga sip bia muat na taram iau!
9 Waak muat hakabet tiga god ta ira mes na huntunaan nalamin ta muat.
Muat pa na lotu tupas tiga mes na god.
10 Iau no Watong, no numuat God,
nong ga lamus hasur muat sukun Isip.
Muat na manga panganga, ma nigi hahungi ira ha muat.
11 Iesen ira nugu matanaiabar diet pa ga taram iau.
Ira Israel diet pa ga tale bia diet na hanapu diet tagu.
12 Io, iau ga waak se tar diet ta ira nudiet tintalen na patnau
waing diet naga mur ira nudiet lilik at.
13 Bia ing ira nugu matanaiabar diet naga taram iau,
ma bia ing Israel naga tale bia na mur ira nugu tintalen,
14 iau gor habir wara papaas hasur ira udiet ebar
ma nigi bu ira adiet suk.
15 Bia diet ing diet malentakuane no Watong diet gor hirhir ma ra bunurut tano matmataan ta God,
ira nudiet harpidanau pa gor kis hatika taar.
16 Iesen iau gor tabar muat ma no bilai na wit saakit,
ma muat gor hahos mah ma ra tiri na imara mekaia hono haatkis.”