88
A ninge, a ninge na lotu iakan ta ira bulumur ta Korah. A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “No Ngunngutaan ta ira Tinirih.” Heman tano huntunaan ta Esra ga pit iakan ra ninge.
1 Watong, augu no God nong i halon iau,
iau suah taar taam ra kasakes ma ra bung.
2 Iau sip bia no nugu sinasaring na hanuat tupas ugu.
Hadade ira nugu sunuah.
3 Kanong warah, no nugu nilon i hung ma ra tinirih
ma hutet iau ni maat laah.
4 Di was tikane iau ma diet ing diet wara hinaansur ures napu tano lulur na minaat.
Iau hoing tiga tunotuno taie auno ta dadas.
5 Di te waak se tar iau tika ma ira minaat.
Iau hoing ira hiruo diet noh taar ta ira midi
ing pau lik habal um diet,
ma diet te takutus talur no num harbalaurai.
6 U te bul iau narako tano lulur nong i manga hansur ures napu
tano subaan nong i kankado harsakit.
7 No num ngalngaluan i manga ubal iau,
ma i te buluhane hasur tar iau hoing tikai a pakananoh i takap bus ie.
8 U te kap talur tar iau ma ira nugu bilai na harwis,
ma u te gil iau bia diet na malentakuane iau.
No nilon na maris te wis iau ma pa ni pas ie.
9 Ira matagu i rawa ra sunuah.
Watong, iau tataau ukatiga ho ugu ta ira kaba bungbung.
Iau la saasangaha ukatiga ho ugu.
10 Hohe, u la hamines ira num tamat na melmel na gingilaan na kinarup ta ira minaat? Taie.
Diet ing diet te maat, diet na tut hut baal ma diet naga pirlat ugu? Taie.
11 I tutun bia di hinawas palai utano num harmarsai narakoman ta ira midi,
bia di hinawas palai utano num tutun na magingin tano subaan na harhagawai? Taie.
12 Diet nunure tar mah ira num tamat na melmel na gingilaan na kinarup tano subaan na kankado? Taie.
Ma diet ing diet kis tano taman nong diet pai tale wara liklik leh tiga linge, diet nunure ira num takodasiana magingin? Taie.
13 Iesen iau suah ukatiga ho ugu wara harharahut, Watong.
Ra malaan no nugu sinasaring i hanuat taar taam.
14 Watong, wara bih bia u malok se iau
ma u suhe no matmataan taam tagu?
15 Mekaia laah ing iau ga sigar bulu, iau ga kap ra tamat na ngunngutaan ma ga hutet bia ni maat.
Ira num harpidanau i te haramramin hagahe iau ma iau pai haruat me.
16 No num ngalngaluan i te sal bus iau.
Ira num harpidanau i te haramramin haliare iau.
17 Tano kidilona bung bakut diet saal luhutane iau hoing tiga taahit,
ma diet te salirane iau.
18 U te kap leh sukun iau ira nugu harwis ma diet ing iau la sip tar diet.
No kankado um aie no nugu bilai na harwis.