91
1 Sige i la kiskis barahit ta Nong i Naliu Harsakit
na sangeh mah narako tano ududuh tano Watong Nong i Dadas Harsakit.
2 Iau ni tange tano Watong, “Augu no nugu subaan na munmun ma no nugu ut na harbalaurai.
Augu no nugu God. Iau so no nugu nurnuruan taam.”
3 Tutun saakit, God na halon ugu talur no kuun tano ut na hakhakun
ma sukun ira minaset ing i hatahuat minaat.
4 Hoing tiga huna kareka, God na pabong ugu,
ma napu ta ira babana nu silihe ra harbalaurai.
I la hatutun ing i tange, ma iakano uno tintalen na hanuat hoing ra num bahbahit ma no balo wara balbalaure bat ugu.
5 Pa nu burte tiga linge na ramramin ing na hanuat ra bung,
ma bia tiga rumus di lapotanei tano kasakes,
6 ma bia tiga tamat na minaset i hanuat tano kankado,
ma bia tiga linge na haragahai ing na halhaliarai tano tingena kasakes.
7 A arip diet na hiruo taar na gengan taam,
ma a sangahul na arip diet na hiruo luhutane ugu,
iesen iakan ra linge pa na hanuat hutet taam.
8 Nu nas tus mon ma ira iruo mataam
no harpidanau ing na hanuat taar ta ira ut na sakena.
9 Ing bia u kilam no Watong Nong i Naliu Harsakit bia, “No nugu subaan na munmun,”
ma bia i te hanuat no num katon na barbarahit,
10 io, pataie ta saksakena na kap ugu
ma taie mah ta linge na harhagahai na hanuat hutet tano num hala.
11 Kanong warah, God na tule ira uno angelo wara utaam
bia diet na balaure ugu ta ira num hinahaan bakut.
12 Diet na palim hatur ugu ma ira lima diet,
waing pa nu sage ira kakim ra ula haat.
13 Nu paas bisang ira laion ma ira sui.
Nu papaas naliu ta ira tamat na laion ma ira sakana sui.
14 No Watong i tange, “Iau ni halon ie kanong i kalak iau.
Iau ni balaure bat ie kanong i nes kilam no hinsagu.
15 Na tataau tupas iau ma iau ni taram ie.
Iau ni kis tika mei ta ira tinirih.
Iau ni halangalangai ma ni hatamat no hinsana.
16 Iau ni haguama ie kanong ni halawaas no uno nilon.
Ma ni hamines no nugu harhalon tana.”