96
1 Inge tiga sigar ninge tupas no Watong.
I tahut bia muat tano ula hanuo bakut, muat na inge tupas no Watong.
2 Inge tupas no Watong, pirlat no hinsana.
Hinawas palai tano uno harhalon ta ira kaba bungbung.
3 Tange hapalaine no minamarine nalamin ta ira kantri,
ma ira uno tamat na gingilaan na kinarup ing i melmel saakit nalamin ta ira matanaiabar bakut.
4 Kanong warah, no Watong i tamat saakit ma i takodas bia dahat na manga pirlat ie.
Da manga rui ta ira god bakut,
5 kanong ira god bakut ta ira mes na kantri, a palimpuo mon diet,
iesen no Watong ga pakile no mawe.
6 No Watong i hung ma ra minamar ma no hinsana i tamat,
ma kaia ra uno halhaliana katon no Watong i dadas ma i melmel saakit.
7 Muat ira kaba kantri, i bilai bia muat na nes kilam no Watong.
Muat na nes kilam no Watong bia auno mon minamar ma bia i dadas.
8 Muat na tar tano Watong ira urur i haruat ma no hinsana.
Muat na kap hawaat tiga hartabar ma muat na laka ta ira subaan tano uno tamat na hala na lotu.
9 Muat na lotu tupas no Watong ra matmataan tano uno halhaliana kinkinis nong i manga melmel harsakit.
Muat tano ula hanuo bakut, muat na dedar ra matmataan tana.
10 I tahut bia muat na hinawas nalamin ta ira kantri bia, “No Watong i kap taman taar.”
No ula hanuo i kis dikdikit taar. Pai tale bia na gunagune.
No Watong na kure ira matanaiabar bakut ma ra takodasiana harkurai.
11 I tahut bia no mawe na guama ma no ula hanuo na laro mah.
No tes ma ira linge nam tano balana, muat na wawaang.
12 Ira lalong ma ira linge nam narako ta diet, diet na kanakana.
Io, ma ira daha tano malit diet na inge um ma ra gungunuama.
13 Diet na inge ra matmataan tano Watong, kanong i wara hinanuat.
Na hanuat wara kurkure no ula hanuo.
Na kure no ula hanuo ma no takodasiana magingin.
Na kure ira matanaiabar bakut ma ra tutun na magingin.