14
Pol ma Banabas aram Aikoniam
1 Aram Aikoniam Pol ma Banabas dir ga haan laka uram tano hala na lotu nudiet ira Iudeia hoing at dir sala gilgil. Dir ga ianga kaia tiga mangaan at, ma a haleng Iudeia ma haleng diet ing pai Iudeia diet, diet gaam nurnur.
2 Senbia ira Iudeia ing pa diet ga nurnur, diet ga sang nianga ta diet ing pai Iudeia diet. Ma diet ira Iudeia diet ga kas ira bala diet ira mesa, diet gaam bala ngungut taar ta ira haratasin narako ta Karisito.
3 Io hua, Pol ma Banabas dir gaam kis halis kaia ma dir ga iangianga ma ra balamasa utano Watong. Ma no Watong ga hatutuna no nudir nianga utano nuna harmarsai. Ga tar ra dadas ta dir hua dir gaam gil ra dadas na hakilang ma ra pinapalim na kinarup.
4 Ira mataniabar tano pisa na hala diet ga haan hararasanai, aring tano palpal ta ira Iudeia ma aring tano palpal ta ira airua apostolo.
5 Aring Iudeia ma aring ing pai Iudeia diet, diet tikai ma ira nudiet kaba lualua diet ga wor kumaan bia diet na hagawai ningaar ma bia diet na tut bing dir.
6 Senbia ing dir ga ser lah iakan, dir ga hilau u na Listara ma Debe kinam tano hanua Likonia, ma uram ta ira sibaan huteta ta kaikek ra irua pisa na hala.
7 Ma dir ga warawai ma no tahut na hinhinawas kaia.
Pol aram Listara ma Debe
8 Aram Listara tiga tunatuna ga kis taar kaia. Di ga kaha ia ma ra pengpeng ia ma pa git hanahaan.
9-10 Ga hanhadadei ira nianga tane Pol. Io, Pol ga ngok dadas tana ma ga nas bia a nuna mon nurnur bia na langalanga. Io, Pol ga tau ia ma gaam tangai, “Tut ma u na tur!” Kaikek at no tunatuna ga karuas tutur ma gaam tur lah bia na haan tubena um.
11 Ing ira mataniabar diet ga nas ing Pol ga gil, diet ga kakonga tano nudiet nianga ira Likonia bia, “Ira tadaar diet ta hansur taar ta dahat hoing ra tunatuna tutun!”
12 Io, diet ga pas Banabas bia Zeus. Ma Pol diet ga kilam ia bia Hermes kanong warah git luluai ta dir wara nianga.
13 No hala na lotu ta Zeus ga tur taar mon aras nataman tano pisa na hala. Ma no pris ta Zeus ga kap hahuat ra tumatena bulumakau ma aring purpur di ga hihisanei hoing tiga vuvu uram tano matanangas huat ta iakano pisa na hala. Ga gil hua kanong ia tikai ma ira mataniabar nong bia diet na tun kaikek ra hartabar wara latlotu tupas dir.
14-15 Ma ing ira airua apostolo, Pol ma Banabas, dir ga hadadei bia di ga wara gilgil hua ta dir, dir ga diris ira nudir sigasigam wara hamhaminis bia dir ga mola bia da gil hua ta dir. Dir ga hilau suur taar ta ira mataniabar ma dir ga tatau bia, “Ai! Waak muat wara gilgil kaikek ra mangana linga! Mamir mah airua tunatuna mon hoing muat ma pai a tadaar mamir. Mamir hanuat wara tangtangai no tahut na hinhinawas ta muat. Mamir tangtangai ta muat bia muat na tahurus talur kaiken ra linga bia mon, ma muat na talinganei no lilona Kalou nong ga gil no mawai, no ula hanua ma no tes, ma ira mangana linga kinam narako ta dal.
16 Naluai, ga waak sei tar ira mataniabar bia diet na mur ira nudiet mangana tintalen.
17 Senbia i la hamhaminis ta ira mataniabar bia siga ia. I haminis no nuna harmarsai ing i la tartar no bata maram ra mawai ma ing i la tamtabar muat ma ira amuat nian ta ira teka na matmatukal. Ma i la hasoh muat ma ra nian ma i hahung muat ma ra gungunuama.”
18 A tutuna bia dir ga tangai kaiken ra nianga, senbia pa ga malus ta dir wara tingtigal diet bia pa diet na tun hartabar taar ta dir.
19 Io, aring Iudeia diet ga hanuat ma Aikoniam ma Entiok kinam Pisidia ma diet ga halawen lah ira mataniabar. Diet ga tut Pol ma ra haat ma diet ga rahi hasur ia uras nataman tano pisa na hala kanong diet ga lik bia gata maat.
20 Senbia namur bia ira tena tinaram tano lotu diet gata tur burung ia, ga taman tut gaam haan laka baal at uram narako tano pisa na hala. Ma tano bung manamur dir ga haan laah ma Banabas u Debe.
Dir ga tapukus u Entiok kinas Siria
21 Dir ga warawai ma no tahut na hinhinawas arau ta iakano pisa na hala ma a haleng diet ga hanuat tena tinaram tano lotu. Io, dir ga tapukus baal u Listara, Aikoniam, ma u Entiok kinam Pisidia.
22 Ma dir ga hadadas hani kaikek ra tena tinaram tano lotu ma dir ga harharagat diet bia diet na patep dadas taar tano nudiet nurnur ta Iesu. Dir ga tangtangai bia, “Dahat na kilinganei at ra haleng ngunngutaan io, dahat naga sola tano matanitu ta Kalou.”
23 Pol ma Banabas dir ga bul nudiet aring lualua ta ira hala na lotu tikatikai. Ma dir ga tar diet tano limana no Watong nong diet gata nurnur tana. Ma dir ga gil hua ma ra sinsaring ma ra hinahal.
24 Namur bia dir gata sakiit tar no hanua Pisidia dir ga hanuat Pampilia.
25 Ma bia dir gata warawai taar ma no nianga aras Perga, dir ga hansur u Atelia.
26 Io, dir ga kawaas ra mon makaia Atelia dir gaam tapukus u Entiok, no sibaan nong di gata tar dir kaia uram tano harmarsai ta Kalou bia dir na gil iakan ra pinapalim nong dir ta hapataam tar ia.
27 Ing dir ga hanuat kaia Entiok dir ga lam hulungai ira mataniabar tano lotu ma dir gaam hasasei diet ta ira linga bakut ing Kalou gata gil aram narako tano nudir pinapalim. Ma dir ga hinawas mah ta ing Kalou ga papos no matanangas bia diet ing pai Iudeia diet, diet naga nurnur.
28 Io, dir ga kis lawas baa um kaia tikai ma ira tena tinaram tano lotu.