5
Da tagura timaan tano hinanuat tano Watong
1-2 Kaba tasi mital narako ta Karisito, pai supi bia mital na pakat ta nianga ukaia ta muat utano pakana bung ing kaiken ra linga na hanuat, kanong muat at muat nunurei timaan tar bia no pakana bung tano Watong na hanuat haruat ma tiga tena kikinau i hanuat ra bung.
3 Ira mataniabar diet na tangai bia, “Pa dahat na burtei ta tiga linga. A malum i kis taar ta dahat.” Io, ta iakano pakana bung at a tamat na halhaliarai na haan taar ta diet hoing ira harpaas na bulu ing bia tiga hahina i wara kinakaha. Ma taia tikai na paapas.
4 Ma muat ira talai mital, iakan ra bung pa na hakarup muat hoing tiga tena kikinau kanong pa muat nat na kankado.
5 Taia. Muat bakut, muat lon tano palai ra kasakes. Pa dahat lon tano kankado ra bung.
6 Io hua, waak dahat sua hoing diet tari. Na tahut bia dahat na hangala ma dahat na tagura ma ra palai na lilik hoing diet ing pa diet mom.
7 Diet ing diet sua, diet sala susua ra bung. Ma ira tena minminom, diet sala mamom ra bung.
8-10 Senbia dahat, dahat ira tunatuna gar tano madaraas. Io, waak dahat haruat ma ira tena minminom. Dahat na tagura timaan. Hoing ira umri, dahat na sigam no nudahat nurnur ma no nudahat harmarsai hargilaas hoing tiga bakbakit na bangbango dahat. Ma dahat na kuhai no nudahat nurnur kahai no harhalon haruat ma ra umri, kanong Kalou pa ga bul no nuna lilik bia no nuna ngalngaluan na haan tupas dahat. Taia. I nem bia na halon dahat tano nudahat Watong Iesu Karisito nong ga maat uta dahat. Ma ga maat uta dahat waing dahat na lon tikai ma ia. Taia ta linga bia dahat lon taar bia dahat ta maat. Dahat na lon tikai ma ia.
11 Io hua, muat na hadadas ma haragat harbasianei muat hoing muat sala gilgil.
Da mur ira bilai na magingin
12 Io, bar tasi mital ta Karisito, mital saring muat bia muat na wariru ta diet ing diet manga papalim nalamin ta muat. Diet balaurei muat ta ira numuat nilon tano Watong. Ma diet pir mah muat.
13 Muat na manga lik hatamat diet bia muat na marsei diet uta ira pinapalim diet gil. Muat na kis ma ra malum harbasiai ta muat.
14 Kaba tasi mital, mital haragat muat bia muat na hatumarang ira malmalungana, ma muat na hadadas diet ira tena nginarau, ma muat na harahut diet ing pa diet tur dadas, bia pa muat na manga gasien wara hapidinau tikai.
15 Muat na harbalaurai timaan bia waak muat balu ra sakena ma ra sakena balin. Senbia muat na walar hatikanei wara gilgil ra tahut harbasiai ta muat ma diet mah ira mesa.
16 I tahut bia muat na guama hathatikai.
17 Muat na saasaring hait.
18 Muat na tangtanga tahut uram ta Kalou ta ira kaba linga bakut. Kanong Kalou i nem bia muat ing muat kis taar ta Karisito muat na lon hua.
19 Waak muat tur bat no pinapalim tano Halhaliana Tanua.
20 Waak muat mola sei ira nianga gar na poropet.
21 Senbia, i tahut bia muat na walar kilam ira linga bakut. Muat na palim kahai ira bilai.
22 Muat na tur talur ira mangana sakena bakut.
23 Mital sasaring bia Kalou at nong i tar ra malum ta dahat, na bul hasisingen ira numuat nilon bakut talur ira sakena ma muat na gamgamatien. Ma mital sasaring mah bia na balaurei ira tanua muat, ira bala muat, ma ira palatamai muat waing taia tikai na tale bia na tangai bia a mon sakena ta muat tano pakana bung bia no nudahat Watong Iesu Karisito na hanuat.
24 Kalou nong i tau muat na gil kaiken kanong i la gilgil haruatanei ira nuna nianga.
25 Kaba tasi mital na tahut bia muat na sasaring uta mital.
26 Muat na karo lah ira tasi dahat ta Karisito ma muat na gawanei lah diet ma ra tahut na magingin.
27 Iau tangai hadadas ta muat tano hinsana no Watong bia muat na was iakan ra pakpakat ta ira tasi dahat bakut.
28 No harmarsai tano nudahat Watong Iesu Karisito na kis ta muat.