11
Jisas ga hana lala Ierusalem hoke no king nong Israel ga kiskis kawase ie.
(Matiu 21:1-11; Luk 19:28-40; Jon 12:12-19)
1-2 Di ga hanawat ter tane Betpasi ma ne Betani kaia hutate Ierusalem tano uladih Olip. Io, Jisas ga tule airuo ta ira nuno bulu na harausur ma iga tange ta dur, “Mur na hana ter tano taman menalalie ta mur ma ing mur na hana lala ter tano taman, kaie iat mon mur na nes leh tike sigar donki di kubus kawase ter ie. Pata baak tikenong paile kisi ie. Mur na lapus ie, io, mur na sel hawat ie ukira ho iou. Be tari di na tiri mur be, ‘Mur gil hobi urah?’, mur na hinawase di, ‘No Watong i sip ie ma namur dahine ina tule hawat habaling ie.’ ”
4-5 Io, dur ga hana leh ma dur ga nes leh tike sigar donki di ga kubus ter ie tano matanangas tike hala ma iga tur ter tano ngas. Be dur ga laplapus ie, ari turadi ing di ga tutur hanana hutate di ga tiri dur, “Mur laplapus no sigar donki urah?”
Dur ga balu di hoke iat Jisas gate hinawase ter dur. Io, di ga waak leise ter dur. Dur ga sel hawat no sigar donki ukaia hone Jisas, dur gom pulus no tihine no donki ma ari ta ira nudur mol. Io, Jisas ga kawas hut gom kis nalu ine. A haleng turadi di ga kap leise ari ta ira kinasi di, di gom palase mur no ngas me. Ari di ga palase ira singara dahe ing di gate kato. +Dong ing di ga lilie hanana ma dong ing di ga murmur hanana di bakut di ga kakongane hanane be,
“Pirlet God!
No haridan na kis tano nong i hanawat ura gilgil haruatne ira sinisip tano Watong!
10 God te idane nong i hanawat ura kapkap no tamat na kinkinis tano hintubu dait Dawit, no king.
Pirlet God nong i kis tuma nalu sakit.”
11 Io, Jisas ga hana lala ter tano tamat na taman Ierusalem igom hana utuma tano tamat na hala na lotu. Be igate nes bakut ter ira linge kaia, Jisas ma ira nuno sangahul ma iruo di ga hanasur utuma Betani kinong igate matarahien ruruk tuoi um.
Jisas ga tibe bing no ina papus.
(Matiu 21:18-19)
12 Tano bung menamur be di ga hanana leh mekaia Betani, Jisas ga taburungan. 13  +Jisas ga nes metapa tike ina papus ma iga lubungien ter. Io, iga hana hutate igom nes timaan ie kinong iga lik be iga huei ter no ina dahe. Be iga hana hutate iga nes be a papana dahe sene kinong pai gale pana bung baak ta ira papus be na huei. 14 Jisas ga tange tano ina papus, “Pata um tikenong pai nale ian baling tam.” Ma ira nuno bulu na harausur di ga hadade ing iga tangtange.
Jisas ga hapalaine no pipilaina tutuno tano hala na lotu tane God.
(Matiu 21:12-17; Luk 19:45-48; Jon 2:13-22)
15 Be di ga hanawat Ierusalem, Jisas ga hana lala tano tamat na hala na lotu igom bat hasur dong ing di ga susuhur ma dong ing di ga kukul kaia. Iga pulukane ira hator ta ira turadi ing di ga kikios ira barbarat, ma iga pulukane bileng ira kinkinis nudi ira turadi ing di ga suhsuhurane ira mon na hartabar. 16 Jisas ga tigel bileng di be pa di nale kap habaling ta linge ukaia naramon tano hala na lotu. 17  +Io, iga hausur ira turadi gom tange, “Mu nunure timaan ter no nianga tane God di ga pakat ie i tange horek: ‘No nugu hala na lotu, da kilam ie be a hala na sinsaring ta ira kaba huntunana bakut ta ikin ra ula hanuo.’ Sene be mu te gil balik ie hoke tike munmun ta di ira holmatau.”
18  +Io, ira tamat na pris ma ira tena harausur ta ira harkurai tane Moses, di ga hadade ikin. Io, di ga tur leh ura sisilih be di na ubu bing Jisas hohaam kinong di ga burte ie. Ma di ga burte ie kinong ira matanabar bakut di ga karup ma di ga urur tano nuno harausur.
19 Io, be igate matmatarahien Jisas ma ira nuno bulu na harausur di ga hana sukun um no tamat na taman.
No mangana sinsaring nong i tur tikai ma no nurnur.
(Matiu 21:20-22)
20 Ra malane be di ga hanana tano ngas, di ga nes no ina papus ma igate maranga bakut. 21 Io, Pita ga lik leh ira nianga Jisas ga tange ter tano ina dahe, io, iga tange tane Jisas, “Tena harausur, nes baak! No ina papus nong u tibe bing ie, ite maranga.”
22-23  +Io, Jisas ga balu di, “Aiou manga sip be mu na nurnur tane God! Mu hadado baak! I tale bileng mu ta ira dades na linge sakit hokakarek. Be nesi tikenong na tange ta ikin ra uladih, ‘Taman tut, ma nu tamaragat sur utuma ra tingan tes,’ ma be tuma naramon tuno tana paile lilik hararuo iesene i nurnur ter iat be no linge i saring ie na hatur kawase ie, God na ter ie tana. 24  +A burwana kaie iou nige hinawase mu kakarek, be ta mangana linge so mu saring, mu na nurnur at be mu te kap no puspusno, io, ina ter ie ta mu. 25  +Ma be u sasaring ma u mon bala ngungut ter tikenong, nu lik luban leise ing ikinong ga gil ter tam waing no num mama kununuma ra mawe na lik luban leise bileng ira num sana tintalen. 26 [Iesene be paule lik luban leise ing ikinong ga gil ter tam, no num mama kununuma ra mawe pai nale lik luban leise bileng ira num sana tintalen.]”
Ira tamat tano lotu di ga tiri Jisas be i kap no nuno dades meha.
(Matiu 21:23-27; Luk 20:1-8)
27 Io, di ga hanawat baling ter tuma Ierusalem. Ma be di ga hanana hanana naramon tano tamat na hala na lotu ari ta ira tamat na pris, ma ari tena harausur ta ira harkurai tane Moses, ma ari tamat ta ira huntunana di ga hana huat ter tana. 28 Io, di ga tiri Jisas “U te kap ra tamat na dades na harkurai meha kaie uge gil kike ra linge, ma nesi i bul hatamat ugo kaie uge gil hobi?”
29 Jisas ga balu di, “Aiou ni tiri mu tike tiniri ma be mu na balu iou, io, iou ni hinawase mu be nesi i ter ra dades tagu kakarek iou ge ngan horek. 30 Mu lik be Jon ga kap no nuno pinapalim na baptais metuma ra mawe be mekaia ta ira turadi mon? Mu balu iou!”
31 Di ga wowor nalamin ta di at horek: “Be dait na tange be Jon ga kap no nuno pinapalim metuma ra mawe, Jisas na tange ta dait be, ‘Mu gorte nurnur mon ta ira nianga tane Jon.’ 32 Ma pa dait nale tange bileng be Jon ga kap no nuno dades ta ira turadi mon.” (Di ga tange hobi kinong di ga burte ira turadi, urah a haleng ta di ga nurnur be Jon ga tike tangetus tutuno.) 33 Io, di ga balu Jisas be, “Mem paile nunure.”
Io, ne Jisas ga tange um ta di, “Aiou bileng, iou pa nile hinawase mu be iou kap no nugu tamat na dades na harkurai meha, kaie iou ge gil hobi.”
+ 11:9 Sam 118:25-26 + 11:13 Luk 13:6 + 11:17 Ais 56:7; Jer 7:11 + 11:18 Mak 14:1 + 11:22-23 Matiu 17:20 + 11:24 Matiu 7:7 + 11:25 Matiu 6:14-15