13
Barnabaassinne Sawuley kiitettida
Anxokiyan diza Woosa Keeththan nabetinne astamareti deettes. Heytikka Barnabaassinne Negeere geetettiza Simoonara, Qareena dere as Luqiyoosara, Herdoosara issife dicida Minaheranne Sawulera wuri issife deettes. * Heyti wuri Godas goynnishenne xoomishe dishin Xillo Ayanay “Barnabaasanne Sawule ta ista xeygida oosos taas shaakki kessite” gides. Istika xoomi woossidi ba kushe ista bolla woththidappe guye moyzida.
Barnabassinne Sawuley Qophiroose geetettizason
Barnabassinne Sawuley Xillo Ayana kiitan duge Selawuqiya wodhdhida; heeppeka markaben geellidi Qophiroose bida. Salmeena geetettizaso gakkidi Ayhudata Woosa Keeththatan Xoossa qaala sabakida; Marqoosa geetettiza Yohannisikka istara biidi ista maaddides.
Abba giddon diza biitta Qophiroose geetettiza dereyo ha gaxappe he gaxa gakkanaas kanthi kezidi Phaafa geetettizaso gakkishin issi Ayhuda asa shin maronne wordo nabe Bar-Yesusa geetettiza as demmida. Izikka issi Sargoosa Phawuloosa geetettiza woznama dere ayssizayssara issife dees. Ha dere ayssiza addezi Xoossa qaala siyana koydi Barnabaasanne Sawule xeygisides. Marozi Ellimaassi ba suntha birsheththa mala dere ayssizayssi ammanonta mala dhuphanas koydi istara eqqetides. Phawuloosa geetettida Sawuley Xillo Ayanay izan kumin maroza tishshi histi xeelidi, 10 “Neno xillotetha ubbas morkezo! Geneynne iitatethi nenan kumidaysso haysso dabuloosa nawu! Goda suure oge geellaseththafe shempikii? 11 Hekko ha7i Goda kushey ne bolla dees. Ne qooqana; hannife guye awa arshe poo7o Issinokka beyakka” gides.
Heerakka shaarumaynne dhumay iza bolla wodhdhides. Kushe oykki bana kaalethanade koshshi yaanne haanne gides. 12 Dere ayssizayssi ha hanida yo7oza beyidi goda gish siyida timirten malaletidi ammanides.
Barnabassinne Sawuley Phissidiya geetettiza deren
13 Phawuloosinne izara dizayti Phaafappe dendidi Phinfiliya geetettizason diza Phergene geetettizaso markaben geli bida; Yohannisi istafe shaaketidi guye Yerusalame simmides. 14 Isti gidikko Phergeneppe dendidi Phissidiya giddon diza gede Anxokiya bida; Sambata gallas Ayhudata woossa keeth geli uttida. 15 Muse woga maxaafatinne nabeta maxaafati nababetidappe guye Ayhudata Woosa Keeththa halaqati “Nu ishato! Intes hayssa asa zorana qaalay diikko haasayte” giidi istako ase yeddida.
16 Phawuloosika dendi eqqidi ba kushera malatidi “Inteno Isra7eele asato! Qasseka inteno Xoossas yayyiza Ayzaabeto! siyite. 17 Ha Isra7eele dere Xoossay kase nu aawata doorides; isti Gibxe deren dishin ista dhoqu dhoqu histides. Ba wolqama qesera heeppe ista kessides. * 18 Oyddu tammu layth kumeth ista bazzo biittan dandayides. * 19 Kanaane biittan dizayta laapun kawota dhayssidi ista biitta ba deretas gade histi laattissides. * 20 Hessi wuri poletiday oyddu xeetanne ichashu tammu laythata giddonna. Hessafe guye nabe Sameela wode gakkanaas ista pirdiza daannata immides. *
21 “Hessafe guye derey ba bolla kawo kawoththana mala Sameela woossides; Xoossayka Biniyaame baggafe Qiise naa Sa7oole istas immides. Izikka ista oyddu tammu layth haarides. * 22 Sa7oole shaaridappe guye Dawute kawothides; iza gish ‘Ta wozna mala hanizayssanne ta koyidayssa wursi ooththiza Iseeye naa Dawute ta demmadis’ giidi Dawute gish Xoossi markattides. * 23 Xoossika ba caaqo qaalatho ha addeza zerethafe as ashshizayssa Yesusa Isra7eeles ehides. 24 Yesusi yaanappe kase Yohannisi Isra7eele derey wuri maarotethan gelidi xammaqettana mala sabakides. * 25 Yohannisi ba kiitettidayssa polo bolla dishe ‘Ta intes oona misatazinaa? Ta kiitettidayssa gidikke haray attoshin ta izas toho caamma kire birshanas bessontayssi taappe guyera yaana’ gides. *
26 “Inteno Abrahaame zerethafe yeletida nu ishato! Qasseka inte giddonka Xoossas yayyizayti wuri hayssi atotetha kiitay kiitettiday nuus ubbatassa! 27 Yerusalame asatinne ista halaqati Yesusa eribetenna; gido attin isti iza bolla pirdida; hessanka sambatan sambatan nababetiza kase nabeta qaalay iza bolla polettides. 28 Iza hayqos gaththiza issi gaasokka isti demmoonta aggikkokka Philaxoosi iza bolla hayqo pirda pirdana mala woossida. * 29 Iza gish xaafetidayssa isti wursi polidappe guye iza kaqqettida mitha bollafe gaden woththidi duufon moogida. * 30 Gido attin Xoossi iza hayqoppe denthides. 31 Galilappe Yerusalame gakkanaas banara dizaytas daro wode beettides; heytikka ha7i iza gish deretas markata. *
32 “Nukka kase Xoossi nu Aawatas caaqida Mishiraachcho qaala intes sabakoos. 33 Yesusa kiittidi istas caaqida qaala nuus ista naytas polides; hessika mazamure maxaafan nam7antho shempon ‘Ne ta naaza; ta nena hach yeladis’ geetetti xaafetides. * 34 Qasseka izi wooqontayssanne Xoossi iza hayqoppe denthidayssa shaakki erana mala
‘Anjettidayssanne ammanettida
Dawute anjo ta intes immana’ gides. *
35 Hessa gish harasonka
‘Ne geeshshay hayqqi wooqana mala ne koyakka’ gees. *
36 “Dawutey ba woden Xoossa shene mala ooththidappe guye hayqides; kase ba aawatara moogetin iza ashoy wooqides. 37 Xoossi iza hayqoppe denthidayssi izi gidikko wooqibenna. 38 Hessa gish ta ishato! Nagaras maarotethi beettizay Yesusa baggara gididayssi intes sabaketidayssa erite. 39 Iza ammanizadey wuri kase Muse woga baggara demmoonta xilloteth demmana. 40-41 Hessa gish kase nabeti
‘Inteno qidhizayto xeellite, malaletitenne, dhayite,
intes oonikka yootin ammananas intena metiza miish
ta inte woden ooththana’ gida qaalay inte bolla gakkonta mala naagetite” gides.
42 Phawuloosinne Barnabaassi Ayhudata Woosa Keeththafe kezishin asay ista hessa isti yootida qaala kaalliza Sambata gallas zaari yootana mala woossides. 43 Shiiqoy laalettidappe guye daro Ayhudatinne Ayhudata ammanon gelidi Xoosse goynniza asati Phawuloosanne Barnabaasa kaallida. Phawuloosantika ista qofsishe isti Xoossa kiyatethan minni daana mala zorida.
44 Kaalliza Sambata gallas katama asappe guuththati xalala attin dariza baggay wuri Goda qaala siyana shiiqides. 45 Ayhudatikka daro dere beyidi qanatetethan kumida. Phawuloosa haasaya eqqetishe iza cayida.
46-47 Phawuloosinne Barnabaassi babbonta xalateththan “Xoossa qaalay koyro intes yootetanas bessees. Gido attin inte qaala leqqideta. Intes merna de7oy bessontayssa interka inte bolla pirdida gish ha7i nuni gede Ayzaabetakko baana koyoos. Qasseka Goday nuna ‘Asas atotetha qaala biitta gaxa gaththana mala ta nena Ayzaabetas poo7o hista kiittadis’ gi azazides” gida.
48 Ayzaabeti hessa siydi daro ufayetida. Goda qaalasikka boncho immida. Merna de7os giigettida derey wuri ammanides. 49 Goda qaalay heeran diza dere ubbaso gakkides. 50 Ayhudati qas Ayana hanon kaseppe minnizaytanne duussan bonchettida macasata hessathoka kataman diza gita asata dentheththidi Phawuloosa bollanne Barnabaasa bolla goodeteththi denthidi ba dereppe kessi gooddida. 51 Phawuloosinne Barnabaasi asay ista ixidayssa bessanas ba toho bolla diza gudulla pittidi Iqoniyoone geetettizaso bida. * 52 Ammaniizayti ufayssaninne Xillo Ayanan kumida.
* 13:1 Negerey Laatine qaala gidishin birsheththay kareth guussa. * 13:17 Kessa 1:7; 12:51 13:18 dandayides issi issi Geeshsha Maxaafati ista lo7ethi oykkides geetes. * 13:18 Tay 14:34; Zaare 1:31 * 13:19 Zaare 7:1; Iya 14:1 * 13:20 Dane 2:16; 1Same 3:20 * 13:21 1Same 8:5; 10:21 * 13:22 1Same 13:14; 16:12; Maza 89:20 * 13:24 Mar 1:4; Luqa 3:3 * 13:25 Yoha 1:20; Mato 3:11; Mar 1:7; Luqa 3:16; Yoha 1:27 * 13:28 Mato 27:22-23; Mar 15:13-14; Luqa 23:21-23; Yoha 19:15 * 13:29 Mato 27:57-61; Mar 15:42-47; Luqa 23:50-56; Yoha 19:38-42 * 13:31 Hawa 1:3 * 13:33 Maza 2:7 * 13:34 Isa 55:3 * 13:35 Maza 16:10 * 13:51 Mato 10:14; Mar 6:11; Luqa 9:5; 10:11