7
Qeeseta halaqay Istifanoose “Hayssi ne bolla shiiqida yo7ozi tumee?” gi oychides.
Istifanoossika hizgides “Ta ishato! Ta aawato! Ta gizayssa siyite! Nu aawa Abrahaamey Kaarane geetettizaso yaanappe kase buro Mesopotoomiyan dishin boncho Goday izas qoncidi, ‘Ne dereppenne ne dabbofe shaaketada ta nena bessizaso ba’ gides. Izikka Kaldaweta biittafe kezidi Kaarane geetettiza biittan uttides. Iza aaway hayqqidappe guye inte ha7i dizaso ha dere iza ehides. * Haray attoshin issi tohoy eqqiza gadey izas hayssafe immetibenna. Gido attin he wode izas issi naykka baynda dishin izinne izappe guyen iza zerethi Biittayo laattana mala Xoossi izas caqqides. * Qasseka Xoossi izas hizgi yootides ‘Ne zerethi allaga biittan bete as gidana. Oyddu xeetu layth aylletetha qambara giddon waayettana. * Gido attin ista aylle mala haariza dere ta qaxayana. Hessafe guye isti he biittafe kezidi hanno ha soyn taas goynnana’ gides. * Hessafe guye qaxxara woga caaqo izas immides. Abrahaameyka Yisaaqa yelidi iza ospuntha gallas qaxxarides. Yisaaqaykka Yaqoobe yelides. Yaqoobeykka tammanne nam7u qommota yelides. *
“He qommota aawati Yoosefe bolla qanatidi iza aylletethas duge Gibxe bayzida. Gido attin Xoossi izara dees; * 10 meto ubbafe iza ashshides. Gibxe kawo Paaroone sinthan boncho immides. Paarooney iza Gibxe biittaninne ba keeththa asa ubba bolla alafetethan shuumides. *
11 “He wode Kanaaneninne Gibxen daro meto ehida gita koshay dendides. Nu aawataska miza kaththi dhayides. * 12 Yaqoobey Gibxe deren kaththi dizayssa siydi nu aawata koyro Gibxe yeddides. 13 Isti nam7antho biza wode Yoosefey izi oonakkonne bana ba ishatas qoncisides. Paarooneykka Yoosefe ishata erides. * 14 Hessafe guye Yoosefey kiittidi ba aawa Yaqoobenne laapun tammanne ichashu gidiza ba dabbota kumeth ehisides. * 15 Yaqoobey duge Gibxe wodhdhides. Izikka nu aawatikka wuri heen hayqqida. * 16 Ista ahaykka Seekeme geetettizaso efin Abrahaamey Eemoore naytappe ba miishan shammida duufon moogetides. *
17 “Xoossi Abrahaames caaqida qaalay poletiza wodey matishin Gibxen diza nu asa qooday dari dari bides. 18 Hessafe guye Gibxe biittan Yoosefe eronta hara kawoy kawotides. 19 Izikka nu asa ba gene ooson metothides. Buro yelettida guutha nayti hayqqana malanne yelida nayta kare kessi wora yeggana mala wolqathides. * 20 He wode Musey yeletides. Izikka Xoossa achchan dosettida mala lo7o naa gidides. Ba aawa keeththan heedzdzu agina al7isson diccides. * 21 Izi gede wora yegetida wode kawo Paaroone maca naya demmada baas ekkadus. Ba naa mala ooththada dichchadus. * 22 Museykka Gibxeta aadhdho eratetha wursi tamarides. Yo7on era; oosonka mino gidides.
23 “Muse laythi oyddu tammu gidida wode Musey ba ishata Isra7eele nayta beyanas ba woznan qoppides. * 24 Izikka issi Gibxe asi Muse bagga asappe issade bolla qoho gaththishin beyidi ba bagga addeza maadides; he Gibxe addeza wodhidi he qohetidayssa halo kessides. 25 Muses Xoossi iza kushen ista wozanayssa iza asay akeekkiza misatides. Gido attin isti hessa yuushi qoppibetenna. 26 Wontetha gallas qasseka Isra7eele naytappe nam7ati ba giddon oyeetishin gakkidi oyeetizayta giigissanas koydi ‘Hayto! Asato inte inte giddon ishantakko; inte waanidi issoy issa qoheetii?’ gides.
27-28 “Ba laggeza bolla qoho gaththidayssi Muse sugi yeggidi ‘Nena nu bolla nuna haarizadenne nu bolla pirdizade ooththi shuumiday oonee? Woykko qamma Gibxe addeza wodhoyssatho tanakka wodhana koyay?’ gides. 29 Musey hessa siyida mala Midiyaame biitta beettidi heen bete as gidi de7ides; Yaanka nam7u attuma naa yelides. *
30 “Hessafe oyddu tammu laythafe guye Siina zuma achchan diza bazzo biittan qeeri wora giddon eexiza tama lacon kiitanchay izas beettides. 31-32 Museykka iza beyida mala malaletides. Azakkonne shaakki eranas izi heen izakko shiiqishin Goda qaalay ‘Tani ne aawanta Xoossa Abrahaame, Yisaaqanne Yaqoobe Xoossa’ gishin siydes. Museykka daro daggamides; xeellanaska xalibenna.
33-34 “Godayka izas ‘Hayssi ne eqqidasoy geeshshaso gidida gish ne tohoppe caamma shodda. Gibxen diza ta dereta waaye ta tumappe beyadis; isti waassiza waaye waasoza ta siyada ista ashshanas wodhdhadis. Ne ha7ikka haaya; ta nena duge Gibxe zaarada kiitana’ gides.
35 “Histin heyti ‘Nu bolla nena haarizadenne pirdizade histi ooni shuumidee?’ giidi asay kase kadhida Muse Xoossi qeeri wora giddon izas bettida kiitancha baggara ista haarizadenne ashshizade histidi istako zaari yeddides. 36 Izikka ista kaalethidi Gibxeppe kessides. Gibxen, Zo7o Abbaninne bazzo biittan oyddu tammu laythi daro malalisiza miishatanne gita malatata istas ooththides. * 37 “Isra7eele naytas ‘Ta mala nabe Xoossi inte giddofe denthana’ gidayssi hayssa Musekko! * 38 Izikka Siina zuma bolla haasayida kiitancharanne bazzo biittan nu aawatara dere duulata giddon dees. De7o qaalakka ha nuus aaththanas ekkides. *
39 “Nu Aawati gidikko izara eqqetida attin izas azazettanas koyonta gish ba woznara guye Gibxe simmida. 40 Aaroneska ‘Nu sinthara biza eeqa nuus giigissa! Nuna Gibxeppe kaalethi kessida Musey waanidakko nu erokko’ gida. * 41 He wode mara misile medhidi eeqas yarsho shiishida. Barka medhdhida ba kushe ooson ufayetidi guppida. *
42 “Gido attin Xoossi istas zokko zaarides. Isti salo xoolintetas goynnana mala aaththi immides. Hessika nabeta maxaafan
‘Inteno Isra7eele nayto!
Inte bazzo biittan oyddu tammu layth diza wode intefe yarshonne muxuwata taas shiishshi eretii?
43 Harappeka inte goynnanaso ooththida eeqa Molooke dunkananne
inte eeqa Rafaanne xoolinte misileza dhoqu dhoqu histi oykkideta.
Hessa gish ta intena inte dizasoppe denthada Babiloonera aaththa yeddana’
geetettidi xaafettides.
44 “Xoossi Muse bessida leemisoza malanne azazidayssa mala oosettida Xoossi asara gaaggiza dunkaneya nu aawatara bazzo biittan de7adus. * 45 Nu Aawati dunkaneyo ekkidayssafe guye Xoossi Iyaaso kaaleththin kase ista gooddida dereta laattida wode dunkaneyo ekki geellida. Dawute wode gakkanaas dunkaneya he biittan de7adus. * 46 Dawuteykka Xoossa sinthan boncho demmidi Yaqoobe Godas aqoso giigissanas woossides. * 47 Gido attin Solomooney izas aqqoso keexxides.
48-50 “Gido attin wogga Goday asa kushey keexida keeththan deenna. Hessika nabey
kase Geeshsha maxaafan xaafetida mala
‘Saloy ta uttiza alga;
biittaykka ta tohon yedhdhizaso;
histin inte taas ay mala keeththe keexxetii?
woykko ta shempanasoy awayssee? *
Hayssa wursi ta kushey ooththibenee?’
gees Goday Xoossay.
51 “Inteno wozna muumeto! Haytha tulleto! Inteka inte aawata mala ubba wode Xillo Ayanara eqetteta. * 52 Nabetappe inte Aawati gooddonta nabey oonee? Xilloza Yohannisa kaseti yootida nabetaka wodhida; inteka ha7i iza aaththi immidetanne wodhideta. 53 Kiitancha baggara intes imettida woga ekkideta attin naagibeekketa” gides.
Istifanoossi shuchchan cadeti hayqqides
54 Duulatan diza asay hessa siyida mala daro hanqettidi, iza bolla ba achchi garcides. 55-56 Gidinka Istifanoosi Xillo Ayanan kumidinne pude salo tishshi histi xeellishin Xoossa bonchon Yesusi Xoossa ushachchan eqqidayssa beyidi “Hekko ta saloy doyettidayssanne Asa Nay Xoossa ushachchan eqqidayssa beyays” gides.
57 Hessa wode asay qaala dhoqu histi waassishe ba haythe tucci oykidi izakko issife woxxides. 58 Istifanoose oykkidi katamappe gede kare olida. Shuchchan cach oykkida. Hessi wuri hanishin markatikka ba may7o Sawule geetettiza paantha achchan woththida. 59 Isti shuchchara iza caddishin Istifanoossi “Ta Goda Yesusaa ta shempoyo neekko ekka” giidi woossides. 60 Qasseka gulbatidi dhoqa qaalan “Godo! Haytanta nagara qoodoppa” giidi waassides. Hessa gidappe guye hayqqides.
* 7:4 Medhe 11:31; 12:4 * 7:5 Medhe 12:7; 13:15; 15:18; 17:8 * 7:6 Medhe 15:13-14 * 7:7 Kessa 3:12 * 7:8 Medhe 17:10-14; 21:2-4; 25:26; 29:31-35:18 * 7:9 Medhe 37:11; 37:28; 39:2,21 * 7:10 Medhe 41:39-41 * 7:11 Medhe 42:1-2 * 7:13 Medhe 45:1; 45:16 * 7:14 Medhe 45:9-10,17-18; 46:27 * 7:15 Medhe 46:1-7; 49:33 * 7:16 Medhe 23:3-16; 33:19; 50:7-13; Iya 24:32 * 7:19 Kessa 1:10-11; 1:22 * 7:20 Kessa 2:2 * 7:21 Kessa 2:3-10 * 7:23 Kessa 2:11-15 * 7:29 Kessa 18:3-4 * 7:36 Kessa 7:3; 14:21; Tay 14:33 * 7:37 Zaare 18:15,18 * 7:38 Kessa 19:1-20:17; Zaare 5:1-33 * 7:40 Kessa 32:1 * 7:41 Kessa 32:2-6 * 7:44 Kessa 25:9,40 * 7:45 Iya 3:14-17 * 7:46 2Same 7:1-16; 1Taar 17:1-14 * 7:48-50 Isa 66:1-2 * 7:51 Isa 63:10