11
Yesusi gita bonchora Yerusalame gelides
(Mato 21:1-11; Luqa 19:28-40; Yoha 12:12-19)
Isti gede Yerusalamen Dabrazayte geetettiza zuma achchan diza Betefaagenne Bitaaniya geetettizaso matida wode Yesusi bana kaallizaytappe nam7ata hizgi kiittides, “Gede inte sinthan diza gutayo biite. Inte he gelida mala heen asi togi eronta qashon diza hare gutte inte demmana; birshidi iza ha ekki yiite. Oonikka intena ‘Hayssa ays ooththetii?’ giikko Godas koshshees giidi yootite; izikka intes eeson zaari yeddana” gides.
Istika biidi issi keeththa karen oge bolla qasheti diza hare gutte demmidi birshida. Heen eqqida issi issi asati “Hare gutteza aazas birshetii?” gi oychida.
Yesusa kaallizayti Yesusi istas gida mala asatas yootin ero eki biite gida. Guttezakka Yesusakko ehidi ba may7o iza zokko bolla yeggin Yesusi iza toggides. Daro asay ba may7o kessi kessi oge bolla micides. Bagga asay cilila mitha hayth qanxi qanxidi oge bolla laallides. Yesusappe sintharanne guyera diza asay qaala dhoqu histidi
“Hoosana;
Goda sunthan yizadey anjettidade.
10 Hanna yizara nu aawa
Dawute kawoteththaya anjettidaro;
hoosana!
Bolla salon
Xoossi bonchetto” gishe waassides.
11 Yesusi Yerusalame gakkidi hessafekka Xoossa Keeththe gelides. He heeran dizayssa wursi xeelidi gadey qammida gish tammanne nam7atara gede Bitaaniya kezides.
Yesusi qangida balase mithayo
(Mato 21:18-19)
12 Wontetha gallas isti Bitaaniyappe kezi bishin Yesusi gafides. 13 Izi issi haythi cililida balase geetettiza mithi hahon beyidi ayfey daanakkonne giidi iziikko yides. Gido attin balase mithi ayfonta wode gidida gish haythafe attin issi ayfekka izippe demmibenna. 14 Hessa gish mithayo “Hannife guye mernas oonikka neeppe ayfe mooppo!” gides. Iza kaallizaytikka izi gizayssa siyida.
15 Gede Yerusalame bida; heeppeka gede Xoossa Keeththe gelidi heen bayzizaytanne shamizayta kessi goodo oykkides. Miishe laammizayta xaraphezanne haraphe bayzizayta oyde gufanthi gufanthi yeggides. 16 Oonikka ay miish tookkidi Xoossa Keeththe gibbe giddora aadhdhonta mala diggides. 17 Istaka tamarsishe “Ta keeththi dere ubbas Woosa Keeththe gidana geetetti xaafettibenee? Gido attin inte qasse kaysota gongolo kessideta” gides. *
18 Qeeseta halaqatinne Muse woga tamarsizayti hessa siydi iza wosti dhayssanakkonne oge kosh oykkida. Gido attin dereyka iza timirtezan malalettida gish izas babbida.
19 Istika gadey qammin katamaype kezi bida.
20 Wontetha gallas maalado isti ogera aadhdhi bishin balase mithaya xaphoppe melidaro beyida. 21 Yo7ozi iza woznan akeeketin Phexroosi Yesusa “Astamare! Hekko, hanna ne qangida balaseya meladus” gides.
22 Izikka zaaridi “Xoossa ammante. 23 Ta intes tumu gays; ‘Oonikka hayssa zumaza ne dhoqalletada gede abban gela’ gizakkonne hessaka woznan sidhonta ammanidakko izaades hanana. * 24 Hessa gish inte woossan oychidaz wursi ekkida mala ammanikko intes hanana. 25 Hessathoka inte woossas eqqiza wode inte Salo Aaway inte nagara atto gaana mala inteka intena qohidayta nagara wursi atto giite. 26 Inte atto goonta ixikko inte salo aawaykka inte nagara atto geenna.” gides. **
27 Qasseka Yerusalame yida. Yesusi Xoossa Keeththe kare giddon gedene haane yuuyetishin Qeeseta halaqati, Muse woga tamarsizaytinne dere cimati izakko shiiqidi, 28 “Hayssa ne ooththizay ay godatetharaa? Hayta ne ooththana mala hayssa mala godateth nees ooni immidee?” gida.
29 Yesusikka istas zaaridi “Ane takka intena issi oysho oychays inteka taas zaarikko takka ha yo7ota ay godateththara ooththizakkonne intes yootana. 30 Yohannisa xinqatey Xoossafeyee? Asappee? Ane taas zaarite” gides.
31 Istika ba giddon issoy issara “Nu saloppe giikko izi nuna ‘Histin aazas iza ammanibeyketii?’ gaana; 32 ‘Nu asappe’ giikko” Yohannisi tumu nabe gididayssa derey wuri ammaniza gish hessatho gaana babbida.
33 Hessa gish “Nu erokko” giidi Yesusas zaarida. Yesusikka “Histikko ta hayta aaza godateththara ooththizakkonne takka intes yootikke” gides.
* 11:17 Isa 56:7; Er 7:11 * 11:23 Mato 17:20; 1Qoro 13:2 * 11:26 Issi issi Geeshsha Maxaafati paydo 26 bolla diza qofa gujjetes. * 11:26 Mato 6:14-15