13
Xoossa Keeththi laalettanayssa Yesusi kasetidi yootides
(Mato 24:1-2; Luqa 21:5-6)
1 Izi Xoossa Keeththafe kezishin iza kaallizaytappe issoy “Astamare! Hayssi keeththaynne keeththay keexettida shuchchay ay mala lo7izakkonne hayssa beyay?” gides.
2 Yesusikka zaaridi “Hayta gita keeththata xeellay? Shuchchati issoy issa bolla diza mala deettenna; wurikka laalettana” gides.
Wode wursetha malatata
(Mato 24:3-14; Luqa 21:7-19)
3 Yesusi Xoossa Keeththa ginara Dabrazayte zuma bolla uttidishin Phexroosi, Yaqoobi, Yohannissinne Indiraassi xalla izakko shiiqidi,
4 “Hayssi ayde hananakkonne nuus yoota. Hayssi wursethan poletanas malatay aazee?” gi oychida.
5 Yesusikka istas “Oonikka intena baleththonta mala naagettite.
6 Buro daroti ‘Ta Kirstoosa’ gishe ta sunthan yaana; darotaka baleththana.
7 Inte olanne ola wore siyiza wode daggammofte. Hessi hananayssi attenna. Wursethi gidikko burona.
8 Derey dere bolla kawoy kawo bolla dendana, daroson biitta qaathinne koshay hanana; heyti wuri miixas leeso mala.
9 “Inte intes naagettite. Buro intena dere duulatan aaththi immana. Isti intena Ayhudata Woosa Keeththan garafana. Inte ta markata gidana mala ta gish dere daannata sinthaninne kawota sinthan eqqana.
10 Koyrottidi Mishiraachcho qaalay dere ubbas sabakettana bessees.
11 Inte oyketidi pirdas shiiqiza wode hinno he saateyin intes imettizaro haasayite attin biidi nu ay giinoo? giidi kaseti hirgofte. Haasayanay Xillo Ayanappe attin intena gidekketta.
12 “Ishay isha, aaway ba naa hayqos aaththi immana; nayti bana yelidayta bolla makalananne wodhana.
13 Ta geedon inte asa ubban ixettidayta gidana. Wurseth gakkanaas minni eqqidadey gidikko attana.
Yerusalame bolla gakkana gita meto
(Mato 24:15-21; Luqa 21:20-24)
14 “Inte harassiza tunatethi izas bessontason eqqidashe beykko nababizadey woznan wotho; Yuhudan dizayti pude zuma bolla baqatetto.
15 Keeththa karen dizaddey so geloppo; ba miish kessana giidi keeththe geloppo.
16 Goshshason dizaddey ba may7o ekkanas guye simmofo.
17 He gallasatan shaara macasatassinne naa dhanthizaytas aayye-ana!
18 Hessika balgon gidonta mala Xoosse woossite.
19 Koyro Xoossi medhetetha wursi medhosoppe ha7i gakkanaas woykko hayssafe guye iza misatizay baynda gita metoy hanana.
20 Goday he gallassata qaanthontakko oonikka attenna shin baassi doorettidayta gish he gallassata qaanthides.
21 “He wode oonikka hekko Kirstoosi hayssan dees; giikko woykko hekko heen dees giikko ammanoppite.
22 Wordo Kirstoosatinne wordo nabeti buro dendidi malatatanne kase hani eronta pala miish ooththana. Istas dandayettikko haray atto shin doorettidaytakka baleththana.
23 Hessa gish naagettite; he wodey gakkonta dishin haara hayssa wursa ta intes yootadis.
Kirstoosa nam7antho yuus
(Mato 24:29-31; Luqa 21:25-28)
24 “He wode he metozappe kaallidi
awa arshey dhumana;
aginaykka poo7usuku.
25 Xoolinteti saloppe qoqofettana,
salon diza wolqamati qaaxana.
26 He wode Asa Nay gita wolqaranne bonchora salo shaarara yishin asay iza beyana.
27 Izikka kiitanchata yeddidi oyddu baggafe biitta gaxappe gaxa gakkanaas diza baas doorettidayta shiishana.
Balase mithay leemiso
(Mato 24:32-35; Luqa 21:29-33)
28 “Leemisoza balase mithafe tamarite. Unquloy cililiza wode haythi kessishin boney matidayssa inte ereeta.
29 Hessathoka hayti ta gidayti poletishin inte beykko wodey mati yiidi penge gakkidayssa erite.
30 Ta intes tumu gays; ha yo7oti polettana gakkanaas hayssi ha yelettay aadhdhenna.
31 Saloynne sa7ay aadhdhana shin ta qaalay gidikko aadhdhenna.
Goday yaana gallassayonne saateyo oonikka erenna
(Mato 24:36-44)
32 “Qasse he gallassay gish woykko he saatey gish ta Aawappe attin Salo Kiitanchata gidinka Naaza gidinka oonikka erenna.
33 Hessa gish wodey aydekkonne inte eronta gish nagettite, minnitenne woossite.
34 Hessika ba keeththe ashkaratas aggidi ashkarata issa issa ooso oythidi penge naagizayssi beggidi naagana mala azazidi bida asa misatees.
35 “Histikko keeththa aaway ayde yaanakkonne woykko qamma leela gidoth yaanakonne woykko koyro kuttoy baqishin yaanakkonne woykko wonta bolla bazzoy zo7ishin yaanakko inte eronta gish beggidi naagite.
36 Inte qopponta dishin izi yiidi inte dhiskidishin intena demmofo.
37 “Ta intes yootizayssa asa ubbas yootays; minnidi naagite! gays” gides.