17
Yesusa medhay laamettides
(Mar 9:2-13; Luqa 9:28-36)
Usuppun gallassafe guye Yesusi Phexroosanne Yaqoobe qasseka Yaqoobe isha Yohannisa banara ekkidi istara xalala issi dhoqa zuma bolla kezides. * Isti heen dishin Yesusa medhay laamettides; iza ayfesoy Awa arshe mala poo7ides; iza may7oykka poo7o mala xolqides. Heerakka Museynne Elaasi Yesusara haasayishe istas beettides. Phexroosi Yesusa “Godo! Nu hannin dizaakko nuus lo7okko! Ne shene gidikko issi daase nees, issi daase Muses, issi daase Elaasas heedzdzu daase ooththoo?” gides.
Izi buro haasayan dishin poo7iza shaaray ista kammides; shaara gaaththara “Tani izan ufayettiza ta dosiza ta nay hayssa; izi gizaz siyite” giza qaala giiris siyettides. *
Iza kaallizaytikka hessa siyida wode dagammidi biitta bolla gufannida. Yesusi istako shiiqi ista ba kushen bochidi “Dendite; babbofte!” gides. Isti dhoqu gi xeellishin Yesusappe attin izara hara as oonakka be7ibeetenna.
Isti zuma bollafe wodhdhishin Yesusi “Asa Nay hayqoppe dendana gakkanaas inte beyoyssa oonaska yootonta mala” gi azazides.
10 Yesusa kaallizayti “Histin Muse woga tamarsizayti, Elaasi kasetidi yaana bessees aazas gizoo?” giidi oychida. *
11 Izikka istas “Tumakko; Elaasi yiidi wursikka giigissana giidi zaarides. 12 Ta intes gizay Elaasi yides; gido attin asay ba koyda mala iza bolla ooththides attin iza erbeenna; hessathoka Asa Nay ista kushen waaye beyana” gides. *
13 He wode Yesusa kaallizayti Yesusi istas yootizays Xammaqiza Yohannisa gish gididayssa erida.
Daydanthi oykkida issi naa Yesusi pathides
(Mar 9:14-29; Luqa 9:37-43)
14-15 Yesusinne iza kaallizayti asaakko simmida mala issi asi Yesusakko shiiqidi iza sinthan gulbatidi “Godo! Ta naa dayssa bollafe yeggiza hargey daro waayssiza gish taas maarariki! Daro wode taman kundees; haaththanka gellees. 16 Tani naaza nena kaallizaytakko ehadis shin isti iza pathana dandayibeetenna” gides.
17 Yesusi “Neno ammanonta geella yelettazo! Ayde gakkanaas ta intenara daanee? Qasse ayde gakkanaas ta intena dandayanee? Ane naaza ha taakko ehite” gides. 18 Hessafe guye Yesusi daydantha seeridi naazappe kessides; naazikka he saateppe simmidi paxides.
19 Yesusa kaallizayti xalala izakko shiiqidi “Nuni daydantha kessanas aazas dandaybeykkonii?” giidi oychida.
20 Izikka istas “Intes ammanoy pace gidida gish dandaybekketa; ta intes tumu gays; qeeri gaashe ayfe mala ammanoy inte bolla dizaakko hayssa zuma ‘Hayssafe dendada gede ba!’ inte gidakko izi intes baana. Intena xoonanay deenna. * 21 Hayssa malay gidikko xoomaninne woossan attin haran kezenna” gides. *
22 Isti Galilan issife dishin Yesusi ista “Tana Asa Naa asas aaththi immana. 23 Istika iza wodhana; izikka heedzdzantho gallas dendana” giin iza kaallizayti keehi mishettida.
Xoossa Keeththa giira qanxo
24 Yesusinne iza kaallizayti Qifirnahoome geetettizaso gakkidappe guye Xoossa Keeththa giira ekkizayti Phexroosakko shiiqidi “Inte astamarey Xoossa Keeththa giira nam7u dinareza ays qanxenee?” gida. *
25 Izikka istas “Qanxees” gides. Phexroosi so gelida mala Yesusi kasetidi “Simoona dere kawoti giira gidin woykko qaraxa gidin ba naytappe ekkizoyee? Haratappe ekkiza misatizee?” gides.
26 Phexroosikka “Haratappe ekkettes” gides. Yesusi “Histikko nayta bolla accoy ba guussaka! 27 Histikkokka ista nu dhuphethonta mala ne mole oykkiza gite ekka baada abban yegga; koyro oykkida moleza duuna ne pooqada demmiza miisha ekkada ta suntharanne ne sunthara giira qanxa” gides.
* 17:1 2Phex 1:17-18 * 17:5 Medhe 22:2; Zaare 18:5; Mato 3:17; 12:8; Isa 2:7; Mar 1:11; Luqa 3:22 * 17:10 Mik 4:5 * 17:12 Mato 11:14 * 17:20 Mato 21:21; Mar 11:23; 1Qoro 13:2 * 17:21 Issi issi Geeeshsha Maxaafatan paydo nam7u tammanne issin bolla diza qofay gujettibenna; qaalaykka Mar 9:29 dizayssa mala. * 17:24 Kessa 30:13-15; 38:26 17:24 Issi dinarey he wode issi asas nam7u gallasa damoza lagge.