ሃዋሬታ ኦሶ
ጊዶ ቆፋ
ሃዋሬታ ኦሶ ማጻፋዚ ሉቃሳ ሚሺራቾ ቃላፔ ካሊዛይሳ፤ ሃ ማጻፋዛስ ኣይፌ ቆፋይ ኮይሮ ዬሱሳ ካሊዛይቲ ጺሎ ኣያናይ ካሌꬂን ኢዛ ጊሻስ ዮቲዛ ሚሺራቾ ቃላ፥ «ዬሩሳላሜን፥ ዩሁዳ ዴሬ ኡባን፥ ሳማሪያኒኔ ቢታ ጋጻ ጋካናስ» 1፡8 ሚሺራቾ ቃላ ኢስቲ ዎስቲ ኡባ ጋꬂዳኮ ሄሳ ዮታናሳ፤ ማጻፋዚ ኣማኖይ ኣይሁዳታ ጋርሳን ዶሚዲ ኩሜꬃ ኣላሜ ኣሳይ ኣማናና ጋካናስ ኢዚ ዋኒ ዋኒ ኣኪ ኣኪ ቢዳኮ ዮቲዛይሳ። ሃይሳ ማጻፋ ጻፊዳይሲ ኣማኒዛይቲ ኦሮሜ ካዎራ ኤቄታናስ ጋርሳራ ዮኦ ቃቺዛይታ ጊዶንታይሳኔ ኣማኒዛይታ ኣማኖይ ሃንኮ ኣይሁዳታ ኣማኖ ፖሎኮ ጋꬂዛዝ ጊዲዳይሳ ኤሪሳናስ ዳሮ ባጼቲዴስ።
ሃዋሬታ ኦሶ ማጻፋይ ዬሱሳ ጊሻስ ሚሺራቾ ቃላይ ጋኪዛሶይ ዎዴን ዎዴን ኣኪ ኣኪ ቢዛይሳኔ ዎሳ ኬꬄይ ሚኒ ጻጲዳይሳ ቤሲዛ ሄꬑ ጊታ ኪፊሌታን ሻኬታናስ ዳንዳዬስ።
1. ኣማኒዛይታ ኣማኖይ ዬሱሲ ዴንዲዲ ፑዴ ሳሎ ቢዳፔ ጉዬ ዬሩሳላሜን ዶሚዴስ።
2. ኢስራኤሌ ዴሬ ኩሜꬅ ጋኪዴስ።
3. ኦሮሜ ጉጂ ኤኪዲ ሜዲቴራኔ ኣባ ዩሾን ዲዛ ዴራ ጋካናስ ኦይኮይሳ ዮቴስ።
ሃዋሬታ ኦሶ ማጻፋን ኬሂ ቆንጪ ቤቲዛይ ጺሎ ኣያና ኦሶ ጊዲሺን ጴንጼቆስቴ ባኣሌ ጋላስ ዬሩሳላሜን ኣማኒዛ ኣሳ ቦላ ዎልቃራ ዎꬎይሳ፥ ሄሳꬆካ ሄ ማጻፋዛን ዮቴቲዳ ዮኦታን ኡባን ቆንጪዳ ማላ ጺሎ ኣያናይ ዎሳ ኬꬃኔ ዎሳ ኬꬃ ካሌꬂዛይታ ካሌꬂዳይሳኔ ሚንꬄꬂዳይሳ ጉጄስ። ቤኒ ዎዴ ዮቴቲዛ ኣማኖ ቃላይ ዱማ ዱማ ኦጌራ ሳባኬቲዴስ። ሃዋሬታ ኦሶ ማጻፋን ፖሌቲዳ ኦሶቲካ ኪታዚ ኣማኒዛይታ ዴኦኔ ኢስታ ኢሲፌቴꬃን ዲዛ ዎልቃይ ኣይ ማላ ሚኖኮኔ ኤሪሴቴስ።
ሃ ማጻፋይ ኦይኪዳ ኩሜꬃ ቆፋ
ማርካቴꬃስ ጊጌቴꬅ 1፡1-26
ዬሩሳላሜን ዮቴቲዳ ማርካቴꬅ 2፡1—8፡3
ዩሁዳኒኔ ሳማሪያን ዮቴቲዳ ማርካቴꬅ 8፡4—12፡25
ጳዉሎሳ ሃዋሬቴꬃ ኦሶ 13፡1—28፡31
ሚሺራቾ ቃላ ዮታናስ ጳዉሎሳስ ኮይሮ ቡስ 13፡1—14፡28
ዬሩሳላሜ ሺቆ 15፡1-35
ሚሺራቾ ቃላ ዮታናስ ጳዉሎሳስ ናምኣንꬆ ቡስ 15፡36—18፡22
ሚሺራቾ ቃላ ዮታናስ ጳዉሎሳስ ሄꬓንꬆ ቡስ 18፡23—21፡16
ዬሩሳላሜን፥ ቂሳሪያኒኔ ኦሮሜን ጳዉሎሳ ቃሼቴꬅ 21፡17—28፡31
1
ዬሱሲ ሳሎ ዴንዲ ቡስ
1 ቶፊሎሳ! ዬሱሲ ኦꬃናሲኔ ታማርሳናስ ኦይኪዳይሳ ዉርሳ ታ ኔስ ኮይሮ ማጻፋን ጻፋዲስ።
2 ሄሲካ ኢዚ ፑዴ ዴንꬃ ጋላስ ጋካናስ ባ ዶሪ ኪቲዳይታስ ጺሎ ኣያና ባጋራ ኢዚ ኢስታስ ኢሚዳ ኣዛዞኮ።
3 ኢዚ ዳሮ ዋዬ ቤኢዳፔ ጉዬ ኢስታኮ ሺቂዲ ሃይቆፔ ዴንዳናይሳ ኢስታስ ዳሮ ማርካራ ቆንጪሲሼ ኦይዱ ታሙ ጋላስ ጋካናስ ኢስታስ ጋላስ ጋላስ ቤቲሼ ጾሳ ካዎቴꬃ ጊሻስ ዮቲዴስ።
4 ኢስታራ ኢሲፌ ማዳን ኡቲ ዲሼ ኢስታ፥ «ዬሩሳላሜፔ ኬዞፒቴ፤ ጊዶ ኣቲን ታ ኢንቴስ ዮቲሺን ኢንቴ ሲዪዳይሳ ታ ኣዋይ ኢሚዳ ኡፋይሳ ናጊቴ።
5 ዮሃኒሲ ሃꬃን ጻማቂዴስ፤ ኢንቴ ጊዲኮ ጉꬃ ዎዴፔ ጉዬ ጺሎ ኣያናን ጻማቄታና» ጊዲ ዮቲዴስ።
6 ኢስቲካ ኢሲ ቦላ ሺቄቲ ዲሼ፥ «ጎዶ! ኔ ኢስራኤሌታ ካዎቴꬅ ዛራዳ ሃኢ ኤሳኔ?» ጊ ኦይቺዳ።
7 ኢዚካ ኢስታስ፥ «ኣዋይ ባ ሼኔን ዎꬂዳ ዎዴ ኤሮይ ኢንቴስ ኢሜቲቤና።
8 ጊዶ ኣቲን ጺሎ ኣያናይ ኢንቴ ቦላ ዎꬊዳ ዎዴ ኢንቴ ዎልቃ ኤካና። ዬሩሳላሜንካ፥ ዩሁዳንካ፥ ሳማሪያንካ ኡባሶን ቢታ ጋጻ ጋካናስ ኢንቴ ታስ ማርካታ ጊዳና» ጊዴስ።
9 ሄሳ ጊ ዮቲዳፔ ጉዬ ኢስቲ ጼሊሺን ፑዴ ሳሎ ዴንዲዴስ፤ ሻራይካ ኢስታ ኣይፌፔ ኢዛ ጌንꬂዴስ።
10 ኢዚ ቢሺን ኢስቲ ኢዛ ቲሺ ሂስቲ ፑዴ ሳሎ ጼሊሺን ቦꬃ ማይኦ ማይኢዳ ናምኡ ኣሳቲ ቆፖንታ ኢስታ ኣቻን ኤቂዲ፥
11 «ኢንቴኖ ጋሊላ ኣሳቶ! ኢንቴ ፑዴ ሳሎ ጼሊሼ ሃይሳን ኣዛስ ኤቂዴቲ? ሃይሲ ኢንቴ ማታፔ ፑዴ ሳሎ ዴንዲሺን ኢንቴ ቤኢዛ ዬሱሲ ሳሎ ኬዚሺን ኢንቴ ቤኢዳ ማላ ሄሳꬆካ ኢዚ ሃ ሲሚ ያና» ጊዳ።
ዩሁዳ ሶሆን ማቲያሳ ዶሬቴꬅ
12 ሄሳፌ ጉዬ ዳብራዛይቴ ጌቴቲዛ ዙማ ቦላፌ ዎꬊዲ ዬሩሳላሜ ሲሚዳ። ሄ ዙማይካ ዬሩሳላሜፔ ኢሲ ኪሎ ሜቲሬ ማላ ሃኬስ።
13 ጌዴ ካታማዮ ጌሊዲ ካሴ ባ ዲዛ ኬꬃ ፖቄ ቦላ ኬዚዳ፤ ሄይቲካ ጴጽሮሳ፥ ዮሃኒሳ፥ ያቆቤ፥ ኢንዲራሳ፥ ፒሊጶሳ፥ ቶማሳ፥ ባርቴሌሞሳ፥ ማቶሳ፥ ኢልፊዮሳ ና ያቆቤ፥ ባ ባጋስ ሚሼቲዛ ሲሞናኔ ያቆቤ ና ዩሁዳ።
14 ሄይቲ ዉሪካ ማጫሳታፔ ዬሱሳ ኣዮ ማራሚራ ሄሳꬆካ ኢዛ ኢሻታራ ኢሲ ዎዚናን ኢሲ ቦላ ቃንጾንታ ሚኒ ዎሲዳ።
15 ሄ ጋላሳታን ጴጽሮሲ ጼታኔ ናምኡ ታሙ ኣማኒዛ ኣሳ ጊዶን ኤቂዲ፥
16 «ታ ኢሻቶ! ዬሱሳ ኦይኪዳ ኣሳታ ካሌꬂ ኤሂዳ ዩሁዳ ጊሻስ ጺሎ ኣያናይ ካሴቲዲ ዳዊቴ ዶናን ሃሳይዳ ጌሻ ማጻፋ ቃላይ ፖሌታና ኮሼስ።
17 ኢዚካ ኑፔ ኢሳዴ ማላ ታይቤቲዲ ሃይሳ ሃ ኦሶዛን ጌላናስ ቃዳ ዴሚዴስ» ጊዴስ።
18 ጊዲኮካ ሃይሳዴይ ባ ኢታ ኦሶን ዴሚዳ ሚሻን ጋዴ ሻሚዴስ፤ ሄንካ ባ ሊጴን ጉፋኒ ኩንዲን ኢዛ ኣሳቴꬃይ ጊዶፌ ጳልቄቲ ዎꬊዴስ፤ ኢዛ ማራጬይ ቢታ ቦላ ዛዜቲዴስ።
19 ሄሲካ ዬሩሳላሜን ዲዛ ኣሳ ኡባስ ሲዬቲዴስ፤ ቢታይካ ኢስታ ቃላራ፥ «ኣኬልዳማ» ጌቴቲዴስ፤ ሄሳስ ቢርሼꬃይካ ሱꬃ ቢታ ጉሳ።
20 ጉጂዲካ ጴጽሮሲ፥
«ዬꬃ ማጻፋን፥
‹ኢዛ ጋዴይ ሜላ ኣቶ፤
ኢዛን ኣይ ኣሲካ ዶፖ፤
ቃሴካ ኢዛ ዳናቴꬅ
ሃራ ኣሲ ኤኮ›
ጌቴቲ ጻፌቲዴስ።
21 «ሄሳ ጊሻስ ጎዳ ዬሱሲ ኑናራ ዲዛ ዎዴ ኡባን ኑናራ ኢሲፌ ዲዛይታ ጊዶፌ ኑ ኢሳዴ ዶራናስ ኮሼስ።
22 ሄሲካ ዮሃኒሳ ጺንቃታፔ ሃ ሲሚን ዬሱሲ ኑፔ ሻኬቲ ዴንዲ ባና ጋካናስ ኑናራ ዲዛዴ ጊዳናስ ቤሴስ፤ ጋሶይካ ሃ ኣሳታፔ ኢሳዴይ ኑናራ ዬሱሳ ዴንꬃስ ማርካ ጊዳና ኮሼስ» ጊዴስ።
23 ሄሳ ጊሻስ ባርሳባሳ ዎይኮ ዮስጾሳ ጌቴቲዛ ዮሴፌኔ ማቲያሳ ናምኣታ ሺሺዲ፥
24 «ጎዶ! ኔኒ ኣሳ ኡባ ዎዚና ኤራሳ፤ ሃይታ ናምኣታ ጊዶፌ ኔ ኦና ዶሪዳኮ ኢዛዴ ኑና ቤሳ።
25 ዩሁዳይ ዬጊ ቢዳሶን ሃ ኦሳ ኦꬃናዴኔ ሃዋሬ ጊዳናዴ ኔ ዶራ» ጊ ዎሲዳ።
26 ሄሳፌ ሳማ ዬጊን ሳማይ ማቲያሳስ ኬዚዴስ፤ ኢዚካ ታማኔ ኢሲ ሃዋሬታራ ኢሲፌ ታይቤቲዴስ።