8
ኣሞጼይ ኣጁታን ቤኢዳ ቴራይ ኩሚዳ ኬሼ
1 ኡባፌ ዎልቃማ ጎዳይ ታና ሃራ ኣጁታ ቤሲዴስ፤ ሄሲካ ቴራይ ኢዛን ኩሚ ዲዛ ኬሼ።
2 ጎዳይ ታና፥ «ሄሲ ኔ ቤኢዛይሲ ኣዜ?» ጊ ኦይቺዴስ፤ ታኒካ ኢዛስ፥ «ቴራራ ዲዛ ዳቾ ቤያይስ» ጋዲስ፤ ቃሴካ ጾሲ ታስ፥ «ታ ዴሬ ኢስራኤሌስ ዉርሴꬂ ጋኪዴስ፤ ሃይሳፌ ጉዬን ታኒ ኢስታ ቃጻዮንታ ኣጊኬ።
3 «ኢስቲ ጾሳ ኬꬃን ሲሲዛ ዬꬃይ ሄ ዎዴ ዬሆን ላሜታና፤ ዳሮ ኣሳ ኣሃይ ኣዋን ኣዋንካ ኩንዲ ኣታና፤ ኣዋንካ ጮ ዬጌቲ ኣታና» ጌስ።
ኢስራኤሌ ኩንዴꬅ
4 ኢንቴኖ ሜቶቲዳ ኣሳ ቆሂዛይቶ!
ቃሴ ማንቆታ ቢታፌ ꬋይሳና
ኮይዛይቶ! ሃይሳ ሲዪቴ!
5 ኢንቴ፥ «ኑኒ ኑ ካꬃ
ባይዛና ማላ
ኣጊና ጼሮን ቦንቺዛ
ባኣሌይ ኣይዴ ኣꬋኔሻ!
ኑኒ ካꬅ ጊያ ጌልꬃናስ
ሳምባታይካ ኑስ ኣይዴ
ኣꬋኔሻ!
ሄ ባኣሌይ ኣꬊኮ
ኑኒ ማካ
ሚሻ ጉꬂዲ
ኣልኦ ዋጋን ባይዛና፤
ቃሴካ ዎርዶ ሜዛኔን
ኣሳ ባሌꬃና።
6 ጊስቴ ሃርቆካ ሙሩታ
ጊስቴ ዋጋን ባይዛና፤
ማንቆታ ቢራን፥ ሜቶቲዳይታካ
ቶሆ ጫማን ሻማና» ጌታ።
7 ያቆቤይኔ ኢዛ ዜሬꬃቲ ኢዛን ጬቄቲዛ ጎዳይ፥ «ኢስቲ ኦꬂዳ ኦሶ ኡባ ታኒ ባሊኬ፤
8 ሃይሳ ጌዶን ቢታይ ቡሮ ቃጻና፤ ቢታይ ቦላ ዲዛይ ዉሪካ ዬካና፤ ኣባዬ ሻፋይ ኪጺዲ ጉሚዛይሳꬆ ቢታ ኡባይ ቃꬂ ዮሺኩዮሺካና» ጊዲ ባርካ ባናን ጫቂዴስ።
9 ኡባፌ ዎልቃማ ጎዳይ፥ «ሄ ዎዴ ታኒ ጋላሳ ሴታን ኣዋ ኣርሼ ዉልሳና፤ ጋላሳ ሴታን ጋዴ ꬉሚሳና።
10 ኢንቴ ላይꬃን ላይꬃን ቦንቺዛ ባኣሌዛ ዬሆን ላማና፤ ኢንቴ ዬጺዛ ዬꬃካ ዋሶን ላማና፤ ዲዛ ፔጺ ኢሲ ናይ ሃይቂን ጫሞ ዬሆ ዬኪዛ ኣሳ ማላ ኢንቴ ኢንቴ ሁኤ ቢናና ቡጪዲ ማቃ ማይኣና ማላ ታኒ ኢንቴና ኦꬃና፤ ሄ ዉርሴꬃ ጋላሳይ ጫሞ ጋላስ ጊዳና።
11 ሄኮ ታኒ ቢታ ቦላ ኮሻ ኤሃና ዎዴይ ያና፤
ሄሲካ ኣሳይ ጾሳ ቃላ
ሲያና ጋፋኔ
ሳሞ ኣቲን ካꬃ ጋፋኔ
ሃꬃ ሳሞ ጊዴና።
12 ዴሬይ ዉሪ ፑዴሃፔ
ዱጌሃ ጋካናስ
ኣርሼይ ሞኪዛሶፔ
ዉሊዛሶ ጋካናስ
ጎዳ ቃላ ኮሽ
ያኔ ሃ ዬሞታናሺን
ዴሜና።
13 ሄ ዎዴ ሎኦ ጌላኦቲኔ
ሚኖ ፓንꬃቲ
ሳሞፔ ዴንዳናይሳን
ዳቡራና።
14 ሳማሪያ ዴሬን፥ ‹ኣሻሞ›
ጌቴታ ጼይጌቲዛ
ኤቃ ጾሳይን ጫቂዛይቲ፥
‹ዳኔ ጾሳይ ቤዪን›
ዎይኮ፥ ‹ቤርሳቤሄ
ጾሳይ ቤዪን›
ጊ ጫቂዛይቲ ዉሪካ ኩንዳና፤
ባ ኩንዲዳሶሆፔ ሙሌካ
ዴንዳናስ ዳንዳዬቴና» ጌስ።