12
ቦሻ ሃይቆይ ዎꬎንታ ዬጊ ኣꬌꬅ
1 ጊብጼ ቢታን ጎዳይ ሙሴኔ ኣሮኔ ሂዝጊዴስ፤
2 «ሃ ኣጊናይ ኢንቴስ ላይꬃስ ኮይሮ ኣጊና ጊዶ፤
3 ኢስራኤሌ ኣሳ ኡባስ ሃይሳ ሃ ዎጋዛ ዮቲቴ፤ ሃይሲ ኣጊናይ ጌሊዳ ታማንꬃ ጋላስ፥ ኢሲ ኢሲ ኣሲ ባ ሶ ኣሳስ ኢሲ ላቃ ዶሪ ኤኮ።
4 ሄ ኬꬃ ኣሳ ቆዳይ ላቃዛ ኡባ ማናስ ጉጺዛ ጊዲኮ ኢዛዴይ ባስ ማታቲዛ ጉታ ባ ሶ ኣሳ ማላ ቆዲዲ ኢሳዴይ ኢሳዴይ ሚ ዉርሳናይሳ ሻኪ ኤሬቶ።
5 ኢንቴ ዶሪ ኤካና ላቃይ ዬሌቲን ኢሲ ላይꬅ ጊዲዲ ኢዛ ቦላ ኣይኮ ቦሬይ ባይንዳ ኣዴ ላቃ ጊዶ። ኢንቴ ላቃዛ ዶርሳፌ ዎይኮ ዴይሻፌ ኤካናስ ዳንዳዬታ።
6 ሃ ኣጊናይ ታማኔ ኦይዳንꬆ ጋላስ ጊዳና ጋካናስ ኢስታ ናጊቴ፤ ሄ ጋላስ ኣርሼይ ዉሊሺን ኢስራኤሌ ማባራ ኣሳይ ዉሪ ኢስታ ሹካናስ ኮሼስ።
7 ሹኪዲ ሱꬃፌ ኤኪዲ ኢስታ ኣሾዛ ሚዛ ኬꬃስ ቆሲላꬃኔ ቆሬዛ ቦላ ቲዬቶ።
8 ኣሾዛ ሄ ጋላስ ቃማካ ታማን ጺጺዲ፥ ጫሚዛ ቦንጮራኔ ኢርሾይ ባይንዳ ኡኬቲዳ ኡኬꬃራ ሜቶ።
9 ኣሾዛ ቃዬ ዎይኮ ዶይሲዲ ሞፒቴ፤ ሁኤዛ፤ ጌዳታ፤ ቃንꬃ ኣሾዛካ ኡባ ጺጺዲ ሚቴ።
10 ሄ ኣሾዛፔ ጋዴይ ዎንታና ጋካናስ ኣይኮካ ኣሾፍቴ። ዎንታና ጋካናስ ኣቲዳዚ ዲኮ ታማን ጹጋና ኮሼስ።
11 ሚሽ፥ ኦጌስ ጊዲዛ ማይኦ ማይኢዲ፥ ኢንቴ ጫማ ቶሆን ኣꬂዲ ኢንቴ ጉፌ ኢንቴ ኩሼን ኦይኪዲ ኤሶን ሚቴ፤ ሃይሲ ታና ጎዳ ኢንቴ ቦንቺዛ ፓዚጋ ያርሾ።
12 «ታኒ ሄ ጋላስ ቃማራ ጊብጼ ቢታራ ሄሜታሼ ባይራ ዬሌቲዳ፥ ኣሴካ ሜሄካ ኡባ ዎꬋና። ጊብጼ ኤቃታ ኡባ ቦላካ ታኒ ፒርዳና፤ ታኒ ጎዳ ጊዲኪና?
13 ሄ ሱꬃይ ኢንቴ ዲዛ ኬꬃታ ኤሪሲዛ ማላታ ጊዳና። ታኒ ሄ ሱꬃ ቤኢዛ ዎዴ ኢንቴና ኣጋ ኣꬋና፤ ታኒ ጊብጼ ቢታ ቦሻን ሾጪዛ ዎዴ ኢንቴ ቦላ ኣይኮ ቦሻይካ ጋኬና።
14 «ሄ ጋላሳይ ታኒ ጎዳይ ኢንቴስ ኦꬂዳይሳ ቆፒ ቆፒ ቦንቺዛ ጋላስ ጊዶ፤ ኢንቴ ዜሬꬂ ዉሪ ጎዳ ባኣሌ ቦንቾ፤ ሃይሳ ኢንቴስ ዎጋ ሂስቲዲ ሜርናስ ቦንቺቴ።
ኡኬꬃ ባኣሌ
15 «ላፑን ጋላስ ጋካናስ ኢርሾይ ጌሎንታ ኡኬꬅ ሚቴ፤ ኮይሮ ጋላስ ኢንቴ ሶፔ ኢርሾ ዲጊቴ። ሄ ኮይሮ ጋላሳፌ ዶሚዲ ላፑንꬃ ጋላስ ጋካናስ፥ ኢርሾራ ዲዛ ኡኬꬅ ሚዛ ኣሲ ኦኒካ ኢስራኤሌ ኣሳ ጊዶፌ ሻኬቲ ꬋዮ።
16 ኮይሮ ጋላስ ጌሻ ዱላታ ሺቂቴ፤ ሃራ ጌሻ ዱላታ ቃሴ ላፑንꬃ ጋላስ ሺቂቴ፤ ኣሳይ ዉሪ ማናስ ቁማ ካꬆፌ ኣቲን ሄ ጋላሳታ ኡባን ኣይኮካ ኦꬆፍቴ፤ ኢንቴ ኦꬃና ሚሺ ሄሳ ጻላ።
17 «ታኒ ኢንቴና ኢስራኤሌ ናይታ ጊብጼ ቢታፌ ኬሲዳይ ሄ ጋላስ ጊዲዳ ጊሻስ ኡኬꬃ ባኣሌ ቦንቺቴ። ሄ ጋላሳ ባኣሌዛ ና ናስ ኣቶንታ ዎጋ ሂስቲ ቦንቺቴ።
18 ኮይሮ ኣጊናን ሄ ኣጊናስ ታማኔ ኦይዳንꬃ ጋላሳ ኦማርሳፌ ዶሚዲ ናምኡ ታማኔ ኢሲንꬃ ጋላሳ ኦማርሳ ጋካናስ ኢርሾይ ጌሎንታ ኡኬꬅ ሚቴ።
19 ላፑን ጋላስ ጋካናስ ኢርሾይ ኢንቴ ሶን ቤቶፎ፤ ኢርሾይ ጌሊዳ ካꬅ ሚዛ ኣሲ ቤቴ ኣሲ ጊዲን ዎይኮ ሄ ዴሬ ኣስ ኦናካ ጊዲን ሄሳዴይ ኢስራኤሌ ማባራ ጊዶፌ ꬋዮ።
20 ኢርሾይ ጌሊዳዝ ኣይኮካ ሞፒቴ፤ ኢንቴ ዲዛሶን ኣዋንካ ኢርሾይ ጌሎንታ ኡኬꬅ ማናስ ቤሴስ።»
21 ሄሳፌ ጉዬ ሙሴይ ኢስራኤሌ ጪማታ ኡባ ጼይጊሲዲ፥ «ኢንቴ ቢዲ ኢንቴ ሶ ኣሳስ ፓዚጋ ያርሾስ ላቃ ኤኪ ሹኪቴ።
22 ሂሶጴ ጌቴቲዛ ማታ ሃይꬃፌ ዳንኪ ኤኪዲ ኬሬን ዲዛ ሱꬃን ጌልꬂ ኬሲዲ፥ ሄ ሱꬃ ናምኡ ቆሲላꬃታኒኔ ቆሬታ ቦላ ቲዪቴ፤ ኢንቴፌ ኢሲ ኣሲካ ጋዴይ ዎንታና ጋካናስ ባ ኬꬃፌ ካሬ ኬዞፖ።
23 ጎዳይ ጊብጼ ባይራ ናይታ ዎꬋናስ ሄ ቢታራ ሄሜቲዛ ዎዴ ሱꬅ ኬꬃ ቆሲላꬃታኒኔ ቆሬታ ቦላ ቤኢዲ ካሬራ ኣꬊ ባና፤ ዎꬊዛይሲ ኢንቴ ሶ ጌሊዲ ኢንቴና ዎꬎንታ ማላ ኢዛ ጎዳይ ዲጋና።
24 «ኢንቴ ሃይሳ ኣዛዞዛ ኢንቴሲኔ ኢንቴ ዜሬꬃስ ሜርናስ ዎጋ ሂስቲዲ ኣዛዜቲቴ።
25 ጎዳይ ካሴ ኢማና ጊዲ ጫቂዳ ቃላ ማላ ኢዚ ኢሚዛ ቢታ ኢንቴ ጌሊዛ ዎዴ ሃ ዎጋ ናጊቴ።
26 ኢንቴ ናይቲ ኢንቴና፥ ‹ሃይሳ ሃ ዎጋዛስ ቢርሼꬂ ኣዜ?› ጊ ኦይቺኮ፥
27 ኢንቴ ኢስታስ፥ ‹ሃይሲ ጎዳ ቦንቻናስ ያርሺዛ ፓዚጋ ያርሾ፤ ኣይስ ጊኮ ጎዳይ ጊብጼ ቢታን ኢስራኤሌ ኣሳ ኬꬅ ኣጊ ኣꬊዲ ጊብጼ ኣሳ ዎꬊዲ ኑና ኣሺዳ ጊሻሳ› ጊቴ» ጊዴስ።
ሄሳፌ ጉዬ ኣሳይ ቢታ ቦላ ጉፋኒ ጎይኒዴስ።
28 ኢስራኤሌ ኣሳይ ቢዲ ጎዳይ ሙሴኔ ኣሮኔ ኣዛዚዳ ማላ ኦꬂዴስ።
ጊብጼ ኣሳ ባይራቲ ሃይቂ ዉሮ
29 ጊዲ ጊዶꬃን ጎዳይ ጊብጼን ባይራ ዬሌቲዳ ኡባ ካዎቴꬃ ኣልጋን ኡቲዛ ካዎ ባይራ ናፔ ዶሚዲ፥ ቃሾ ኬꬃን ዲዛ ዲኤቲዳ ኣሳ ባይራ ና ጋካናስ፥ ቃሴ ባይራ ዬሌቲዳ ሜሄ ኡባ ዲፒ ሂስቲዴስ።
30 ካዎይ፥ ኢዚ ሱንꬂዳ ዳናቲኔ ጊብጼ ቢታ ኣሳይ ዉሪ ቃማራ ቤጊዴስ። ጊብጼ ቢታን ኣሲ ሃይቆንታ ኬꬂ ሙሌካ ባይንዳ ጊሻስ ኣሳይ ቃላ ꬎቁ ሂስቲዲ ዳሮ ዋሲ ዬኪዴስ።
31 ሄ ጋላሳ ኦማርስ ካዎዚ ሙሴኔ ኣሮኔ ጼይጊሲዲ፥ «ዴንዲቴ! ኢንቴካ ኢንቴ ኣሳይካ ታ ኣሳ ጊዶፌ ኬዚቴ! ቢዲ ኢንቴ ኦይቺዳ ማላካ ጎዳስ ጎይኒቴ!
32 ኢንቴ ጊዳ ማላካ ኢንቴ ሜሄ፤ ኢንቴ ዴይሺኔ ዶርስ ኡባ ኤኪዲ ቢቴ! ቃሴ ታናካ ኣንጂቴ» ጊዴስ።
33 ኢስራኤሌ ኣሳይ ባ ቢታፌ ኤሶን ኬዛና ማላ ጊብጼ ኣሳይ ዲርባሲዴስ። ኣይስ ጊኮ ኢስቲ፥ «ኬዞንታ ኢጺኮ ኑኒ ዉሪካ ዉራና» ጊዳ።
34 ሄሳ ጊሻስ ኢስራኤሌ ኣሳይ ኢርሾይ ጌሎንታ ሙኑቃ ኬሬን ኩንꬂ ማይኦን ጻጺዲ ሃሼን ቶኪዴስ።
35 ኢስራኤሌ ኣሳይ ሙሴይ ኢስታ ኣዛዚዳ ማላ፥ ጊብጼ ኣሳ ቢራ፥ ዎርቃኔ ማይኦ፥ «ኢሚቴ» ጊ ኦይቺዴስ።
36 ጎዳይ ጊብጼ ኣሳ ሲንꬃን ኢስራኤሌ ኣሳይ ሳቤታና ማላ ኦꬂዳ ጊሻስ ጊብጼ ኣሳይ ኢስታ ኦይቺዳይሳ ኡባ ኢሚዳ። ሄሳꬆ ሂስቲዲ ኢስታ ጊብጼ ኣሳታ ኣቆ ቡሪ ኤኪ ቢዳ።
ጊብጼፔ ኢስራኤሌ ኣሳ ኬስ
37 ኢስራኤሌ ኣሳይ ኤራሚሴ ጌቴቲዛ ካታማፔ ዴንዲዲ ሱኮቴ ጌቴቲዛሶ ጋካናስ ቢዴስ። ኣሳይ ናይታኔ ማጫሳ ጉጆንታ ቆዲን ቶሆን ሄሜቲዛ ኣቱማ ኣሳይ 600,000 ጊዲዴስ።
38 ቃሴ ኢስታራ ዳሮ ሃራ ዴሬ ኣሳይ፥ ኬሂ ዳሮ ሜሄ፥ ዶርሲኔ ዴይሽ ኤኪ ኬዚዴስ።
39 ጊብጼፔ ኢስቲ ኤኪ ኬዚዳ ኢርሾይ ጌሎንታ ሙኑቃፔ ኡኬꬅ ኡኪዳ፤ ኣይስ ጊኮ ኢስታ ጊብጼፔ ኤሶን ኬሲዳ ጊሻስ ባስ ሺንቄ ካꬃናሲኔ ሙኑቃይ ዴንዲን ኡካና ዎዴ ኢስታ ጋꬂቤና።
40 ኢስራኤሌ ኣሳይ ጊብጼ ቢታን ዴዪዳ ላይꬃይ ዉሪ ኦይዱ ጼታኔ ሄꬑ ታማ።
41 ሄ ኦይዱ ጼታኔ ሄꬑ ታሙ ላይꬃይ ዉሪዛ ሄ ዉርሴꬃ ጋላሳን ጎዳ ኣሳይ ዉሪ ጊብጼ ቢታፌ ኬዚዴስ።
42 ጊብጼ ቢታፌ ኦማርሳ ዎዴ ጎዳይ ባ ኣሳ ኬሲሼ ናጊዳ ጊሻስ ሄ ቃማይ ና ና ጋካናስ፥ ኢስራኤሌ ኣሳይ ዉሪ ቤጊ ናጊዲ ኣቂዛ ጎዳስ ዱማቲዳ ቃማ።
ፓዚጋ ቦንቺዛ ዎጋ
43 ጎዳይ ሙሴኔ ኣሮኔ፥ «ፓዚጋ ቦንቺዛ ዎጋይ ሃይሳ፤ ሃራ ዴሬ ኣሲ ኢዛፔ ኦኒካ ሙሌራ ሞፖ።
44 ኢንቴ ሚሻን ሻሚዳ ኣይሌይ ኦኒካ ኢንቴ ኢዛ ቃጻሪዳፔ ጉዬ ኢዛፔ ማናስ ኮሼስ።
45 ጊዶ ኣቲን ጉꬃ ዎዴስ ኢንቴናራ ኢማꬃቴꬃን ጋምኢዛይኔ ኡኔ ኦꬂዛ ሃራ ዴሬ ኣሲ ኢዛፔ ሞፖ።
46 «ሃ ፓዚጋ ያርሾዛ ኢንቴ ኢሲ ኬꬃን ሚቴ፤ ኢንቴ ሄ ኣሾዛፔ ኣይኮካ ካሬ ኬሶፍቴ። ሜቄꬃታፔ ኢሲኖካ ሜንꬆፍቴ።
47 ኢስራኤሌ ማባራይ ዉሪ ፓዚጋ ያርሾ ቦንቻናስ ኮሼስ።
48 «ቤቴ ዪዲ ኢንቴ ጊዶን ዲዛ ኣሲ ጎዳ ፓዚጋ ያርሾ ቦንቻናስ ኮይኮ ባ ሶን ኣዴ ጊዲዳ ኣሳ ኡባ ቃጻሮ። ሄሳፌ ጉዬ ኢዚ ሄ ቢታን ዬሌቲዳ ኣሳ ማላ ሺቂዲ ፓዚጋ ያርሾ ቦንቻናስ ቤሴስ። ጊዶ ኣቲን ቃጻሬቶንታ ኣሲ ሙሌካ ኢዛፔ ሞፖ።
49 ኢንቴ ቢታን ዬሌቲዳይሳስካ ጊዲን ኢንቴ ጊዶን ቤቴ ጊዲዲ ዲዛይሳስካ ጊዲን ሃይሲ ዎጋይ ኡባስ ኢሲኖ» ጊዴስ።
50 ሂስቲን ኢስራኤሌ ኣሳይ ዉሪ ጎዳይ ሙሴኔ ኣሮኔ ኣዛዚዳ ማላካ ኦꬂዴስ።
51 ሄ ጋላሳንካ ጎዳይ ኢስራኤሌ ናይታ ኢስታ ጩጋን ጩጋን ጊብጼ ቢታፌ ኬሲዴስ።