20
ታሙ ኣዛዞታ
(ዛሬ 5፡1-21)
1 ጎዳይ ሃሳይዳ ቃላቲ ኡባይ ሃይሳፌ ካሊዛይታ፤
2 «ኔና ጊብጼፔ ኣይሌቴꬃ ቢታፌ ኬሲዳ ጎዳ ኔ ጾሳይ ታና።
3 «ታፔ ኣቲን ሃራ ኤቃ ጾሳታስ ጎይኖፋ።
4 «ቦላ ሳሎን ዲዛ ሚሽ ጊዲን፥ ዎይኮ ጋርሳ ሳኣን ዲዛ ሚሽ ጊዲን፥ ዎይኮ ቢታፌ ጋርሳን ሃꬃ ጊዶን ዲዛ ሚሽ ጊዲን ኣይኮካ ሚሳቲሳዳ ኔስ ሚስሌ ሂስታዳ ሜꬎፋ።
5 ኢስታስ ሆኮፋኔ ኢስታስ ጎይኖፋ። ኣይስ ጊኮ ታኒ ጎዳ ኔ ጾሳይ ቃናቲዛ ጾሳኮ፤ ታና ኢጺዛይታ ኣዋታ ናጋራ ጊሻስ ናይታ ሄꬓንꬆ ዬሌታኔ ኦይዳንꬆ ዬሌታ ጋካናስ ቃጻያይስ።
6 ቃሴ ታኒ ታና ሲቂዛይታሲኔ ታ ኣዛዞ ናጊዛይታስ ዳሮ ሺ ዬሌቴꬅ ጋካናስ ታኒ ታ ሲቆ ቤሲዛ ጾሳ።
7 «ጎዳ ኔ ጾሳ ሱንꬅ ሃዳን ዴንꬆፋ፤ ኣይስ ጊኮ ጎዳ ኔ ጾሳይ ባ ሱንꬅ ሃዳን ዴንꬂዛይታ ቃጻያና።
8 «ሳምባታ ጋላሳ ሃራ ጋላሳታፔ ዱማሳዳ ናጋ።
9 ኔ ኦꬂዛ ኦሶ ኡባ ኡሱፑን ጋላሳታን ኦꬃ።
10 ጊዶ ኣቲን ላፑንꬃ ጋላሳይ ጎዳ ኔ ጾሳስ ሳምባታ። ሄ ጋላስ ኣይኮ ኦሶካ ኦꬆፋ፤ ኔኒ ዎይኮ ኔ ኣቱማ ናይ፥ ዎይኮ ኔ ማጫ ናይ፥ ዎይኮ ኔ ኣቱማ ኣይሌይ፥ ዎይኮ ኔ ማጫ ኣይሌይ፥ ዎይኮ ኔ ሚዛይ፥ ዎይኮ ኔ ዴሬን ዲዲ ኔስ ኦꬂዛ ሃራ ዴሬ ኣስ ጊዲን ሄ ጋላሳን ኣይ ኦሶካ ኦꬆፍቴ።
11 ኣይስ ጊኮ ኡሱፑን ጋላሳን ጎዳይ ሳሎ፥ ሳኣ፥ ኣባኔ ኢስታ ጊዶን ዲዛ ኡባ ሜꬊዲ ላፑንꬃ ጋላስ ሼምፒዴስ። ሄሳ ጊሻስ ጎዳይ ሳምባታ ጋላሳ ኣንጂዴሲኔ ዱማሲዴስ።
12 «ጎዳ ኔ ጾሳይ ኔስ ኢሚዛ ቢታን ኔ ዳሮ ላይꬅ ዳና ማላ፥ ኔ ኣዋኔ ኔ ኣዮ ቦንቻ።
13 «ኣስ ዎꬎፓ።
14 «ላይማቶፓ።
15 «ካይሶቶፓ።
16 «ኦና ቦላካ ዎርዶ ማርካቶፋ።
17 «ኣሳ ኬꬅ ኣሞቶፋ፤ ኣሳ ማቾ ዎይኮ ኢዛ ኣይሌ ዎይኮ ኢዛ ኣይሌዮ ዎይኮ ኢዛ ቦራ ዎይኮ ኢዛ ሃሬ ዎይኮ ኢዛስ ዲዛ ኣይ ሚሺካ ኣሞቶፋ» ጊዴስ።
18 ኣሳይ ዉሪ ዳዳይ ጊሪዛይሳኔ ዛዬይ ዛዬቲዛይሳ ሲዪዲ ቃሴ ዎልቃንꬂ ዎልቃሚዛይሳኔ ዙማይ ጩዋቲዛይሳ ቤኢዲ ኮኮሪሼ ሃሆን ኤቂዴስ።
19 ኣሳይ ሙሴስ፥ «ኑኒ ሃይቆንታ ማላ ጾሲ ኑናራ ሃሳዮፖ፤ ኔኒ ኑስ ዮታ፤ ኑኒ ሲያና» ጊዳ።
20 ሙሴይ ኣሳስ፥ «ጾሲ ኢንቴና ፓጫናስ፥ ኢዛ ያሺ ኢንቴ ዎዚናን ኩሚን ኢንቴ ናጋራ ኦꬆንታ ማላ ዪዳ ጊሻስ ባቦፍቴ» ጊዴስ።
21 ኣሳይ ሃሆን ኤቂ ዲሺን ሙሴይ ጾሲ ዲዛሶ ዎልቃማ ሻራ ꬉማኮ ሺቂዴስ።
ያርሾ ያርሺዛ ሶሆ ጊሻስ ኢሜቲዳ ዎጋታ
22 ሄሳፌ ጉዬ ጎዳይ ሙሴ፥ «ኢስራኤሌ ኣሳስ፥ ‹ታኒ ሳሎፔ ኢንቴስ ሃሳይሺን ኢንቴ ኢንቴ ኣይፌራ ቤኢዴታ።
23 ታፔ ኣቲን ሃራ ጾሲ ኢንቴስ ዶፖ፤ ቢራፔ ዎይኮ ዎርቃፌ ኢንቴስ ኤቃ ጾሳታ ሜꬊዲ ጎይኖፍቴ።
24 « ‹ኔኒ ታስ ያርሾ ያርሺዛሶ ኡርቃፌ ሜꬋዳ ጹጌቲዛ ያርሾታ፥ ኢሲፌቴꬃ ያርሾታ፥ ኔ ዶርሳታፔ፥ ኔ ዴይሻታፔኔ ኔ ሜሄታፔ ኢዛ ቦላ ያርሻ። ታ ሱንꬂ ቆፌታና ማላ፥ ኢንቴ ኦꬂዳሶ ኡባ ሶሆ ያዳ ታ ኢንቴና ኣንጃና።
25 ኔኒ ታስ ያርሾ ያርሺዛሶ ሹቻፌ ኦꬂዛ ጊዲኮ ማሴቲዳ ሹቻፌ ኦꬆፋ፤ ኣይስ ጊኮ ኔኒ ማሲዛ ቢራታን ኢዛ ቦቺኮ ኔ ኢዛ ቱኒሳሳ።
26 ታስ ያርሾ ያርሺዛሶ ፑዴ ኬዛናስ ያንጋሬ ሜꬋዳ ኢዛ ቦላ ኬዞፓ፤ ጋሶይካ ኔኒ ኬዚዛ ዎዴ ኔ ካሎቴꬂ ቤታና› ጋዳ ዮታ» ጊዴስ።