23
ቱማ ፒርዳ
1 «ዎርዶ ዮኦ ላሎፋ፤ ዎርዶ ማርካታዳ ኢታ ኣስ ማዶፋ።
2 «ኢታ ሚሽ ኦꬃናስ ዳሮ ኣሳ ካሎፋ፤ ፒርዳ ሚርቃናስ ዳሮ ኣሳራ ጊዳዳ ማርካቶፋ።
3 ማንቆ ኣሲ ፒርዳሶ ሺቂኮ ኢዛ ማንቆቴꬅ ቤኣዳ ማዳ ፒርዶፋ።
4 «ኔ ሞርኬ ቦራይ ዎይኮ ሃሬይ ꬋይዳይሳ ዴሚኮ ኢዛዴስ ዛራ ኢማ።
5 ኔና ኢጺዛ ኣሳስ ሃሬይ ጫናራ ኩንዲ ዲሺን ቤኢኮ ኢዛራ ማዴታዳ ዴንꬃ ኣቲን ሄን ኣጋጎፓ።
6 «ፒርዳስ ዱቡሻን ሺቃዳ፥ ማንቆ ኣሳ ፒርዳ ዎቢሶፓ።
7 ዎርዶ ሞቶ ሲዮፓ፤ ጌሽ ዎይኮ ጺሎ ኣስ ሃይቆስ ኣꬃ ኢሞፋ፤ ኣይስ ጊኮ ሞሮ ኦꬂዳዴ ታኒ ሜላ ዬዲኬ።
8 «ማታኤ ኤኮፋ፤ ኣዛስ ጊኮ ማታኤይ ጼሊዛይታ ኣይፌ ቆቂሴሲኔ ጺሎታ ቃላ ሚርቄስ።
9 «ሃራ ዴሬፔ ዪዳ ቤቴ ኣስ ቆሆፒቴ፤ ቤቴ ኣስ ጊዴꬂ ኣይ ማላ ዴጺዛኮ ኢንቴ ኤሬታ፤ ኣይስ ጊኮ ኢንቴ ኢንቴ ሁኤን ቤቴ ጊዲዲ ጊብጼ ቢታን ዴኢዴታ።
ላፑንꬃ ላይꬂኔ ላፑንꬃ ጋላስ
10 «ኡሱፑን ላይꬅ ጋካናስ ኔ ጎያዳ ዜሪዳ ካꬃ ማጻ ሺሻ።
11 ላፑንꬃ ላይꬃን ጋዴዛ ጎዮንታ ሻቻ፤ ሂስቲኮ ኔ ዴሬ ጋርሳን ዲዛ ማንቆቲ ሄሳፌ ማና ካꬅ ዴማና፤ ቃሴ ኢስታፌ ኣቲዛይሳ ዶኣቲ ማና። ኔኒ ኔ ዎይኔ ቶኪዛ ጋዴ ቦላኔ ዛይቴ ኢሚዛ ዎጋራ ሚꬃ ጋዴ ቦላካ ሄሳꬆ ኦꬃ።
12 «ኡሱፑን ጋላስ ኔ ኦሶ ኦꬃ፤ ኔ ቦራይኔ ኔ ሃሬይ ሼምፓና ማላኔ ኔሶን ዬሌቲዳ ኣይሌይኔ ቤቴ ኣሲ፥ ሼምፓና ማላ፥ ላፑንꬃ ጋላስ ኦሶ ኦꬆፋ።
13 «ታኒ ኢንቴና ጊዳይሳ ኡባ ሚንꬂዲ ኦꬂቴ፤ ሃራ ጾሳታ ሱንꬅ ጼይጎፒቴኔ ኢስታ ዎሶፍቴ።
ጊታ ባኣሌታ
14 «ላይꬃን ሄꬑቶ ኢንቴ ታስ ባኣሌ ቦንቺቴ።
15 ኣቢቤ ጌቴቲዛ ኣጊናን ባሬቲዳ ጋላሳን ኡኬꬃ ባኣሌ ቦንቺቴ፤ ኣይስ ጊኮ ኢንቴ ጊብጼፔ ኬዚዳይ ሄ ኣጊናና። ታኒ ኢንቴና ኣዛዚዳ ማላ ላፑን ጋላስ ኢርሾይ ጌሎንታ ኡኬꬅ ሚቴ።
«ኢንቴፌ ኢሳዴይካ ታ ሲንꬃን ሜላ ኩሼ ቤቶፎ።
16 «ቃሴ ኢንቴ ኢንቴ ጋዴን ዜሪን፥ ኮይሮ ጋኪዳ ካꬅ ማጺዛ ዎዴ፥ ካꬃ ጼራ ሺሺዛ ባኣሌ ቦንቺቴ።
«ቃሴካ ላይꬃ ዉርሴꬃን፥ ካꬅ ኡባ ሺሺ ዉርሲዛ ዎዴ፥ ካꬃ ሺሾ ባኣሌ ቦንቺቴ።
17 ኣዴቲ ዉሪ ኡባ ሃሪዛ ጎዳ ታ ሲንꬅ ላይꬃን ሄꬑቶ ዬቶ።
18 «ኔኒ ያርሾ ሱꬅ ታስ ሺሻሼ ኢርሾራ ኡኬቲዳ ኡኬꬃራ ሺሾፋ። ሄ ባኣሌዛ ቦንቺዛ ጋላስ ያርሼቲዳ ሞꬌፔ ማላዶስ ኣይኮይካ ኣቶፎ።
19 ኔ ጋዴን ባይራ ካጺዳ ካꬃ ኡባፌ ሎኢዛይሳ ጎዳ ኔ ጾሳ ሶ ኤካ ያ። ዴይሻ ላቃ ኢዛ ኣዬይ ማꬃን ዶይሶፋ።
ሂዶታ ቃላታኔ ካሊዛ ዎጋታ
20 «ኔ ኦጌን ኔና ናጋና ማላኔ ታኒ ኔስ ጊግሲዳሶ ኔና ኤፋና ማላ፥ ታኒ ኪታንቻ ኔ ሲንꬃራ ዬዳና።
21 ኢዚ ዮቲዛይሳ ኤሮ ጋዳ ኢዛስ ኣዛዜታ፤ ኢዛ ቦላ ማካሎፋ፤ ታ ኢዛ ኪቲዳ ጊሻስ ኢንቴ ናጋራ ኦꬂኮ ኢንቴስ ኢዚ ኣቶ ጌና።
22 ኢዚ ዮቲዛይሳ ኢንቴ ሎኤꬂ ሲዪኮ፥ ታኒ ዮቲዛይሳ ኡባ ኦꬂኮ ኢንቴ ሞርኬታ ኡባ ታኒ ሞርካና፤ ኢንቴናራ ኤቄቲዛይታራ ታኒካ ኤቄታና።
23 ታ ኪታንቻይ ኢንቴፌ ሲንꬄ ቢዲ፥ ኢንቴና ኣሞሬታ ቢታ፥ ሂቴታ ቢታ፥ ፓሪዜታ ቢታ፥ ካናኔታ ቢታ፥ ሂዌታ ቢታኔ ያቡሴታ ቢታ ኤፋና። ታኒ ኢስታ ሙሌራ ꬋይሳና።
24 ኢስታ ኤቃታ ሲንꬃን ሆኮፍቴ፥ ዎይኮ ጎይኖፍቴ፥ ዎይኮ ኢስታ ሃኖ ቁሎፍቴ። ኢንቴ ኢስታ ꬋይሳናሲኔ ቱሳ ማላ ኤቂ ዲዛ ኢስታ ሹቻ ኤቃታ ሜንꬄሬꬃናስ ቤሴስ።
25 ጎዳ ኢንቴ ጾሳስ ጎይኒቴ፤ ሂስቲኮ፥ ኢዚ ኢንቴና ካꬃኒኔ ሃꬃን ኣንጃና፤ ታ ኢንቴ ጊዶፌ ሃርጌ ዲጋና።
26 ኢንቴ ቢታን ኣይ ማጫሲካ ቦሼቴናኔ ማይኔና። ታኒ ኢንቴ ዳና ላይꬅ ኣዱሳና።
27 «ኢንቴናራ ጋጊዛ ዴሬታ ኡባ ዳጋንꬃና ማላ ታኒ ታ ያሻቴꬅ ኢንቴ ሲንꬃራ ዬዳና፤ ኢንቴ ሞርኬቲ ዉሪ ኢንቴስ ዞኮ ዛሪዲ፥ ባቃታና ማላ ታ ኦꬃና።
28 ታኒ ኢንቴፌ ሲንꬃራ ካዤ ዬዳዳ ሂዌታ፥ ካናኔታኔ ሂቴታ ጎዳ ኬሳና።
29 ጊዶ ኣቲን ቢታይ ካሎ ኣቶንታ ማላኔ ዶኣይ ዳሮንታ ማላ፥ ታ ኢስታ ኢሲ ላይꬃ ጋርሳን ጎዲኬ።
30 ጊዶ ኣቲን ኢንቴ ቆዳን ዳሪዲ፥ ሄ ቢታ ላታና ጋካናስ፥ ታኒ ኢስታ ጉꬅ ጉꬅ ጎዳ ኬሳና።
31 ታኒ ኢንቴ ዛዋ ዞኦ ኣባፌ ሜዲቴራኔ ኣባ ጋካናስ፥ ባዞፌ ኤፊራጺሴ ሻፋ ጋꬃና። ሄ ቢታን ዲዛዝ ኡባ ታኒ ኢንቴ ኩሼን ኣꬃ ኢማና፤ ኢንቴካ ኢስታ ኢንቴ ሲንꬃፌ ጎዲ ኬሳና።
32 ኢስታራ ዎይኮ ኢስታ ኤቃ ጾሳታራ ጫቆን ጌሎፒቴ።
33 ኢስታ ኢንቴ ቢታን ዎꬆፍቴ፤ ኢንቴ ሂስቶንታ ኣጊኮ ኢስቲ ኢንቴና ታ ቦላ ናጋራ ኦሲሳና፤ ኣይስ ጊኮ ኢስታ ኤቃታስ ጎይኒዛይሲ ቱማፔ ኢንቴስ ናርጻ ጊዳና» ጊዴስ።