29
ቄሴቴꬃ ኦሶ ጊሻስ ኣሮኔሲኔ ኢዛ ናይታስ ኢሜቲዳ ዎጋታ
1 «ኣሮኔይኔ ኢዛ ናይቲ ቄሴ ጊዲዲ ታስ ኦꬃና ማላ ኔኒ ኢስታ ዱማሳናስ ኦꬃ፤ ዎሶይ ባይንዳ ኢሲ ሚርጎኔ ናምኡ ꬋርሾታ ኤካ።
2 ሎኦ ጊስቴ ꬊሌ ኤካዳ ኢርሾ ዬጎንታ ኡኬꬅ ኡካ፤ ቃሴካ ኢርሾ ዬጎንታ ዛይቴን ጉꬃ ኡኬꬅ ኡካ፤ ሄሳꬆካ ኢርሾ ዬጎንታ ቄሪ ኡኬꬅ ኡካዳ ዛይቴ ቲያ።
3 ኔኒ ሄይታ ሌማቴን ዎꬃዳ፥ ሚርጎዛ ናምኡ ꬋርሾታራ ኢሲፌ ታስ ሺሻ።
4 «ሂስታዳ ኣሮኔኔ ኢዛ ናይታ ጾሳ ዱንካኔዛ ፔንጌ ኤሃዳ ሃꬃን ሜጫ።
5 ሄሳፌ ጉዬ ማይኦታ ኤካዳ፥ ሻሚዜ፥ ኤፉዴፔ ቦላራ ማይኢዛ ኣዱሳ ማይኦ፥ ኤፉዴኔ ቲራ ኪሴ ኣሮኔ ማይዛዳ ኤፉዴዛ ሂላን ዳዴቲዳ ዳንጮን ዳንጪሳ።
6 ጎሳዛ ኢዛ ሁኤን ጎዚሳዳ፥ ‹ጎዳስ ጌሽ ጊዲ ዱማቲዴስ› ጌቴቲ ጻፌቲዳ ኣሌቆዛ ጎሳ ቦላ ዎꬃ።
7 ቲዪዛ ዛይቴካ ኤካዳ ኢዛ ሁኤን ቲጋዳ ቲያ።
8 ኢዛ ናይታካ ኤሃዳ ሻሚዜታ ማይዛ።
9 ጎሳካ ኢስታ ሁኤን ጎዚሳ። ሄሳፌ ጉዬ ኣሮኔኔ ኢዛ ናይታ ዳንጮ ዳንጪሳ። ቄሴቴꬃይ ኢስታስ ሜርና ኦሶ ዎጋ ጊዶ፤ ሄሳꬆ ሂስታዳ ኣሮኔኔ ኢዛ ናይታ ቄሴ ሂስታ።
10 «ኔ ታስ ሚርጎ ጾሳ ዱንካኔ ሲንꬅ ኤሂኮ ኣሮኔይኔ ኢዛ ናይቲ ኢዛ ሁኤ ቦላ ባ ኩሼ ዎꬂኮ፥
11 ዎፋኖዛ ሄን ጎዳ ሲንꬃን ሹካ።
12 ዎፋኖዛ ሱꬃን ኔ ቢራꬌ ጌልꬃ ኬሳዳ፥ ያርሺዛሶዛ ቦላን ዲዛ ካጬታ ቲያ፤ ቲዪሺን ኣቲዳ ሱꬃ ያርሺዛሶዛፔ ጋርሳ ባጋራ ጉሳ።
13 ሄሳፌ ጉዬ ማራጬ ካሚዳ ሞꬌ፥ ቲሬዛራ ኦይኬቲ ዲዛ ኣሾ፥ ናምኡ ኪላሆታኔ ኢስታ ካሚዳ ሃንዳ ኤካዳ፥ ያርሺዛሶሆዛ ቦላ ዎꬃዳ ጹጋ።
14 ጊዶ ኣቲን ሚርጎዛ ኣሾ፥ ጋልባኔ ማራጬዛ፥ ሜቴቶንታ ኣሾታ ኣሲ ዲዛሶሆፔ ሃራሶ ኤፋዳ ናጋራ ያርሾ ጊዳና ማላ ጹጋ፤
15 «ናምኡ ꬋርሾታፔ ኢሳ ኔ ኤኪኮ ኣሮኔይኔ ኢዛ ናይቲ ባ ኩሼ ኢዛ ሁኤ ቦላ ዎꬄቶ።
16 ሹካዳ ሱꬃ ያርሺዛሶዛ ሚሌ ቦላ ኡባ ባጋራ ዉጻ።
17 ꬋርሾዛ ኣሾ ቃንጼሬꬃዳ፥ ቃንꬃ ኣሾኔ ቶሆታ ሜጫዳ ሁኤዛራኔ ሃንኮ ኣቲዳ ኣሻራ ኢሲ ቦላ ዎꬃ።
18 ሄሳፌ ጉዬ ꬋርሾዛ ሙሌራ ያርሺዛሶሆዛ ቦላ ጹጋ፤ ሄሲ ጎዳስ ታማን ጹጌቲዛ ሳዎ ቱኑ ጊዛ ያርሾኮ።
19 «ቃሴ ሃንኮ ꬋርሾዛ ኔ ኤኪኮ ኣሮኔይኔ ኢዛ ናይቲ ባ ኩሼ ኢዛ ሁኤ ቦላ ዎꬄቶ።
20 ሄ ꬋርሾዛ ሹካዳ ኢዛ ሱꬃፌ ጉꬃራ ኤካዳ፥ ኣሮኔሲኔ ኢዛ ናይታስ ኡሻቻ ሃይꬃታ ጼራ፥ ኡሻቻ ኩሼ ማንꬃ ቢራꬌታኔ ኡሻቻ ቶሆ ማንꬃ ቢራꬌታ ቲያ፤ ሄሳፌ ጉዬ ኣቲዳ ሱꬃ ያርሺዛሶ ሚሌ ቦላ ኡባሶራ ዉጻ።
21 ያርሺዛሶን ዲዛ ሱꬃፌኔ ቲዬቲዛ ዛይቴዛፔ ጊናራ ኤካዳ፥ ኣሮኔ ቦላኔ ኢዛ ማይኦ ቦላ፥ ኢዛ ናይታ ቦላኔ ኢስታ ማይኦ ቦላ ዉጻ፤ ሂስቲኮ ኢዚ ኢዛ ናይቲኔ፥ ኢስታ ማይኦይ ጎዳ ኦሶስ ዱማታና።
22 «ሃ ꬋርሾዛፔ ጎይናዛኔ ኢዛን ዲዛ ቶልꬆዛ፥ ማራጬ ቦላን ዲዛ ሞꬌ፥ ቲሬዛራ ኦይኬቲ ዲዛ ኣሾ፥ ናምኡ ኪላሆታ፥ ኢስታ ካሚ ኦይኪዳ ሃንዳራኔ ኡሻቻ ጌዳራ ኔኒ ኤካ፤ ሃይሲ ቄሴቴꬃ ሱንꬅ ኢሚዛ ዎዴ ሹኬቲዛ ዶርሳ።
23 ጎዳ ሲንꬃን ዎꬂዳ ኢርሾይ ጌሎንታ ኡኬꬃፌ ኢሲኖ፥ ዛይቴይ ዋላኬቶንታ ኡኬꬃፌ ኢሲኖ፥ ዛይቴራ ኡኪዳ ኢሲ ኮምፖኔ ኢሲ ቄሪ ኮምፓ ኤካ።
24 ኔኒ ሃ ካꬃ ኡባ ኣሮኔ ኩሼኒኔ ኢዛ ናይታ ኩሼን ዎꬂኮ ኢስቲ ያኔ ሃ ቃሴꬂዛ ያርሾ ሂስቲዲ ጎዳ ሲንꬃን ሺሼቶ።
25 ሄሳፌ ጉዬ ኔኒ ኢስታ ኩሼፔ ሄይታ ኤካዳ፥ ያርሺዛሶዛ ቦላ ዎꬃዳ፥ ጹጌቲዛ ያርሾራ ኢሲፌ ጋꬃዳ፥ ጎዳስ ሳዎ ቱኑ ጋና ማላ፥ ያርሺዛሶዛ ቦላ ታማን ጹጋ።
26 ኣሮኔይ ቄሴ ጊዲዲ ሱሚዛ ዎዴ ሹኪዳ ꬋርሾዛ ኣንጋሶ ኤካዳ ጎዳ ሲንꬃን ያኔ ሃ ቃሴꬂዛ ያርሾ ሂስታ ቃሴꬃ፤ ሃይሲ ኢንቴና ጋኪዛ ጊሻ ጊዳና።
27 «ሄ ሹኬቲዳ ꬋርሾዛ ኣሾፔ ያርሾ ኦꬂዲ ያኔ ሃ ቃሴꬂዳ ኣንጋሶዛኔ ጎዳ ሲንꬅ ሺቂዳ ጌዳ ዱማሳ። ሄሲካ ኣሮኔ ጊሻኔ ኢዛ ናይታ ጊሻ ጊዳና።
28 ኢስራኤሌ ኣሳይ ጎዳስ ሺሺዛ ኢሲፌቴꬃ ያርሾዛፔ ኣንጋሶዛኔ ጌዳዛ ኡባ ዎዴካ ኣሮኔሲኔ ኢዛ ኣቱማ ናይታ ጋኪዛ ጊሻ ጊዶ። ኣይስ ጊኮ ሃይሲ ኢስራኤሌ ኣሳይ ጎዳስ ሺሺዛ ኢሞታ።
29 «ኣሮኔ ቄሴቴꬃ ዱማ ማይኦይ ኢዛፔ ጉዬ ኢዛ ዜሬꬃስ ጊዶ፤ ኢስቲ ቲዬቲዲ ቄሴ ጊዲዛ ዎዴ ሄ ማይኦዛ ማይኤቶ።
30 ኢዛ ናይታፔ ኢዛሶሆን ቄሴ ጊዲዲ ዱማቲዳ ሶሆዛን ኦꬃናስ ጾሳ ዱንካኔ ዪዳ ኣቱማ ናይ ሄ ማይኦዛ ላፑን ጋላስ ጋካናስ ማይኦ።
31 «ኣሮኔይኔ ኢዛ ናይቲ ቄሴቴꬃን ሱንꬃናስ ሹኬቲዳ ꬋርሻ ኣሾ ኤካዳ ዱማ ሶሆዛን ዶይሳ።
32 ኣሮኔይኔ ኢዛ ናይቲ ꬋርሾዛ ኣሻ ሌማቴን ዲዛ ኡኬꬃራ ጾሳ ዱንካኔ ፔንጌን ሜቶ።
33 ኢስቲ ቄሴ ጊዲዲ ሱሚዛ ዎዴኔ ዱማቲዛ ዎዴ ኢስታ ናጋራይ ኣቶ ጌቴታና ማላ ያርሼቲዳ ሄ ያርሾታ ሜቶ። ጊዶ ኣቲን ሄ ያርሾቲ ጌሽ ጊዲዳ ጊሻስ ሃራ ኣሲ ኦኒካ ሞፖ።
34 ቄሴቴꬃን ሱንꬃናስ ሹኪዳ ꬋርሾዛ ኣሾፔ ዎይኮ ኡኬꬃፌ ማላዶ ጋካናስ ፓላሂዲ ኣቂኮ ዱማ ጊዲዳ ጊሻስ ታማን ጹጌቶ ኣቲን ሜቴቶፎ።
35 «ሄሳꬆ ሂስታዳ ላፑን ጋላስ ጋካናስ ታኒ ኔና ኣዛዚዳ ማላ ኣሮኔኔ ኢዛ ናይታ ቄሴ ሂስታዳ ሱንꬃ።
36 «ናጋራይ ኣቶ ጌቴታና ማላ ሃች ሃች ናጋራ ጊሻስ ኢሲ ሚርጎ ያርሻ። ሄሳንካ ያርሺዛሶዛ ጌሻ፤ ሂስታዳ ያርሺዛሶዛ ዱማꬃናስ ዛይቴ ቲያ።
37 ያርሺዛሶዛ ናጋራ ጌሾ ዎጋ ላፑን ጋላስ ጋካናስ ዉርሳዳ ኢዛ ዱማꬃ። ሂስቲኮ ያርሺዛሶዚ ዱማ ጌሻሶሆ ጊዳና። ኢዛ ቦቺዛዴይ ኡባይ ጌሽ ጊዳና ቤሴስ።
38 «ያርሺዛሶን ኔኒ ሃች ሃች ሺሻና ያርሾይ ሃይሳ፤ ዬሌቲን ኢሲ ላይꬅ ኩሞንታ ናምኡ ኣዴ ላቃ ያርሻ።
39 ኣዴ ላቃታፔ ኢሳ ማላዶ፥ ቃሴ ናምኣንꬆዛ ኦማርሳ ዎዴ ያርሻ።
40 ኮይሮ ꬋርሾ ላቃ ኢሲ ኪሎኔ ባጋ ሎኦ ጊስቴ ꬊሌ ኢሲ ሊቲሮ ጉምኤቲዳ ዛይቴን ሙኑቃዳ ያርሻ፤ ኢሲ ሊቲሮ ዎይኔ ኡሹ ኡሻ ያርሾ ሂስታዳ ያርሻ።
41 ናምኣንꬆ ꬋርሾ ላቃዛ ኦማርሳ ዎዴ ያርሻ። ማላዶይሳ ጊና ꬊሌ፥ ዛይቴኔ ዎይኔ ኡሹ ሺሻ። ሄሲካ ጎዳስ ታማን ጹጌቲዲ ሳዎ ቱኑ ጊዛ ያርሾ ጊዳና።
42 «ሃ ጹጌቲዛ ያርሾይ ዪዛ ዬሌታ ኡባን ጾሳ ዱንካኔዛ ፔንጌን ጎዳ ሲንꬃን ፓጬይ ባይንዳ ያርሼታናስ ኮሼስ። ታኒ ኢንቴናራ ጋጋናይኔ ኔስ ሃሳያናይ ሄንኮ።
43 ቃሴ ሄን ታኒ ኢስራኤሌ ናይታራ ጋጋናኔ ታ ቦንቾይካ ሄ ሶሆዛ ዱማ ሶሆ ሂስታና።
44 «ሄሳ ጊሻስ ታኒ ጾሳ ዱንካኔዛኔ ያርሺዛሶዛ ዱማሳና፤ ኣሮኔይኔ ኢዛ ናይቲ ታስ ቄሴ ጊዲዲ ኦꬃና ማላ ታኒ ኢስታ ዱማሳና።
45 ሂስታዳ ታኒ ኢስራኤሌ ናይታ ጊዶን ዴኣና፤ ቃሴ ታኒ ኢስታ ጾሳ ጊዳና።
46 ታኒ ኢስታ ጊዶን ዴኣና ማላ ጊብጼፔ ኢስታ ኬሲዳ ጎዳ ኢስታ ጾሳ ጊዲዳይሳ ኢስቲ ኤራና። ኤ፥ ታኒ ጎዳ ኢስታ ጾሳ።