48
ሚናሴኔ ኤፍሬሜ
1 ሄሳፌ ጉዬ ኣሳይ ዮሴፌስ፥ «ኔ ኣዋይ ሳኬቴስ» ጊ ዮቲን ኢዚ ባ ናምኡ ኣቱማ ናይታ ሚናሴኔ ኤፍሬሜ ኤኪ ቢዴስ።
2 ኣሳይ ያቆቤ፥ «ቤያ! ኔ ናይ ዮሴፌይ ኔኮ ዪዴስ» ጊን ኢስራኤሌይ ሚኔቲዲ ባ ሂጻ ቦላ ዴንዲ ኡቲዴስ።
3 ያቆቤይ ዮሴፌ፥ «ኡባ ዳንዳይዛ ጾሲ ካናኔ ቢታን ሎዛ ጌቴቲዛሶን ታስ ቆንጪዲ ሄን ታና ኣንጂዴስ።
4 ኢዚ ታና፥ ‹ታ ኔስ ዬሎ ኢማና ኔ ዬሎታካ ዳርሳና፤ ታኒ ኔና ዳሮ ዴሬ ሂስታና። ሃ ቢታ ታኒ ኔፔ ጉዬ ኔ ዜሬꬃስ ሜርናስ ላታ ቢታ ሂስታ ኢማና› ጊዴስ።
5 «ሂስቲን ሃኢ ኔ ናምኡ ኣቱማ ናይቲ ታኒ ኔኮ ሃይሳ ያናፔ ካሴ ጊብጼን ኔስ ዬሌቲዳይቲ ታይታ፤ ኤፍሬሜይኔ ሚናሴይ ታስ ኦሮቤሌኔ ሲሞና ማላ።
6 ኢስታፌ ጉዬ ኔስ ዬሌቲዳይቲ ኔ ናይታ፤ ኢስቲ ላታና ዴሬይ ኤፍሬሜኔ ሚናሴ ሱንꬃን ሱሞ።
7 ታኒ ሜስጴጾሚያፔ ሲሚሺን ኤፍራታ ጌቴቲዛ ዴሬ ጋካና ጊሺን ኤራሄላ ካናኔ ቢታን ሃይቂን ታኒ ኢዞ ቤቴሊሄሜ ጌቴቲዛ ኤፍራታ ኤፊዛ ኦጌ ዶናን ሞጋዲስ» ጊዴስ።
8 ኢስራኤሌይ ዮሴፌ ኣቱማ ናይታ ናምኣታ ቤኢዲ፥ «ሃይቲ ኦኔ?» ጊ ኦይቺዴስ።
9 ዮሴፌይካ ባ ኣዋስ፥ «ሃይቲ ጾሲ ታስ ሃን ሃይሳን ኢሚዳ ታ ናይታ» ጊዴስ።
ሂስቲን ኢስራኤሌይ፥ «ታ ኢስታ ኣንጃና ማላ ታኮ ሃ ሺሻ» ጊዴስ።
10 ያቆቤይ ጪሚን ኢዛ ኣይፌይ ዳቡርዳ ጊሻስ ዴማናስ ዳንዳይቤና። ሄሳ ጊሻስ ዮሴፌይ ባ ኣቱማ ናይታ ኢዛኮ ሺሺን ኢዛ ኣዋይ ኢስታ ኢዲሚዲ ዬሪዴስ።
11 ያቆቤይ ዮሴፌ፥ «ታኒ ኔ ኣይፌሶ ቤያና ጋዳ ቆፓቤኬ፤ ጊዶ ኣቲን ጾሲ ሄኮ ኔ ናይታካ ታና ቤሲዴስ» ጊዴስ።
12 ዮሴፌይ ኢስታ ያቆቤ ጉልባቴ ቦላፌ ዴንꬂዲ ባ ሁኤ ቢታ ጋꬂ ዚጊዴስ።
13 ዮሴፌይ ባ ናምኡ ኣቱማ ናይታ ኤኪዲ ኤፍሬሜ ባ ኡሻቻ ባጋን ያቆቤስ ሃዲርሳ ባጋራ፥ ሚናሴ ባ ሃዲርሳ ባጋን ያቆቤስ ኡሻቻ ባጋራ ኢዛኮ ሺሺዴስ።
14 ጊዶ ኣቲን ያቆቤይ ባ ኩሼ ያኔ ሃ ቃሴꬂ ኣꬂዲ ባ ኡሻቻ ኩሼ ካሎ ናዛ ኤፍሬሜ ሁኤ ቦላ፥ ባ ሃዲርሳ ኩሼ ባይራ ናዛ ሚናሴ ሁኤ ቦላ ዎꬂዴስ።
15 ሄሳፌ ጉዬ ያቆቤይ ዮሴፌ፥
«ታ ኣዋቲ ኣብራሃሜይኔ ዪሳቂ
ኢዛ ሲንꬃን
ሱሬን ዴኢዳ ጾሲ፥
ታ ዴኦ ኡባን ሃች ጋካናስ
ታና ሄሚዳ ጾሲ፥
16 ኢታ ሚሻ ኡባፌ
ታና ኣሺዳ ኪታንቻይ፥
ሃ ናይታ ኣንጆ።
ታ ሱንꬃይኔ
ታ ኣዋታ ኣብራሃሜኔ
ዪሳቃ ሱንꬃይ ኢስታን ጼይጌቶ።
ኢስቲ ቢታ ቦላን
ጮራቴቶ» ጊ ኣንጂዴስ።
17 ዮሴፌይ ባ ኣዋይ ባ ኡሻቻ ኩሼ ኤፍሬሜ ሁኤ ቦላ ዎꬂዳይሳ ዶሲቤና። ሄሳ ጊሻስ ኤፍሬሜ ሁኤ ቦላፌ ዴንꬂዲ ሚናሴ ሁኤ ቦላ ዎꬃናስ ባ ኣዋ ኩሼ ኦይኪዴስ።
18 ዮሴፌይ ባ ኣዋስ፥ «ኣቦ ሄሳꬆ ዴና! ባይራይ ሃይሳ ጊዶንታ ጊሻስ ኔ ኡሻቻ ኩሼ ሃይሳ ቦላ ዎꬃ» ጊዴስ።
19 ጊዶ ኣቲን ኢዛ ኣዋይ ኢጺዲ ኢዛስ፥ «ታ ናዞ! ታ ኤራይስ፤ ኢዚካ ጊታ ዴሬ ጊዳና። ጊዲኮካ ካሎ ኢሻይ ኢዛፔ ኣꬊ ጊታታና፤ ኢዛ ዜሬꬃይካ ዳሮ ጊታ ካዎቴꬅ ጊዳና» ጊዴስ።
20 ኢዚ ሄ ጋላስ ኢስታ ኣንጂዲ፥
«ኢስራኤሌ ናይቲ ኣንጆ ኣንጂዛ ዎዴ፥
‹ጾሲ ኢንቴና ኤፍሬሜ ማላኔ
ሚናሴ ማላ ኦꬆ› ጊዲ
ኢንቴ ሱንꬃን ኣንጃና» ጊዴስ።
ሂስቲዲ ኤፍሬሜ ሚናሴፔ
ሲንꬄ ኣꬂዴስ።
21 ሄሳፌ ጉዬ ያቆቤይ ዮሴፌ፥ «ታ ሃይቃና ጋይስ፤ ጊዶ ኣቲን ጾሲ ኢንቴናራ ጊዳና፤ ቃሴ ኢዚ ኢንቴ ኣዋታ ቢታ ኢንቴና ጉዬ ዛራና።
22 ቃሴ ኔና ኔ ኢሻታራ ጋኪዛ ቢታፌ ጊሻ ዳርሳዳ ኔስ ኢማይስ፤ ሄሲካ ታኒ ኣሞሬታፔ ታ ማሻኒኔ ቶራን ኦላ ኤኪዳ ቢታ» ጊዴስ።