9
ጾሲ ኖሄራ ጌሊዳ ጫቆ ቃላ
1 ጾሲ ኖሄኔ ኢዛ ናይታ፥ «ዬሌቲቴ፤ ጮራቲቴ፤ ቢታ ኡባ ኩሚቴ።
2 ቢታ ዶኣቲ፥ ካፎቲ፥ ቢታን ዎጺ ቃጺዛ ሚሻቲኔ ኣባ ጊዶን ዲዛ ሞሌቲ ዉሪ ኢንቴስ ያዬቶኔ ዳጋሜቶ፤ ኢስቲ ኢንቴ ሼኔን ዴቶ።
3 ታ ኢንቴስ ቢታፌ ሞኪዛ ዱማ ዱማ ካꬃታ ኢሚዳ ማላካ ሼምፖራ ፓጻ ዲዛ ሜꬌቴꬃቲ ዉሪ ኢንቴስ ቁማ ጊዳና።
4 ሼምፖይ ሱꬃ ጊዶን ዲዛ ጊሻስ ሱꬂ ኢዛፔ ጉኮንታ ኣሾ ሞፒቴ።
5 ታኒ ኢንቴ ሼምፖይ ኢዛን ዲዛ ኢንቴ ሱꬅ ሜሄፔኔ ዶኣ ኡባፌ ቱሙ ታ ኦይቻና፤ ቃሴ ኣሳ ኡባፌካ ኢዛ ማላ ኣሳ ሱꬅ ኦይቻና።
6 ጾሲ ኣስ ባና ሚሳቲሲዲ ሜꬊዳ ጊሻስ ኣሳ ሱꬅ ጉሲዛ ኦናካ ጊዲኮ ኢዛ ሱꬂካ ኣሳ ኩሼን ጉካና።
7 ኢንቴ ዬሌቲቴ፤ ጮራቲቴኔ ቢታ ቦላ ኬሂ ዳሪቴ» ጊ ኣንጂዴስ።
8 ሄሳፌ ጉዬ ጾሲ ኖሄኔ ኢዛራ ዲዛ ኢዛ ናይታ ሂዝጊዴስ፤
9-10 «ሂስቲን ሃኢ ታኒ ታ ጫቆ ኢንቴናራ፥ ኢንቴፌ ጉዬ ኢንቴ ዜሬꬃራኔ ኔናራ ሼምፖራ ዲዛ ሜꬌቴꬃታራ ጫቄታዲስ፤ ኤ! ታኒ ታ ጫቆ ካፎራ፥ ሜሄራ፥ ቢታ ዶኣ ኡባራኔ ማርካቤፔ ኢንቴናራ ኬዚዳ ፓጻ ዲዛ ሜꬌቴꬅ ኡባራ ጫቄታዲስ።
11 ታኒ ኢንቴናራ ጫቄታዲስ፤ ሃይሳፌ ሲንꬃን ፓጻ ዲዛይ ዉሪ ꬋይሲዛ ሃꬃን ሙሌካ ꬋዬና፤ ሃ ቢታ ꬋይሲዛ ሃꬂ ሃይሳፌ ጉዬ ሙሌካ ዴና» ጊዴስ።
12 ቃሴካ ጾሲ፥ «ታኒ ታፔኔ ኢንቴፌ፥ ኢንቴናራ ዲዛ ፓጻ ሜꬌቴꬃታስ ኡባፌ ጊዶን ያና ዬሌታ ኡባራ ጫቄቲዛ ጫቆዛስ ማላታይ ሃይሳ፤
13 ታኒ ታ ዙላ ሳሎ ቦላ ኤሳና፤ ኢዚ ታፔኔ ሃ ቢታ ቦላ ዲዛ ሜꬌቴꬃፌ ጊዶን ዲዛ ጫቆዛስ ማላታ ጊዳና።
14 ታኒ ቢታፌ ቦላን ሻራ ኤሂዳ ዎዴኔ ሻራ ቦላን ዙላይ ቤቲዳ ዎዴ፥
15 ‹ፓጻ ዲዛ ሜꬌቴꬅ ኡባ ꬋይሳናስ ሃይሳፌ ሲንꬃን ሙሌካ ꬋይሳ ሃꬂ ዬና› ጋዳ ታፔኔ ኢንቴፌ ፓጻ ዲዛ ዱማ ዱማ ቆሞ ሜꬌቴꬃታ ኡባፌ ጊዶን ጫቂዳ ታ ቃላ ታ ቆፓና።
16 ዙላይ ሻራ ቦላ ቤቲዳ ዎዴ ኣይዴካ ታኒ ኢዛ ቤያዳ ታፔ ጾሳፌኔ ሃ ቢታ ቦላን ፓጻ ዲዛ ዱማ ዱማ ቆሞ ሜꬌቴꬃ ኡባፌ ጊዶን ጫቆ ጌሊዳ ሜርና ጫቆ ቃላ ታ ሃሳኣና» ጊዴስ።
17 ጾሲ ኖሄ፥ «ታኒ ታፔኔ ሃ ቢታ ቦላን ፓጻ ዲዛ ኡባፌ ጊዶን ጫቂዳ ጫቆዛስ ማላታይ ሃይሳ» ጊዴስ።
ኖሄኔ ኢዛ ናይታ
18 ማርካቤዛፔ ኬዚዳ ኖሄ ናይቲ ሴሜ፥ ካሜኔ ያፌቴ፤ ካሜይ ካናኔ ኣዋ።
19 ሃይቲ ሄꬓይካ ኖሄ ናይታ፤ ቢታ ኡባን ዲዛ ኣሳይ ኢስታፌ ዬሌቲዴስ።
20 ኖሄይ ጎሻንቻ፤ ኢዚ ዎይኔ ሚꬅ ቶኬꬅ ኦይኪዴስ።
21 ኢሲ ጋላስ ኢዚ ዎይኔፔ ኦሴቲዳ ጫጄ ኡዪ ማꬆቲዲ ባ ዱንካኔዛ ጊዶን ፓጻ ካሎ ኢቺዴስ።
22 ካናኔ ኣዋ ካሜይ ባ ኣዋ ካሎቴꬅ ቤኢዲ ካሬ ኬዚዲ ባ ኢሻታ ናምኣታስ ዮቲዴስ።
23 ጊዶ ኣቲን ሴሜይኔ ያፌቴይ ማይኦ ኤኪዲ ናምኣይካ ባ ሃሼ ሃሼ ቦላ ጋꬂ ኦይኪዲ ጉንዲጉꬅ ሄሜቲ ጌሊዲ ባ ኣዋ ካሎቴꬅ ካሚዳ፤ ኢስቲ ባ ኣዋ ካሎቴꬅ ቤኦንታ ማላ ባ ኣይፌሶ ጉዬ ዛሪዳ።
24 ኖሄይ ማꬆይ ኣꬊን ቤጊዲ ኡባፌ ካሎ ናዚ ባ ቦላ ኦꬂዳይሳ ኤሪዲ፥
25 «ካናኔይ ቃንጌቲዳዝ ጊዶ!
ኢዚ ባ ኢሻታ ኣይሌታስ
ኣይሌ ጊዶ!» ጊዴስ።
26 ቃሴካ ኖሄይ፥
«ጎዳይ፥ ሴሜ ጾሲ ጋላቴቶ!
ካናኔይ ሴሜ ኣይሌ ጊዶ!
27 ጾሲ ያፌቴ ቢታ ኣሶ!
ያፌቴ ዜሬꬃቲ
ሴሜ ዜሬꬃታራ ዴቶ!
ካናኔይ ያፌቴ
ኣይሌ ጊዶ!» ጊዴስ።
28 ꬋይሳ ሃꬃፌ ጉዬ ኖሄይ 350 ላይꬅ ዴኢዴስ።
29 ኖሄይ ሙሌራ 950 ላይꬅ ዴዪዲ ሃይቂዴስ።