27
1 ሄ ጋላስ ጎዳይ ሌዋታኔ ጌቴቲዛ
ጾንጌቲዛ ሾሻኔ
ጻጼቲዛ ሾሻ
ባ ሚኖ፥ ጊታኔ ዎልቃማ
ጊꬃ ማሻን ቃጻያና፤
ኣባን ዲዛ ዎጋ ዶኣ
ቃንጼሬꬂ ዬጋና።
2 ሄ ጋላስ፥ «ዎይኔ ሚꬅ ቶኪዛ
ሎኦሶዛስ ዬጺቴ!
3 ታኒ ጎዳይ ኢዛ ናጋይስ፤
ታኒ ኡባ ጋላስ ሃꬅ ኡሻይስ፤
ኦማርሲኔ ጋላስ ኢዛ ናጋይስ፤
ሄሳ ጊሻስ ኦኒኔ
ኢዛ ቆሄና።
4 ታኒ ሃንቄቲኬ፤
ታናራ ኦሌታናስ ኣጉንꬂኔ
ኪንዲቾይ ኬዚዳኮ
ታ ኢስታ ኢሲ ቦላ ጹጋና!
5 ዎይኮ ታኮ ዪዲ ታና ባንታስ
ቆቴቲዛሶ ኬሴቶ፤
ታናራ ጊጌቶ፤
ኤ ታናራ ጊጌቶ» ጌቴታና።
6 ያና ጋላሳታን
ያቆቤይ ጻጶ ዬዳና፤
ኢስራኤሌይ ኣጫናኔ ጪያና፤
ሂስቲን ኢስታ ኣይፌይ
ሳኣ ኩማና።
7 ኢዞ ሾጪዳይታ ሾጪዳ ማላ
ጎዳይ ኢዞ ሾጪዴ?
ኢዞ ዎꬊዳይታ ኢዚ ዎꬊዳ ማላ
ኢዞ ዎꬊዴ?
8 ኦላኒኔ ዲኦን ኔ ኢዞ ቃጻያዳሳ፤
ኣርሼይ ሞኪዛ ባጋ ጫርኮይ
ጫርኪዛ ማላ
ዎልቃማ ጎቴ ጫርኮን
ኔ ኢዞ ጎዳዳሳ።
9 ያቆቤይ ያርሾ
ያርሺዛሶ ሹቻታ
ቦቂንታ ሹቻ ማላ
ጋጪ ሊቂሲሺን
ኣሼሮ ጌቴቲዛ
ኤቃ ጾሳይ ሚስሌኔ
ኤጻኔ ጩዋሲዛ ሶሆታ
ኢስቲ ዲዛሶሆታፔ ሾዲ ኦሊሺን
ሄ ጋላስ ሞሮይ ኣቶ ጌቴታና፤
ሄሲ ኢዚ ባ ናጋራ ዲጎይሳስ
ኩሜꬃ ኣይፌ ጊዳና።
10 ጊምቤቲዳ ካታማያ ካይዛዱስ፤
ባዞ ቢታ ማላ
ኦሌቲዳሶ ጊዳዱስ፤
ማራቲ ሄን ሄሜቲዲ
ሄን ኢቻና፤
ኢዚ ሃጋታካ ፖቂ ማና።
11 ኢዚ ጼራይ ሜሊዲ ሜቃና፤
ማጫሳቲካ ሚጺ ኤꬃና፤
ኣኬካይ ባይንዳ
ዴሬ ጊዲዳ ጊሻስ
ኢዛ ሜꬊዳይ
ኢዛስ ቃꬌቴና፤
ኦꬂዳይሲካ ኢዛ ማሬና።
12 ሄ ጋላስ ኤፊራጺሴ ሻፋፔ ሃꬂ ባይንዳ ጊብጼ ሻፋ ጋካናስ ጎዳይ ባ ካꬃ ቡካና፤ ኢንቴኖ ኢስራኤሌ ኣሳቶ፥ ኢንቴ ኢሶይ ኢሶይ ሺቃና።
13 ሄ ጋላስ ጊታ ዛዬይ ፑኔታና፤ ኣሶሬን ዲኤቲዳይቲኔ ጊብጼን ኡንኤቲዳይቲ ጉዬ ዬሩሳላሜ ሲሚ ዪዲ ጌሻ ዙማ ቦላ ጎዳስ ጎይናና።