51
ጺዮኒስ ሜርና ኣቶቴꬅ
1 «ኢንቴኖ ጺሎቴꬅ ካሊዛይቶ፥
ጎዳ ኮይዛይቶ ሲዪቴ።
ኢንቴ ኢዛፔ ጳልቄቲ
ኬዚዳ ዛላዛኔ
ኢንቴ ቦኬቲ ኬዚዳ
ኦላ ጼሊቴ።
2 ኢንቴ ኣዋ ኣብራሃሜኮ፥
ኢንቴና ዬሊዳ ሳራኮ ጼሊቴ።
ኢዚ ባርካ ዲሺን
ታኒ ኢዛ ጼይጋዲስ፤
ታኒ ኢዛ ኣንጃዲሲኔ ዳርሳዲስ።
3 «ጎዳይ ጺዮኖ
ቱሙ ሚንꬄꬃና፤
ኢዚ ላሌቴꬃ
ቃꬌታን ጼላና፤
ኢዚ ባዞ ቢታዛ ኤዴኔ ማላ፥
ኢዚ ባዞ ቢታዛ
ጎዳ ኣታኪልቴሶሆ ማላ
ኦꬃና፤
ኢሻሎይኔ ኡፋይሲ፥
ጋላታይኔ ዬꬃ ጬንጉርሲ
ኢዚን ሴቴታና።
4 «ታ ባጋቶ ታ ጊዛይሳ ሲዪቴ፤
ታ ዴሬዞ ታ ጊዛ ኤዝጋ፤
ዎጋይ ታፔ ኬዛና፤
ታ ፒርዳይ ካዎቴꬃታስ
ፖኦ ጊዳና።
5 ታ ጺሎቴꬃይ
ኤሶቲ ዬꬃ ቦላ፥
ታ ኣቶቴꬃይ ማቲሼ ዴስ፤
ታ ቄሴይ ካዎቴꬃታስ
ቱማ ፒርዳ ኤሃና፤
ሃሩሮቲ ታኮ ጼላና፤
ታ ቄሴካ ሂዶታ ኦꬃና።
6 ፑዴ ꬎቁ ጊዲ ሳሎታ ጼሊቴ፤
ዚቂ ጊዲ ዱጌ ሳኣካ ጼሊቴ።
ሳሎቲ ጩዋ ማላ
ቲምኢ ጊ ꬋያና፤
ሳኣይካ ኣፋላዳን ጬጋና፤
ኢዚን ዴኢዛ ኣሳይ ኡዱንጼ ማላ
ኤሶን ꬋያና፤
ታ ኣቶቴꬃይ ሜርናስ ዳና፤
ታ ጺሎቴꬃስካ
ዉርሴꬂ ዴና።»
7 ጎዳይ፥ «ኢንቴኖ
ጺሎቴꬅ ኤሪዛይቶ፥
ታ ዎጋ ኢንቴ ዎዚናን
ዎꬂዳ ኣሳቶ
ታ ጊዛ ሲዪቴ።
ኣሳይ ኢንቴና ካꬊሺን ባቦፍቴ፤
ኢስቲ ኢንቴና
ጫዪሺን ዳጋሞፍቴ።
8 ቢላይ ማይኦ ሚዛ ማላ
ኢስታ ማና፤
ኢስቲ ጉጹኔይ ሚዳ
ሱፌ ማላ ጊዳና፤
ታ ጺሎቴꬂ ጊዲኮ ሜርናስ፥
ታ ኣቶቴꬂ ዬሌታፔ
ዬሌታ ጋካናስ ዳና» ጌስ።
9 ኣቤት ጎዳ ቄሴይ ዴንዳ፤
ዎልቃ ማይኣ፤
ካሴ ኣꬊዳ ዎዴታን፥
ሚሚንቴ ቃንጼሬꬂዳይ፥
ጊታ ዳዌዛ ጫዲዳይ
ኔና ጊዲኪ?
10 ዎዜቲ ኣቲዳይቲ ፒናና ማላ፥
ኣባኔ ጪማ
ሃꬃ ሜሊሲዳይ፥
ጪማ ጊዶራ ኦጌ ጊግሲዳይ
ኔና ጊዲኪ?
11 ጎዳይ ዎዚዳይቲ ሲማና፤
ዬጺሼካ ጺዮኔ ጌላና፤
ሜርና ኡፋይሳ ካላቻ
ሁኤን ጎጻና፤
ኢስቲ ኢንጄኔ ኡፋይሳ
ዱስ ዴማና፤
ጬጬይኔ ዬሆይ
ኢስታፌ ባቃታና።
12 ጎዳይ፥ «ኢንቴና ሚንꬂዛይ
ታኒ ጻላ ኢዛ፤
ሃይቂዛ ኣሳ ዜሬꬅ፥
ማታ ማላ ሹሊዛ ኣሳ ናስ
ኣይስ ባባይ?
13 ኔና ሜꬊዳይሳ፥
ሳሎታ ቶሊዳይሳ፥
ሳኣስ ዮች ዬጊዳይሳ ኔ ባላዳሳ፤
ኔና ꬋይሳናስ ጊጌቲዳ
ሜንጼ ኢታዛ ጋሶፔ
ዴንዲዳይሳን
ኡባ ጋላስ ሺሮን ዳሳ፤
ሂስቲን ሄ ሜንጼ ኢታዛ ሃንቆይ
ሃኢ ኣዋን ዲዜ?
14 ቃሼቲዳይቲ ኤሶን ቢርሼታና፤
ኢስቲ ባ ቃሼቲዳ
ኦላ ጊዶን ሃይቄቴና፤
ካꬂ ኢስታስ ፓጬና።
15 ጋሶይካ ዳምባላይ ዴንዳና ማላ
ኣባ ቃꬂዛ
ታኒ ጎዳይ ኔ ጾሳ፤
ታ ሱንꬂ ጎዳ
ኡባፌ ዎልቃማ ጾሳ።
16 ታኒ ታ ቃላ
ኔ ዶናን ዎꬃዲስ፤
ታ ኩሼ ኩዋን ካማዲስ፤
ሳሎታ ኢስቲ ዲዛሶን ዎꬂዳይ፥
ቢታስ ዮች ዬጊዳይ፥
ጺዮኖ፥ ‹ኔ ታ ዴሬ›
ጊዳይ ታና» ጌስ።
ጎዳ ሃንቆ
17 ጎዳ ኩሼፔ ሃንቆ
ኡሹ ኡዪዳሬ፥
ኦርጮካ ኣሾንታ፥
ኣስ ጋንዲጋርሲዛ ኡሹ
ጺጺ ሂስታ ኡዪዳሬ፥
ሃኔ ዬሩሳላሜ ዴንዳ!
ዴንዳ፥ ዴንዳ ኤቃ!
18 ኢዛ ዬሊዳ ናይታ ኡባፌ
ካሌꬂዛይ ኢሶይካ ባዋ፤
ቃሴ ኢዛ ዲቺዳ
ናይታ ኡባፌካ
ኢዚ ኩሼ ኦይኪዛይ
ኢሶይካ ባዋ።
19 ቤኣ ባሻ ቦላ ባሺ
ኔ ቦላ ዪዴስ፤
ሂስቲን ኔና ኦኔ
ሚንꬄꬃናይ?
ኢስቲካ ላሌቴꬂኔ ꬋይስ፥
ኮሻኔ ማሻ።
20 ኔ ኣቱማ ናይቲ ዳቡርዳ፤
ዎጺማዴን ኦይኬቲዳ
ጌኔሳ ማላ
ኦጌ ጋጻን ኡባን ኢቺዳ።
ጎዳ ሃንቆይኔ
ኔ ጾሳ ሴራይ
ኢስታ ቦላ ኩሚዴስ።
21 ሄሳ ጊሻስ ዎይኔ
ኡሻን ጊዶንታ
ጮ ማꬆቲዛሬ ሃይሳ ሲያ
22 ባ ዴራ ኣሺዛ ኔ ጎዳይ
ኡባፌ ዎልቃማ ጾሳይ፥
«ቤኣ፤ ኔና ጋንዲጋርሲዛ
ኡሻ ኔ ኩሼፔ
ታ ኤካዲስ፥
ታ ሃንቆ ጹኣፔ
ናምኣንꬆ ኡያካ።
23 ታኒ ሄሳ ኔና ኡንኤꬂዛይታ
ኩሼን ዎꬃና።
ኢስቲ ኔና፥ ‹ኑኒ ኔ ቦላራ
ሄሜቲዲ ኣꬋና ማላ ዛቁላ› ጊዳ።
ሂስቲን ኢስቲ ኣꬋና ጋካናስ
ኔ ዞኮ ኢስታስ ቢታ ማላኔ
ኦጌ ማላ ኦꬃዳሳ» ጌስ።