53
1 ዴሬዚ፥ «ኑኒ ዮቲዳይሳ
ኦኔ ኣማኒዳይ?
ጎዳ ቄሴይ ኦናስ ቆንጪዴ?
2 ኢዚ ኢዛ ሲንꬃን ጫሬቻ ማላ፥
ሜላ ቢታፌ ሞኪዛ
ጻጶ ማላ ሞኪዴስ፤
ኑ ኢዛ ጼላናስ ሺጫቴꬂ
ዎይኮ ቴማይ ዴና፤
ኑ ኢዛ ዶሳናስ
ኢዛ ማላይ ሎኤና።
3 ኢዚ ኣሳን ካꬌቲዳዴኔ
ኢጼቲዳዴ፤
ኢዚ ሃርጌፌኔ ሜቶፔ
ሻኬቲ ኤሮንታ ኣሳ፤
ኢዚ ኣሲ ኢዛ ቤኣናፔ
ባ ኣይፌሶ ሃራሶ ዛሪዛ ኣሳ ማላ
ካꬌቲዳዴ ጊዲዴስ፤
ኑኒካ ኢዛ ቦንቺቤኮ።
4 «ቱሙካ ኢዚ ኑ ሃርጌ
ባስ ኤኪዴስ፤
ቃሴ ኑ ሳኮካ ኢዚ ቶኪዴስ።
ኑኒ ጊዲኮ ኢዛ ጋኪዳ ሜቶይ፥
ዴሼቴꬃይኔ ዋዬይ
ጾሳፌ ኢዛስ ኢሜቲዳዛ
ጊዲ ቆፒዶስ።
5 ጊዶ ኣቲን ኢዚ
ኑ ሞሮ ጊሻስ ጫዴቲዴስ፤
ኑ ቆሆ ጊሻስ ሊቂዴስ፤
ኢዛ ቦላ ዎꬊዳ ቂጻቴይ
ኑስ ሳሮ ኤሂዴስ፤
ኢዛ ማዱንꬃን ኑ ፓጺዶስ።
6 ኑኒ ኡባይ ዶርሳ ማላ
ቶይላቲ ꬋይዶስ፤
ኑኒ ኢሶይ ኢሶይ ኑ ኦጌ ቢዶስ፤
ጎዳይ ኑ ኡባ ቆሆ
ኢዛ ቦላ ዎꬂዴስ።
7 «ኢዚ ኡንኤቲዴሲኔ ዋዬቲዴስ፤
ጊዶ ኣቲን ዶናካ ፖጊቤና።
ዶርሳ ላቃ ማላ
ሹኬታናስ ላጌቲዴስ፤
ባ ኢስኬ ቃንጺዛይታ ሲንꬃን
ጮኡ ጊዛ ዶርሳ ማላ
ኢዚ ዶናካ ጶቂቤና።
8 ኢዛ ሜቶꬆኒኔ ፒርዳን ኤፊዳ፤
ኢዚ ታ ዴራ ሞሮ ጊሻስ
ዴሼቲዲ፥ ፓጻይ ዲዛ ቢታፌ
ዲጌቲዳይሳ ኢዛ ዜሬꬃፌ
ኣኬኪዳይ ኦኔ?
9 ኢዚ ኣይኮ ጌኔ ሃሳዮንታ፥
ኣይ ሞሮካ ኦꬆንታ፥
ኢዛ ሃይቆይ ኢታታራ
ኢሲፌ ቆዴቲዴስ፤
ጊዶ ኣቲን ኢዚ ዱሬታ
ዱፎን ሞጌቲዴስ።
10 «ኢዛ ሊቄꬂኔ ዋዬዚ
ጎዳ ሼኔ ጊዲዴስ፤
ጎዳይ ኢዛ ሼምፖ
ናጋራ ያርሾ ኦꬂኮካ
ኢዚ ባ ዜሬꬃ ቤኣና፤
ጎዳ ሼኔይ
ኢዛ ኩሼን ፖሌታና።
11 ኢዛ ሼምፖይ ዋዬቲዳፔ ጉዬ
ኢዚ ዴኦ ፖኦ
ቤኣናኔ ኡፋዬታና።
ታ ጺሎ ኣይሌዚ ባ ኤራቴꬃን
ዳሮታ ጺሊሳና፤
ኢስታ ሞሮካ ቶካና።
12 ሄሳ ጊሻስ ኢዛ ጋኪዛ ጊሻ
ጊታ ኣሳታ ጊሻራ ኢሲፌ ሂስታና፤
ዲኢ ኤሂዳይሳ ዎልቃማታራ
ኢዚ ኢሲፌ ጊሼታና፤
ኢዚ ባ ሼምፖ
ሃይቆስ ኣꬂ ኢሚዲ፥
ኢታ ኦꬂዛይታራ
ኢሲፌ ቆዴቲዳ ጊሻስ፥
ዳሮታ ናጋራ ቶኪዴስ፤
ቆሂዳይታ ጊሻስ
ጋናቲዴስ» ጋና።