14
1 «ኣሾ ማይኢዳ ኣሳስ
ላይꬃይ ቃንꬃ፤
ሄሲካ ሜቶን ኩሚዴስ።
2 ጪሻ ማላ ቤቲዲ
ሄራካ ቆኬስ፤
ኤሾ ማላ ዳሮ ጋምኦንታ
ሄራ ኣꬌስ።
3 ሂስቲን ኔኒ ሃይሳ ማላ
ኣሳ ሜꬌቴꬃ ካሌታይ?
ኔ ሲንꬂካ
ፒርዳስ ሺሻኔ?
4 ቱና ሚሻፌ
ጌሻ ሚሽ ዴማናስ
ዳንዳይዛዴይ ኦኒካ ዴና።
5 ኣሳ ላይꬃስ ዎꬊዳ ዛዋይ ዴስ፤
ኣሲ ዳና ኣጊናቲካ
ኔ ማታን ቆዳን ዴቴስ፤
ኔኒካ ዎꬂዳ
ላይꬃ ዛዋፔ
ኣꬊዛዴይ ዴና።
6 ኡኔቲ ኣቂዛዴይ
ባ ኦꬃና ጋላሳ ኦሶዮ
ፖሊዲ ኡፋዬቲዛ ማላ፥
ኣሲካ ባ ዳቡራ ጋላሳን
ኡፋዬታና ማላ
ኔ ኣይፌ ኢዛ ቦላፌ ዴንꬃ።
7 ቃንጼቲዳ ሚꬃ ኡꬃስካ
ሂዶታይ ዴስ፤
ናምኣንꬆ
ሲሚ ኣጫናሲኔ
ሃጋታ ኬሳናስ ዳንዳዬስ።
8 ኣይኮካ ጻጶቲ
ቢታ ጊዶን ጪሚኮካ፥
ኣኖይካ ቢታ ጊዶን ሙሲኮ፥
9 ኢርጻ ዴሚኮ
ናምኣንꬆ ኣጬስ፤
ኦራꬅ ቶኬቲዳ ሚꬃ ማላ
ሃጋታ ኬሴስ።
10 ኣሲ ጊዲኮ ሃይቂዲ
ካሴ ባይንዳ ማላ ሃኔስ፤
ሃይቂዳፔ ጉዬ
ኣዋን ቤታኔ?
11 ኣባ ሃꬂ ዉሪዛ ማላ፥
ሻፋ ሃꬂካ ሜሊዛ ማላ፥
12 ኣሲካ ሄሳ ማላ
ሃይቂዳፔ ጉዬ
ሃ ሲሜና፤
ሳሎይ ኣꬋናሼ
ጋካናስ ዴንዴና፤
ꬊስኮፌካ ቤጌና።
13 «ሃይቂዳይታ ጊዶን
ኔ ታና ቆቲዳኮ ኣዜ ዲዛይ!
ኔ ሃንቆዚ ኣꬋና
ዎዴይ ጋካናስ
ኔ ታና ቆቲዳኮ!
ቃጻሮ ጋላስ ቃቻዳ
ኔ ታና ቆፒዳኮ!
14 ኣሲ ሃይቂዳፔ ጉዬ
ኣሾራ ፓጻ ዳናስ ዳንዳይዜ?
ታስ ዎዴይ ላሜታና ጋካናስ፥
ታ ሃይሳ ባጼ ላይꬃ
ጌንጫ ኣꬃና።
15 ሄ ዎዴ ኔኒ ታና ጼይጋና፤
ታኒካ ኔስ፥ ‹ዬ› ጋና፤
ኔ ሜꬌታ ጊዲዳ ታና
ቤያናስ ኔ ላሞታና።
16 ሄኮ ሃኢ
ኔ ታ ሄሜታ ካሌታሳ፤
ጊዲኮካ ታ ናጋራ ቆፓካ።
17 ታ ቆሆይ ካራጺቴን ጹንቴታና፤
ታ ናጋራካ ኔ ካማና።
18 «ዙማይ ሃሮቲዛ ማላኔ
ዎዲዛ ማላ፥
ዛላይካ ባ ዲዛሶፔ
ꬎቃሌቲዛ ማላ፥
19 ሃꬂ ሹች ዎጪዲ
ኦንጊዛ ማላ፥
ዲኦይ ቢታ ሜጪዛ ማላ
ኔኒካ ኣሳ ሂዶታ ꬋይሳሳ።
20 ኔ ዎልቃይ ሜርናስ
ኢዛዴ ቦላ ሚኔስ፤
ኢዚካ ካሴ ባይንዳ ማላ ሃኔስ፤
ኔ ኢዛ ሜꬋካ ላማዳ
ኔ ሲንꬃፌ ꬋይሳሳ።
21 ኢዛ ናይቲ ቦንቾ ዴሚዳኮካ
ኢዚ ኤሬና፤
ካዉዪዛኮካ ኢዚ ጼሌና።
22 ኢዛስ ኢዛ ኣሳቴꬃ
ዋዬዚ ሲዬቴስ፤
ኢዚካ ባ ሜቶዛ ጊሻስ ጻላ
ዬኬስ።»