3
ኢዮቢ ባ ዬሌቲዳ ጋላስ ቃንጌꬅ
ኢዮቤ ሃሳያ
1 ሃይሳፌ ጉዬ ኢዮቢ ሃሳያ ዶሚዴስ፤ ባ ዬሌቲዳ ጋላሳ፥
2-3 «ታኒ ታ ኣዬይ ኡሎን
ሜꬌቲዳ ኦማርሳያኔ
ታኒ ዬሌቲዳ ጋላሳያ
ቃንጌቲዳይታ ጊዴቶ!
4 ሄ ጋላሳይ ꬉማን ላሜቶ፤
ሳሎ ጾሳይ ኢዛ ቆፖፎ፤
ፖኦይ ሙሌካ ኢዛን ቤቶፎ።
5 ሻሩማኒኔ ጊርዲ ጊዳ ꬉማን
ካሜቲዳይሳ ጊዶ፤
ሻራይ ካሚን ꬉማይ
ኢዛ ፖኦ ሚቶ።
6 ሄ ጋላሳ ኦማርሳዮ
ጊርዲ ጊዳ ꬉማይ ካሞ፤
ላይꬃ ጋላሳታራ
ኢሲፌ ታይቤቶፎ፤
ኣጊናታ ቆዳን ጌሊ ቆፌቶፎ።
7 ሄ ጋላሳ ኦማርሳይ
ኣይኮይ ባይንዳዝ ጊዶ፤
ኡፋይሳ ቃላይካ ኢዛን ሴቴቶፎ።
8 ሌዋታኔ ጌቴቲዛ ዶኣ
ቃሴꬃናስ ዳንዳይዛይቲ፥
ጋላሳታ ቃንጊዛይቲ፥
ሄ ጋላሳዮ ቃንጌቶ።
9 ሄ ጋላሳ ኦማርስ
ባካሌ ጾሊንቴቲ ꬉሜቶ፤
ፖኦ ሂዶታይ ኢዛን ቤቶፎ፤
ዎንታ ጻልቄይ ኢዛን ጻልቆፎ።
10 ታ ኣይፌታፔ ሜቶ ጌንꬃና፥
ታ ኣዬይ ኡሎ ታ ቦላ
ጎርዶንታ ኣጊዳ ጊሻስ
ሄ ጋላሳይ ቃንጌቲዳይሳ ጊዶ።
11 «ታ ኣዬይ ኡሎን ዳሼ
ሃꬄ ጊዳ ኣቲዳኮ ኣዜ!
ታ ኣዬይ ኡሎፔ ኬኢዳ ማላ
ኣይስ ሃይቃቤኪና?
12 ጉልባቴቲ ታና ሞኪ ኤካናስ፥
ꬋንꬃቲካ ታና ꬋንꬃናስ
ኣይስ ቤቲዶ?
13 ሃኢ ታኒ ሳሮን ኢቺዳኮ፥
ꬊስካዳካ ሼምፖ
ዴማናኮሺን።
14 ሃኢ ላሌቲ ቤቲዛይታ
ባስ ኬጺዳ ቢታ ካዎታራኔ
ዞሪዛይታራ ታ ꬊስካዳ
ሼምፖ ዴማናኮሺን።
15 ባ ኬꬃ ዎርቃኒኔ
ቢራን ኩንꬂዳ፤
ዳናታራ ታ ኢሲፌ
ሼምፓናኮሺን።
16 ቃሴካ ኣይስ ቢታ ጋርሳን
ሞጌቲዳ ኣዉጫያ፥
ዎይኮ ኢሲ ጋላሳ ፖኦ
ሙሌካ ቤኦንታ ና ማላ
ኣይስ ጊዳቤኪና?
17 ሄን ኢታታ ዋዪሶይ ኣታና፤
ዳቡርሲዛ ኦሶን
ዴኢዳይቲ ሼምፓና።
18 ቃሼቲ ዲዛ ኣሳቲካ ሳሮ ዴማና፤
ባና ኦሲሲዛ ኣሳታ ሃንቆ ቃላ
ሲያናይሳፌካ ኣታና።
19 ላፋቲኔ ጊታ ኣሳቲ
ኢሲፌ ቤታና፤
ኣይሌቲካ ሄን
ባ ጎዳታፔ ዎዜታና።
20 «ጾሲ ኡንኦ ቦላ ዲዛይታስ ፖኦ፥
ዱሳዚ ጫሞ ቆፋን ኩሚዳዴስ
ዴኦ ኣይስ ኢሚዜ?
21 ሃይቆ ላሞቲዛይታሲኔ
ቆቴቲ ዲዛ ኣቆፔ
ኣꬂ ኮዪዲ ዴሞንታይታስ
ዴኦ ኣይስ ኢሚዜ?
22 ዱጌ ዱፎን ጌሊሼ ኡፋዬቲዛይታስ
ዴኦይ ኣይስ ኢሜቲዜ?
23 ኢዚ ቢዛ ኦጌይ
ኢዛዴፌ ጌሜቲዳዴሲኔ
ጾሲ ጎርዲ ዎꬂዳ ኣሳስ
ፖኦይ ኣይስ ኢሜቲዜ?
24 ዬሆይ ታስ ካꬅ ጊዲዴስ፤
ዋሶይካ ታስ
ጎጊዛ ሃꬃ ማላ ጊዲዴስ።
25 ታ ያዪዳ ሚሽ ታ ቦላ ዪዴስ፤
ታ ዳጋሚዳይሲካ
ታ ቦላ ጋኪዴስ።
26 ታ ጊዶን ሂርጋይ ጻላ ዲዛ ጊሻስ
ሳሮይ፥ ዎፓይኔ
ሼምፖይ ዴና» ጊ ቃንጊዴስ።