ናቤ ኢዩኤሊ ሃይሳ ቢታ ቦላ ኣይዴፔ ኣይዴ ጋካናስ ዴኢዳኮ ኢዛ ዱሳ ጊሻስ ኤሬቲዛ ዳሮ ሚሺ ዴና፤ ጊዶ ኣቲን ማጻፋዚ ቤቲዳይ ኪርስቶሲ ዬሌታናፔ ካሴ 500 ላይꬃ ሄራን ዎይኮ 400 ላይꬃ ሄራን ጊዳና ጌቴቲ ቆፌቴስ። ሄሲ ሄ ዎዴዚካ ፓሪሴ ካዎቴꬃ ዎዴና፤ ኢዩኤሊ ኢስራኤሌ ዴሬን ዎልቃማ ቦሌይ ዴንዲዲ ዳሮ ሚሽ ሞሪን ኮሻይ ቢታ ቦላ ዴንዲዳይሳ ዮቴስ፤ ሄይቲ ሄ ሃኖቲ ጎዳ ዩሳ ጋላሳይ ማቲሺን ኢዛ ጌሻ ቆፋራ ኤቄቲዛይታ ኡባ ኢዚ ቃጻያናይሳ ጉጂዲ ኤሪሴስ። ናቤዚ ዴሬይ ማሮቴꬃን ጌላና ማላ ጾሲ ኣሳ ጼይጊዛይሳ ቆንጪሴꬃን ኣሳይ ማሮቴꬃን ጌሊኮ ኢዚካ ቤኒ ዴሬዛ ሃኖቴꬃኮ ሲሚዲ ዴራ ኣንጃናይሳ ኣሳ ቆፍሴስ፤ ኢዛ ቲንቢቴዛ ጊዶፌ ኬሂ ቆንጪ ቤቲዛ ኡፋይሳ ቃላይ ጾሲ ማጫኔ ኣቱማ ናቴꬃታ ቦላ፥ ጪማታ ቦላ፥ ዴሬዛ ኡባ ቦላካ ባ ኣያና ዬዳናይሳ ቆንጪሴስ።