15
ዩሁዳ ካዎ ኣዛርያሳ
(2ታሪ 26፡1-23)
1 ኢስራኤሌ ካዎ ኢዮርባኣሜይ ካዎቲዳ ናምኡ ታማኔ ላፑንꬃ ላይꬃን ዩሁዳ ካዎ ኣማሲያሴ ና ኣዛሪያሲ ካዎቲዴስ።
2 ኢዚ ካዎቲዛ ዎዴ ኢዛስ ላይꬃይ 16፤ ኢዚ ዬሩሳላሜ ኢቻሽ ታማኔ ናምኡ ላይꬅ ሃሪዴስ፤ ኢዛ ኣያ ዪኮልያይ ዬሩሳላሜ ማጫሳ።
3 ካሴ ኢዛ ኣዋ ኣማሲያሲ ኦꬆይሳꬆ ኣዛሪያሲካ ጎዳ ሲንꬃን ሎኦ ኦሶ ኦꬂዴስ።
4 ጊዶ ኣቲን ዙምቡላታ ቦላ ጎይኒዛሳሆቲ ꬋይቤቴና፤ ኣሳይካ ሄን ያርሾ ሺሾኔ ኤጻኔ ጩዋሴꬅ ኣጊቤና።
5 ጎዳይ ካዎዛ ኢዚ ሃይቃና ጋካናስ ኢዛ ቦላ ኢንቺራቻ ሃርጌ ዬጊዴስ፤ ኢዚካ ኣሳፔ ሻኬቲዲ ዱማ ኬꬃን ኡቲዴስ፤ ሄ ዎዴ ኢዛ ካዎቴꬃ ኬꬃ ኣላፌቴꬃን ዴራ ኣይሲዛይ ካዎዛ ና ኢዮኣታሜ።
6 ኣዛሪያሳ ካዎቴꬃ ላይꬃን ኦሴቲዳዚኔ ሃኒዳ ሃኖቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
7 ኣዛሪያሲ ሃይቂዲ ባ ኣዋታን ጋይቲዴስ፤ ዳዊቴ ካታማን ኢዛ ኣዋታ ዱፎ ማታን ኢዛ ሞጊዳ፤ ኢዛ ና ኢዮኣታሜይ ኢዛሶሆን ካዎቲዴስ።
ኢስራኤሌ ካዎ ዛካራሳ
8 ዩሁዳ ካዎ ኣዛሪያሲ ካዎቲዳ ሄꬑ ታማኔ ኦስፑንꬃ ላይꬃን ኢዮርባኣሜ ና ዛካራሲ ሳማሪያ ካታማን ኢስራኤሌን ካዎቲዴስ፤ 6 ኣጊናካ ሃሪዴስ።
9 ካሴ ኢዛ ኣዋይ ኦꬆይሳꬆ ኢዚካ ጎዳ ሲንꬃን ኢታ ሚሽ ኦꬂዴስ፤ ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራፔ ኢዚ ሲሚቤና።
10 ያቡሴ ና ሻሎሜይ ዛካራሳ ቦላ ዴንዲዲ ዴራ ሲንꬃን ኢዛ ቦላ ሜቶ ጋꬂ ዎꬊዴስ፤ ኢዛ ሶሆንካ ካዎቲዴስ።
11 ዛካራሳ ካዎቴꬃ ላይꬃታን ኦሴቲዳ ሃራ ሚሻቲካ ኢስራኤሌ ካዎታ ታሪኬ ማጻፋን ጻፌቲዳ።
12 ካሴ ጎዳይ ኢዩስ፥ «ኔ ናይቲ ኦይዳንꬃ ዬሌታ ጋካናስ ኢስራኤሌ ካዎቴꬃ ኣራታን ኡታና» ጊዲ ዮቲዳ ቃላይ ፖሌቲዴስ።
ኢስራኤሌ ካዎ ሻሎሜ
13 ዩሁዳ ካዎ ኦዚያይ ካዎቲዳ ሄꬑ ታማኔ ኡዱፉንꬆ ላይꬃን ያቡሴ ና ሻሎሜይ ኢስራኤሌ ቦላ ካዎቲዴስ። ሳማሪያን ኡቲዲ ኢሲ ኣጊና ዴራ ሃሪዴስ።
14 ጋዴ ና ሚናሄሚ ቲርጻፌ ኬዚ ሳማሪያ ቢዲ ሜቶ ጋꬂዴስ፤ ያቡሴ ና ሻሎሜ ዎꬊዲ ኢዛሶሆን ካዎቲዴስ።
15 ሻሎሜ ካዎቴꬃ ላይꬃታን ኦሴቲዳ ሃራ ኦሶቲኔ ኢዚ ዴንꬄꬂዳ ዮኦቲ ኢስራኤሌ ካዎታ ታሪኬ ማጻፋን ጻፌቲዳ።
ኢስራኤሌ ካዎ ሚናሄሜ
16 ሄ ዎዴ ሚናሄሚ ቲርጻፌ ኬዚዲ ቲፊሳ ካታማ ኣሳኔ ሄ ሄራን ዲዛ ኣሳ ኡባ ቦላ ሜቶ ጋꬂዴስ፤ ኢዚ ሄሳꬆ ኦꬂዳይ ኢስቲ ሄ ካታማይ ፔንጌታ ዶዮንታ ኢጺዳ ጊሻሳ፤ ቲፊሳ ኣሳ ዎꬊዴሲኔ ሻራራ ዲዛ ማጫሳታ ኡባታ ኡሎ ዳኪዴስ።
17 ዩሁዳ ካዎ ኣዛሪያሲ ካዎቲዳ ሄꬑ ታማኔ ኡዱፉንꬆ ላይꬃን ጋዴ ና ሚናሄሚ ኢስራኤሌ ቦላ ካዎቲዴስ፤ ኢዚ ሳማሪያን ኡቲዲ 10 ላይꬅ ሃሪዴስ።
18 ኢዚ ጎዳ ሲንꬃን ኢታ ሚሽ ኦꬂዴስ፤ ኢዚ ባ ዲዛ ላይꬅ ኡባን ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራፔ ሲሚቤና።
19 ሄሳፌ ጉዬ ኣሶሬ ካዎ ቴሊጌሊቴሊፌሊሶሬይ ቢታዮ ኦሊ ኦይኪዴስ፤ ሚናሄሚካ ባስ ማዶ ዴማናሲኔ ባ ካዎቴꬃን ዲዛ ባ ዛዋ ሚንꬃናስ ጊዲ 1,000 ሳቂሌ ቢራ ኢዛስ ኢሚዴስ።
20 ሚናሄሚ ሄ ሚሻ ኢስራኤሌ ኣሳይ ኬሴቲ ሺሻና ማላ ኦꬂዴስ፤ ኢዚ ሄሳꬆ ኦꬂዳይ ሚሻዛ ኣሶሬ ካዎስ ኢማና ማላ ዱሬ ኣሳይ ኢሶይ ኢሶይ 50 ሳቂሌ ቢራ ኬሳና ማላ ዎልቃꬂዴስ፤ ሄሳ ጊሻስ ኣሶሬ ካዎይ ሄ ዴሬን ጋምኦንታ ባ ዴሬ ሲሚ ቢዴስ።
21 ሚናሄሜ ካዎቴꬃ ላይꬃን ኦሴቲዳ ሃራ ኦሶቲኔ ሃኒዳ ሃኖቲ ኡባይ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
22 ሚናሄሚ ሃይቂዲ ባ ኣዋታን ጋይቲዴስ፤ ኢዛ ና ፊቃሴያሲ ኢዛሶሆን ካዎቲዴስ።
23 ዩሁዳ ካዎ ኣዛሪያሲ ካዎቲዳ ኢቻሽ ታማንꬃ ላይꬃን ሚናሄሜ ና ፊቃሴያሲ ሳማሪያ ካታማን ኢስራኤሌ ቦላ ካዎቲዲ 2 ላይꬅ ሃሪዴስ።
24 ፊቃሴያሲ ጎዳ ሲንꬃን ኢታ ኦꬂዴስ፤ ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራፔ ሲሚቤና።
25 ኢዛ ኦላ ኣሳ ሃላቃታፔ ኢሶይ ኤሮሜሊዮ ና ፋቁሄይ ኢዛ ቦላ ዴንዲዴስ፤ ጋላኣዴፔ 50 ኣስ ባ ቦላ ኤኪ ቢዲ ሳማሪያን ካዎ ኬꬃን ዲዛ ሚጻን ፊቃሴያሴ፥ ኣርጎባኔ ኣራያራ ኢሲፌ ዎꬊዲ ኢዛሶሆን ካዎቲዴስ።
26 ፊቃሴያሳ ካዎቴꬃ ላይꬃን ኦሴቲዳ ሃራ ኦሶቲኔ ሃኒዳ ሃኖቲ ኡባይ ኢስራኤሌ ካዎታ ታሪኬ ማጻፋን ጻፌቲዴስ።
ኢስራኤሌ ካዎ ፋቁሄ
27 ዩሁዳ ካዎ ኣዛሪያሲ ካዎቲዳ ኢቻሽ ታማኔ ናምኣንꬆ ላይꬃን ኤሮሜሊዮ ና ፋቁሄይ ሳማሪያ ካታማን ኢስራኤሌ ኣሳ ቦላ ካዎቲዴስ፤ 20 ላይꬅ ካዎቲዴስ።
28 ኢዚካ ጎዳ ሲንꬃን ኢታ ሚሽ ኦꬂዴስ፤ ናባጼ ና ኢዮርባኣሜይ ኢስራኤሌ ኣሳ ኦሲሲዳ ናጋራፔ ሲሚቤና።
29 ኢስራኤሌ ካዎ ፋቁሄይ ካዎቲ ዲዛ ላይꬃታን ኣሶሬ ካዎ ቴሊጌሊቴሊፌሊሶሬይ ዪዲ ኢዮኔ፥ ኣቤሊ-ቤቲ-ማኢካ፥ ያኖኬ፥ ቃዴሴ፥ ሃጾሬ፥ ጋላኣዴ፥ ጋሊላኔ ኒፍታሌሜ ዴራካ ኢሲፌ ጋꬂ ኦይኪዴስ። ኣሳካ ዲኢ ኤኪዲ ኣሶሬ ዴሬ ኤፊዴስ።
30 ሄሳፌ ጉዬ ኤላ ና ሆሴኤይ ኤሮሜሊዮ ና ፋቁሄ ቦላ ዴሬዛ ዴንꬂዴስ፤ ኢዛ ቦላ ሜቶ ጋꬂዲ ዎꬊዴስ፤ ኦዚያ ና ኢዮኣታሜይ ካዎቲዳ ናምኡ ታማንꬃ ላይꬃን ሆሴኤይ ፋቁሄ ሶሆን ካዎቲዴስ።
31 ፋቁሄ ካዎቴꬃ ላይꬃታን ኦሴቲዳ ሃራ ኦሶቲኔ ሃኒዳ ሃኖቲ ኡባይ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?
ዩሁዳ ካዎ ኢዮኣታሜ
(2ታሪ 27፡1-9)
32 ኢስራኤሌ ካዎ ኤሮሜሊዮ ና ፋቁሄይ ካዎቲዳ ናምኣንꬆ ላይꬃን ዩሁዳ ካዎ ኦዚያ ና ኢዮኣታሜይ ካዎቲዴስ።
33 ኢዚ ካዎቲዛ ዎዴ ኢዛስ ላይꬃይ 25፤ ኢዚ ዬሩሳላሜን ኡቲዲ 16 ላይꬅ ሃሪዴስ። ኢዛ ኣያ ሳዶቄ ና ኢዬሩሶ ጌቴታዉስ።
34 ኢዚ ካሴ ባ ኣዋ ኦዚያይ ኦꬂዳ ማላ ጎዳ ሲንꬃን ሎኦ ኦሶ ኦꬂዴስ።
35 ጊዶ ኣቲን ዙምቡላታ ቦላን ጎይኒዛሶሆቲ ኪቺቤቴና፤ ኣሳይ ሄን ያርሾ ሺሾኔ ኤጻኔ ጩዋሴꬅ ኣጊቤና። ኢዮኣታሜይ ጎዳ ኬꬃስ ፑዴ ባጋ ፔንጌዛ ዛሪ ጊግሲዴስ።
36 ኢዮኣታሜ ካዎቴꬃ ላይꬃታን ኦሴቲዳ ሃራ ኦሶቲኔ ሃኒዳ ሃኖቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
37 ሄ ዎዴ ጎዳይ ኣራሜ ካዎ ኤራሶኔይኔ ኤሮሜሊዮ ና ፋቁሄይ ዩሁዳ ኦላና ማላ ኦꬂዴስ።
38 ኢዮኣታሜይ ሃይቂዲ ባ ኣዋታን ጋይቲዴስ፤ ካሴ ኢዛ ኣዋቲ ሞጌቲዳ ዱፎን ባ ኣዋ ዳዊቴ ካታማን ሞጌቲዴስ። ኢዛ ና ኣካዜይ ኢዛሶሆን ካዎቲዴስ።