8
ዬሱሳ ካሊዳይታኔ ኢዛስ ኦꬂዳ ማጫሳታ
1 ሄሳፌ ጉዬ ዬሱሲ ጾሳ ካዎቴꬃ ሚሺራቾ ሳባኪሼ ዱማ ዱማ ካታማታ ጊዶራኔ ጉታታ ጊዶራ ኣꬊዴስ። ኣꬊ ቢዛ ዎዴ ኢዛ ካሊዛ ታማኔ ናምኣቲ ኢዛራ ዴቴስ።
2 ቃሴካ ቱና ኣያናፔኔ ኢታ ሃርጌፌ ፓጺዳ ኢሲ ኢሲ ማጫሳቲ ኢዛራ ዴቴስ። ኢስቲካ ላፑን ቱና ኣያናይ ኢዚፔ ኬዚዳ ማግዳሌ ጌቴቲዛ ዴሬፔ ዪዳ ማራሞ፥
3 ካዎ ሄርዶሳሶን ኦꬂዛ ኩዛ ማቾ ዮሃኖ ቃሴካ ሶሲኖኔ ሃራ ዳሮ ማጫሳቲ ዴቴስ፤ ኢስቲካ ባንታስ ዲዛ ሚሻራ ዬሱሳስ ኦꬂዛይታ።
ካꬅ ዜሪዛዴ ሌሚሶ
(ማቶ 13፡1-9፤ ማር 4፡1-9)
4 ዳሮ ዴሬይ ኢሲፌ ሺቂ ዲሺን ቃሴካ ኣሳይ ዱማ ዱማ ካታማፔ ኢዛኮ ዎꬊዛ ዎዴ ዬሱሲ ሌሚሶራ ታማርሲሼ፥
5 «ኢሲ ጎሻንቻይ ዜሬꬅ ዜራናስ ኬዚዴስ፤ ኢዚ ዜሪሺን ባጋይ ኦጌን ዎꬊዲ ኣሳ ቶሆን ዬꬌቲዴስ፤ ሳሎ ካፎቲካ ዪዲ ማጺ ሚዳ፤
6 ኢሲ ዜሬꬃይ ሹቻ ጋዴን ዎꬊዲ ሄራካ ጫሪዴስ፤ ጋዴዚካ ሜላ ጋዴ ጊዲዳ ጊሻስ ኤሌ ሜሊዴስ።
7 ቃሴካ ሃራ ዜሬꬂ ኣጉንꬃ ጊዶን ዎꬊዴስ፤ ኣጉንꬃይካ ኢዛራ ኢሲፌ ዲጪዲ ጫሬቻይካ ዲጮንታ ማላ ጩሊዴስ።
8 ቃሴካ ሃራ ዜሬꬃይ ኣራዳ ጋዴን ዎꬊዴስ፤ ጫሪዲ ጼቱ ኩሼ ኣይፊዴስ» ጊዴስ።
ዬሱሲ ሌሚሶን ሃሳይዳ ጋሶ
(ማቶ 13፡10-17፤ ማር 4፡10-12)
ዬሱሲ ሃሳያ ዉርሲዳፔ ጉዬ ቃላ ꬎቁ ሂስቲዲ፥ «ሲዪዛ ሃይꬂ ዲዛ ኣሲ ሲዮ!» ጊዴስ።
9 ዬሱሳ ካሊዛይቲ፥ «ዜሬꬃ ሌሚሶዛስ ቢርሼꬅ ኢማ» ጊዲ ኦይቺን፥
10 ኢዚካ ኢስታስ፥ «ጾሳ ካዎቴꬃ ጹራ ኤሮይ ኢንቴስ ኢሜቲዴስ፤ ሃራታስ ጊዲኮ ሌሚሶራ ዮታይስ ቃሴካ ሃራቲ ቤኢዲ ዎዚናን ዎꬆንታ ማላኔ ሲዪዲ ዩሺ ቆፖንታ ማላ ሃኒዴስ።
ዬሱሲ ቢርሺዳ ዜሬꬃ ሌሚሶ
(ማቶ 13፡18-23፤ ማር 4፡13-20)
11 «ዜሬꬃዛ ሌሚሶይካ ሃይሳ፤ ዜሬꬅ ጌቴቲዳይሲ ጾሳ ቃላ።
12 ኦጌ ላንቄን ዎꬊዳይሲ ቃላ ሲዪዛይታ፤ ጊዶ ኣቲን ኢስቲ ኣማኒዲ ኣቶንታ ማላ ጻላኤይ ዪዲ ቃላ ኢስታ ዎዚናፔ ኤኪቺዛይታ።
13 ሹቻ ቦላ ዎꬊዳይቲካ ቃላ ሲዪዲ ኡፋይሳራ ኤኪዛይታ፤ ኢስቲካ ሃኢስ ኣማኔቴስ ኣቲን ሜቶይ ኢስታ ቦላ ጋኪዛ ዎዴ ጻጶ ዬዶንታ ጊሻስ ኤሌራ ኣማኖ ካዲዛይታ።
14 ኣጉንꬃ ጊዶን ዎꬊዳይቲ ቃላ ሲዪዛይታ፤ ሄይቲካ ሃይሳ ሃ ኣላሜ ቆፋኒኔ ኣቆታን፥ ሃ ቢታ ቦላ ዱሳ ሎኤቴꬃን ጩሌቲዲ ሎኤꬂ ኣይፌ ኢሜቴና።
15 ኣራዳ ቢታን ዎꬊዳይሲ ቃላ ሱሬኒኔ ሎኦ ዎዚናን ሲዪዲ ናጊዛይታኔ ዳንዳያን ሚኒዲ ኣይፌ ኣይፊዛይታ።
ቆንጬሶን ዲዛ ጾምፔ
(ማር 4፡21-25)
16 «ፖኦ ፖኢሲዲ ባꬃ ጊዶን ዎይኮ ኣርሳ ጋርሳን ዎꬂዛ ኣሲ ዴና፤ ጊዶ ኣቲን ኬꬄ ጌሊዛ ኣሳስ ፖኣና ማላ ቆንጬሶን ዎꬄቴስ።
17 ቆቴቲዲ ቆንጬ ኬዞንታይ፥ ፖኦን ኬዚዲ ኤሬቶንታ ጌማን ኣታና ሚሺ ዴና።
18 «ሄሳ ጊሻስ ኢንቴ ሲዪዛይሳ ናጌቲ ሲዪቴ፤ ዲዛ ኣሳስ ጉጄታና፤ ባይንዳዴስ ኡባፌ ኢዛስ ዲዛ ሚሳቲዛራካ ኤኬታይቻና» ጊ ዛሪዴስ።
ዬሱሳኔ ኢዛ ኢሻታ
(ማቶ 12፡46-50፤ ማር 3፡31-35)
19 ሄሳፌ ጉዬ ዬሱሳ ኣያኔ ኢዛ ኢሻቲ ዬሱሳኮ ዪዳ፤ ጊዶ ኣቲን ኣሳ ዳሮቴꬃፌ ዴንዲዳይሳን ኢዛኮ ሺቃናስ ዳንዳይቤቴና።
20 ሄ ዎዴ ኣሳይ ዬሱሳስ፥ «ኔ ኣዬያኔ ኔ ኢሻቲ ኔና ቤያናስ ኮዪዲ ካሬን ኤቂዳ» ጊዲ ዮቲዳ።
21 ዬሱሲካ ዛሪዲ፥ «ታ ኣያኔ ታ ኢሻቲ ጾሳ ቃላ ሲዪዲ ናጊዛይታ» ጊዴስ።
ዬሱሲ ኣባ ዳምባላዛ ሴሪዴስ
(ማቶ 8፡23-27፤ ማር 4፡35-41)
22 ኢሲ ጋላስ ዬሱሲ ባና ካሊዛይታራ ዎጎሎ ጊዶ ጌሊዲ፥ «ኣባፌ ሄ ፒንꬅ ፒኖስ» ጊዴስ።
23 ኢስቲካ ፒኒሺን ኣባ ቦላ ዳምባላይ ዴንዲዲ ዋዪሲዛ ዎዴ ዬሱሲ ꬊስኪዴስ፤ ሃꬂካ ዎጎሎዛ ጊዶ ጌሊን ኣሳይ ዳሮ ሜቶቴቲዴስ።
24 ዬሱሳ ካሊዛይቲ ኢዛኮ ሺቂዲ፥ «ጎዶ! ጎዶ! ኑ ዉራና ሃኖስ» ጊዲ ዬሱሳ ꬊስኮፌ ዴንꬂዳ።
ኢዚካ ቤጊዲ ጫርኮዛኔ ኣባ ዳምባላ ሴሪን ጫርኮይኔ ኣባ ዳምባላይ ጮኡ ጊዴስ።
25 ኢዚካ ባና ካሊዛይታ፥ «ኢንቴ ኣማኖይ ኣዋ ቢዴ?» ጊዴስ፤ ኢስቲካ ባ ጊዶን ባቢሼኔ ማላሌቲሼ፥ «ጫርኮኔ ሃꬄ ኣዛዚዛይ፤ ኢስቲካ ኢዛስ ኣዛዜቲዛይ ኢዚ ኦኔ?» ጊዳ።
ዳይዳንꬂ ኦይኪን ዬሱሲ ፓꬂዳ ኣዴዛ
(ማቶ 8፡28-34፤ ማር 5፡1-20)
26 ኢዛፔ ጉዬ ጋሊላፔ ሄ ፒንꬃን ዲዛ ጌርጌሴኖኔ ጌቴቲዛ ዴሬ ዎጎሎራ ፒኒዳ።
27 ዬሱሲ ዎጎሎዛፔ ጋዴን ዎꬊን ዳይዳንꬂ ኢዛ ቦላ ዲዛ ኢሳዴይ ካታማፔ ኬዚዲ ኢዛ ዴሚዴስ፤ ሄ ኣዴዚ ዳሮ ዎዴ ማይኦ ማይኦንታ ካሎ ዲዛዴኔ ኬꬃን ኣቆንታ ዱፎ ባስ ኣቆሶ ኦꬂዳ ኣሳ።
28 ዬሱሳ ቤኢዳ ዎዴ ዋሲሼ ዬሱሳ ሲንꬃን ኩንዲዴስ፤ ቃላ ꬎቁ ሂስቲዲ፥ «ቦንቾ ጾሳ ና ዬሱሳ! ታሲኔ ኔስ ኣይ ጋይቶቴꬂ ዲዜ? ኔ ታና ዋዪሶንታ ማላ ታ ኔና ዎሳይስ» ጊዴስ።
29 ቱና ኣያናይ ሄሳ ጋናስ ዳንዳይዳይ ኣዴዛፔ ኬዛና ማላ ዬሱሲ ኣዛዚዳ ጊሻሳ። ቱና ኣያናዚካ ዎዴን ዎዴን ዴንዲዛ ጊሻስ ኣዴዚ ሳንሳላታኒኔ ቢራታን ቶሆ ቃቺ ናጊንካ ቃሼቲዳ ሳንሳላታ ዱሴሬꬂዲ ኢዛ ቦላ ዲዛ ዳይዳንꬃይ ኢዛ ዱጌ ባዞ ዛሪ ኤፌስ።
30 ዬሱሲ፥ «ኔ ሱንꬂ ኦኔ?» ጊዲ ኦይቺዴስ፤ ኢዚካ ዳሮ ዳይዳንꬃቲ ኢዛን ጌሊዲ ዲዛ ጊሻስ ታ ሱንꬂ፥ «ሌጎኔ» ጊዴስ።
31 ዳይዳንꬃቲካ ባና ዉርሴꬂ ባይንዳ ጪማ ኦላን ዬጎንታ ማላ ሚንꬂዲ ዎሲዳ።
32 ሄንካ ዙማ ቦላ ዳሮ ጉዱንꬂ ሄሜቴስ፤ ዳይዳንꬃቲ፥ «ጉዱንꬃ ዉዴዛን ጌሊቴ» ጊዲ ኣዛዛና ማላ ዎሲን ዬሱሲ፥ «ኤሮ ጌሊቴ!» ጊዴስ።
33 ዳይዳንꬃቲ ኣዴዛፔ ኬዚዲ ጉዱንꬃታን ጌሊዳ። ጉዱንꬃቲ ኣፎዛ ዱጉንꬃራ ቢቻሪሼ ቢዲ ኣባን ጌሊ ሚቴቲዳ።
34 ሄሚዛይቲ ሃኒዳይሳ ቤኢዳ ዎዴ ቤሮቲ ቢዲ ካታማ ኣሳሲኔ ዴሬ ኣሳስ ዮቲዳ።
35 ሃኒዳይሳ ቤያና ጊዲ ኣሳይ ባ ዲዛሶፔ ዬሱሳኮ ዪዴስ፤ ዳይዳንꬃይ ኢዛፔ ኬዚዳ ኣዴዚካ ካሃይ ሲሚን ኣፋላ ማይኢዲ ዬሱሳ ቶሆ ጊዶን ኡቲዳይሳ ቤኢዲ ባቢዳ።
36 ዳይዳንꬃን ኦይኬቲዳ ኣዴዚ ፓጺሺን ቤኢዳይቲ ኢዚ ዋኒ ፓጺዳኮ ዴሬዛስ ዮቲዳ።
37 ጌርጌሴኖኔ ማታን ዲዛ ኣሳይ ኬሂ ባቢዳ ጊሻስ ዬሱሳ፥ «ሃይሳፌ ኪቻ!» ጊዲ ዎሲዳ፤ ኢዚካ ዎጎሎዛን ጌሊዲ ሲሚ ቢዴስ።
38 ዳይዳንꬃይ ኢዛፔ ኬዚዳ ኣዴዚ ዬሱሳራ ኢሲፌ ዳና ማላ ዎሲዴስ።
39 ጊዶ ኣቲን ዬሱሲ ኢዛ፥ «ኔሶ ሲማዳ ጾሲ ኔስ ኦꬂዳ ጊታ ሚሽ ኡባ ዮታ» ጊዲ ሞይዚዴስ፤ ኣዴዚካ ዬሱሲ ኢዛስ ኦꬂዳ ጊታ ሚሽ ባ ካታማን ዲዛ ኣሳስ ኡባስ ቆንጬን ዮቲሼ ቢዴስ።
ኢያኢሮሳ ናዮኔ ዬሱሳ ማይኦ ቦቺዳ ማጫሳዮ
(ማቶ 9፡18-26፤ ማር 5፡21-43)
40 ኣሳይ ዉሪ ዬሱሳ ዩሳ ናጊሼ ጋምኢዳ ጊሻስ ኢዚ ሲሚሺን ኡፋይሳን ሞኪ ኤኪዴስ።
41 ሄ ዎዴ ኢያኢሮሳ ጌቴቲዛ ኣይሁዳ ዎሳ ኬꬃ ሃላቃይ ዪዲ ዬሱሳ ቶሆ ቦላ ኩንዲዲ ባሶ ባና ማላ ዎሲዴስ።
42 ኢዚ ሄሳꬆ ኦይቺዳይ ኢዛስ ታማኔ ናምኡ ላይꬅ ኩሚዳ ኢሲ ማጫ ናይ ሳኬታዳ ሼምፖ ቦላ ዲዛ ጊሻሳ።
ኢዚ ሄ ቡሳን ዲሺን ዴሬይ ዳሪዲ ባ ጊዶን ሱጌቲዲ ኢዛ ኬሂ ኡንኢሲዴስ።
43 ታማኔ ናምኡ ላይꬅ ሱꬂ ኢዚፔ ጉኪሺን ዲዛ ኢሲ ማጫሳያ ባስ ዲዛ ሚሻ ዉርሳ ꬋሌ ኤሪዛ ኣሳታስ ኢማ ዉርሲን ኢዞ ፓꬃናስ ዳንዳይዳ ኣሲ ኢሳዴይካ ዴና።
44 ኢዛካ ጉዬራ ሺቃዳ ዬሱሳ ኣፋላ ማጫራታ ቦቻዱስ፤ ኢዚፔ ጉኪዛ ሱꬃይ ሄራካ ኤቂ ኣጊዴስ።
45 ዬሱሲካ፥ «ታና ቦቺዳይ ኦኔ?» ጊዴስ። ዉሪካ ኑኒ ቦቺቤኮ ጊ ካዲዳ ዎዴ ጴጽሮሲ ዛሪዲ፥ «ጎዶ! ኣሲ ዉሪ ዩዪ ኣꬊዲ ኔና ሱጌሬꬂዲ ኡንኢሴስ» ጊዴስ።
46 ጊዶ ኣቲን ዬሱሲ፥ «ኣሲ ታና ቦቺዴስ፤ ዎልቃይ ታፔ ኬዚዳይሳ ታ ኤራይስ» ጊዴስ።
47 ማጫሳያ ኤሬቶንታ ቆቴታዳ ባናስ ዳንዳዮንታይሳ ኤራዳ ኮኮራሼ ያዳ ዬሱሳ ሲንꬃን ኩንዳዱስ፤ ኢዛካ ዬሱሳ ዋና ቦቺዳኮኔ ቃሴካ ኤሌራ ዋና ፓጺዳኮ ኡባ ኣሳ ሲንꬃን ዮታዱስ።
48 ኢዚካ፥ «ታ ናዬ! ኔ ኣማኖይ ኔና ፓꬂዴስ፤ ሳሮን ባ!» ጊዴስ።
49 ዬሱሲ ቡሮ ማጫሳይስ ሃሳያ ቦላ ዲሺን ኣይሁዳ ዎሳ ኬꬃ ሃላቃ ኢያኢሮሳ ኬꬃፌ ኢሲ ኣሲ ኢያኢሮሳስ፥ «ኔ ናያ ሃይቃዱስ፤ ሄሳ ጊሻስ ሃይሳፌ ጉዬ ኣስታማሬዛ ሜላ ዳቡርሶፋ!» ጊዴስ።
50 ዬሱሲ ሄሳ ሲዪዲ ኢያኢሮሳ፥ «ኣይኮይ ባ፤ ባቦፋ! ኣማና ኣቲን ኔ ናያ ፓጻና» ጊዴስ።
51 ዬሱሲ ኢያኢሮሳ ኬꬄ ጌሊዛ ዎዴ ጴጽሮሳ፥ ዮሃኒሳኔ ያቆቤ ቃሴካ ናዪ ኣዋፔኔ ኣይፔ ኣቲን ሃራይ ኦኒካ ኢዛራ ጌላና ማላ ኮዪቤና።
52 ሄ ዎዴ ኣሳይ ዉሪ ናይስ፥ «ዉ! ዉይ» ጊ ዋሲ ዬኪሺን ዬሱሲ፥ «ዬኮፍቴ፤ ኢዛ ኢቻዱስ ኣቲን ሃይቃቤኩ» ጊዴስ።
53 ኣሳይካ ናያ ሃይቂዳይሳ ኤሪዛ ጊሻስ ዬሱሳ ቦላ ሚጪዴስ።
54 ጊዶ ኣቲን ናዪ ኩሼ ኢዚ ኦይኪዲ፥ «ታ ናዬ! ዴንዳ!» ጊዴስ።
55 ናይስ ሼምፖይካ ሲሚዴስ፤ ሄራካ ዴንዳ ኤቃዱስ፤ ዬሱሲካ ኢዚስ ሚዛ ሚሽ ኢማና ማላ ኣዛዚዴስ።
56 ናዮ ዬሊዳይቲካ ማላሌቲዳ፤ ጊዶ ኣቲን ኢዚ ሃኒዳይሳ ኦናስካ ዮቶንታ ማላ ኣዛዚዴስ።